Dinsos P3A Provinsi Bali Gelis Nampenin Video Viral LKSA Ganesha Sevanam Buleleng
Kamis, 12 September 2024
BULELENG,Balitopnews.com - Dinas Sosial, Pemberdayaan Perempuan, dan Perlindungan Anak (Dinsos P3A) Provinsi Bali gelis nampenin konten viral ring media sosial indik pinunas donasi saking Lembaga Kesejahteraan Sosial Anak (LKSA) Ganesha Sevanam, sane magenah ring Desa Jagaraga, Kecamatan Sawan, Kabupaten Buleleng.
Kepala Dinsos P3A Provinsi Bali, Luh Ayu Aryani, digelis mawuwus ring tim mangda rauh ka lapangan nureksanin kawentenan LKSA Ganesha Sevanam. Kunjungan puniki taler kasarengin antuk Manggala Dinas Sosial Kabupaten Buleleng, I Putu Kariaman Putra, Pekerja Sosial Kemensos RI, Alfonso Kolimasang, miwah pejabat fungsional sane tiosan. Dane ngrauhin LKSA Ganesha Sevanam rahina Budha, 11 September 2024.
Pikolih kunjungan tim inggih punika pengurus LKSA Ganesha Sevanam nlatarang konten viral punika wantah konten sane let tur nenten nyihnayang kawentenan sane mangkin. Pengurus mastikayang stok pangan ring panti kantun wenten, samaliha prasida kaadumin sareng LKSA tiosan.
“Pengurus maosang video viral punika wantah video sane let. Kawentenan LKSA sane mangkin becik, stok pangan taler aman,” tinas Luh Ayu Aryani.
Sajeroning nampenin situasi puniki, tim gabungan ngicen pembinaan majeng ring pengurus LKSA Ganesha Sevanam. Ipun kaelingin indik penggalangan dana sane jagi kaanggen negepin kebutuhan operasional miwah kesejahteraan alit-alit panti punika kadadosang selami anut ring regulasi. Parindikan Mupulang Jinah lan Barang sampun munggah ring Peraturan Menteri Sosial RI No. 8 Tahun 2021, sane kadadosang dasar hukum. Dinsos P3A Provinsi Bali sayaga ngwantu pengurus yening wenten sane durung tatas kauningin indik regulasi puniki.
Sajeroning kunjungan punika, Dinsos P3A Provinsi Bali taler ngicen wantuan sosial marupa 8 paket kebutuhan pokok, sakadi gula, minyak, beras, miwah susu majeng alit-alit. Dinas Sosial Kabupaten Buleleng sareng ngicen wantuan marupa kuaca sane kantun becik majeng ring alit-alit panti.
Sane mangkin, wenten 20 diri alit-alit sane meneng ring LKSA Ganesha Sevanam, inggih punika lanang 9 diri miwah istri 11 diri. Tiosan punika wenten 7 diri sane nenten meneng ring panti.(Rls/Btnc)
Komentar