Ngrauhin Future SMEs Village, Wagub Cok Ace Ngaptiang Vibrasi Positif Bali Prasida Ngardi Santi Jagadita
- 11 November 2022
- 22:11 WITA
- News
DENPASAR, Balitopnews.com - Wakil Gubernur Bali Prof. Tjokorda Oka Sukawati (Cok Ace), rahina Sukra (11 November 2022) ngrauhin acara pamungkah Future SMEs Village sane kalaksanayang ring Bali Collection, Kawasan ITDC, Nusa Dua, Badung.
Ring sambrama wacanannyane, Wagub Cok Ace ngaturang swasti prapta ring Pulo Bali. Pulo sane sampun kasub saha akeh karauhin para wisatawan.
"Swasti prapta ring Pulo Bali, Pulo Dewata, Pulo Cinta, Pulo Seribu Pura. Mugi iyusan utawi vibrasi positif Bali prasida ngardi santi jagadita, prasida antar ngamargiang samian dudonan KTT G20," Baos Guru Besar ISI Denpasar puniki.
Wagub Cok Ace taler maosang yening KTT G20 anut sareng visi pembangunan Pemerintah Provinsi Bali “Nangun Sat Kerthi Loka Bali” melarapan Pola Pembangunan Semesta Berencana nyujur Bali Era Baru. Puniki madue semerti nyaga kasucian miwah karahayuan jagat Bali miwah sadagingnyane.
Parikrama sane kabungkah olih Menteri Koperasi dan UKM Teten Masduki puniki ngambil unteng "Future SMEs Village, Local Wisdom for Global Sustainability". Parikrama puniki pinaka cihna uratian saking Kementerian Koperasi dan UMKM majeng pengusaha lokal wiadin pengrajin dalam negeri.
Tetujon utama saking Future SMEs Village puniki sajeroning mamerang pikaryan krama Indonesia mangda prasida ngranjing ring pasar global. Pangaptine, prasida mamerang pikaryannyane majeng delegasi utawi atiti sane rauh ring pamargin KTT G20 puniki.
Future SME Village kaanggen genah majeng para delegasi G20 sajeroning mapupul wiadin mabebaosan wiadin nyantenang pikaryan-pikaryan pinih becik krama ring nusantara.
Ring Future SME Village, para delegasi prasida nyantenang Future Mobility, Future Craft, Future Fashion, Future Food, miwah Future Wellness, wiadin makudang performance seni tradisional miwah kontemporer rauhing arsitektur malakar gesing selami pamargin Future SME Village.
Ring galahe punika, Wagub Cok Ace taler ngiringang Menkop UKM Teten Masduki nyingakin Pameran Kendaraan Bermotor Listrik Berbasis Baterai (KBLBB). Makudang kendaraan sane kapamerang pinaka kendaraan sane kaanggen ring pamargin KTT G20 ring Pulo Dewata.(Rls/Btnc)
Komentar