Ngrauhin Peringatan HBII, Pj. Gubernur Bali Makayunan Ngwentenang Lingkungan Ramah majeng ring Penyandang Disabilitas

Minggu, 29 September 2024

GIANYAR,Balitopnews.com - Pj. Gubernur Bali, S. M. Mahendra Jaya, ngrauhin penyandang disabilitas tuna rungu lan wicara sane mapupul mengetin peringatan Hari Bahasa Isyarat Internasional (HBII) Tahun 2024 ring Wantilan Guwang Barong & Keris Dance, Desa Guwang, Kecamatan Sukawati, Kabupaten Gianyar. 

Peringatan HBII ring rahina Redite (29 September 2024) sane kasarengin antuk 375 penyandang tuna rungu lan wicara taler karauhin olih Anggota DPR RI, I Nyoman Parta.

Pj. Gubernur Mahendra Jaya sajeroning sambrama wacanan dane maosang rasa angayu bagia santukan prasida rauh nyarengin penyandang tuna rungu lan wicara sane sregep pisan sajeroning mengetin HBII. "Suksma duaning sampun nglantur mengetin Hari Bahasa Isyarat Internasional ring Provinsi Bali," baos dane. Manut dane, parikrama puniki wantah bukti eksistensi kawentenan penyandang tuna rungu lan wicara ring Provinsi Bali.

Kantun sajeroning sambrama wacanan dane, Mahendra Jaya negesang komitmen Pemprov Bali ngwentenang lingkungan sane ramah majeng ring makasami penyandang disabilitas. Komitmen puniki satinut ring Undang-Undang Nomor 8 Tahun 2016 indik Penyandang Disabilitas, sane ngunggahang inggian penyandang disabilitas 'berhak memperoleh kesempatan yang sama'. Pinaka wentuk uratian majeng ring pemenuhan hak penyandang disabilitas, Bali sampun ngamedalang Peraturan Daerah (Perda) Nomor 9 Tahun 2015 indik Perlindungan dan Pemenuhan Hak Penyandang Disabilitas.

Regulasi puniki kamargiang antuk sakancan kebijakan nyata sane berpihak ring kawentenan penyandang disabilitas, inggian punika antuk pembukaan formasi khusus ring pengadaan CPNS. Sajeroning pengadaan CPNS Tahun 2024, Pemprov Bali muatang 15 formasi khusus untuk Fasilitator Bahasa Isyarat. Rekrutmen puniki wantah langkah konkret ngwentenang pusat-pusat pelayanan publik sane sayan aksesibel tur ramah majeng ring  penyandang tuna rungu lan wicara ring Provinsi Bali.

Tiosan punika, Pemprov Bali taler ngamedalang Perda Nomor 10 Tahun 2019 indik Penyelenggaraan Ketenagakerjaan. Perda puniki ngwajibang BUMN miwah BUMD ring Provinsi Bali mangda mempekerjakan penyandang disabilitas minimal 2%. “Tiosan punika, perusahaan swasta kawajibang mempekerjakan penyandang disabilitas makehnyane 1% saking total jumlah tenaga kerja sane kadruwenang. Indik puniki jagi tureksain titiang, napike ring lapangan sampun kamargiang,” baos dane. Panguntat sambrama wacanan dane, Pj. Gubernur Mahendra Jaya ngajak angga difabel mangda aktif nincapang kompetensi sane kadruwenang mangda anut ring pabuat dunia usaha miwah industri, mawinan sayan akeh sane terserap ring dunia kerja.

Anggota DPR RI, I Nyoman Parta, sajeroning sambrama wacanan dane maosang sapangrauhnyane ring peringatan HBII wantah pinaka cihna nagingin samayan dane ring warsa sane sampun lintang. “Puniki wantah nagingin samayan titiang ring warsa sane sampun lintang. Duk punika, titiang nyarengin sakewanten nenten wenten pejabat sane rauh. Dadosnyane, dumun titiang katunas ngrauhang pejabat ring peringatan warsa salanturnyane,” baos dane, sinambi ngaturang suksma antuk sapangrauh Pj. Gubernur Mahendra Jaya, Pj. Bupati Gianyar I Dewa Tagel Wirasa, miwah Anggota DPRD Bali Putu Diah Pradnya Maharani. Sajeroning sambrama wacanan dane, Nyoman Parta taler ngaturang salam hormat majeng ring reraman anak-anak difabel sane rauh ring parikrama punika. “Titiang yakin, dane wantah rerama sane luar biasa mawinan iraga prasida mapupul iriki. Duaning ring genah tiosan, kantun akeh rerama sane durung prasida nerima maderbe pianak difabel,” paweweh dane. Panguntat sambrama wacanan dane, Nyoman Parta nyokong utsaha sane ngicen kesempatan majeng ring para difabel makarya ring sakancan perusahaan. Selami puniki, dane maosang sampun akeh ngwantu anak-anak difabel makarya ring makudang-kudang perusahaan. “Iraga sering nyampahang kawagedan ipune. Sujatinyane, yening kaicen selah, ipun taler produktif,” tinas dane.

Tiosan punika, Manggala Prawartaka Peringatan HBII Provinsi Bali, Ni Wayan Siliana Juliantari, maosang pangaptin dane mangda  penyandang disabilitas tuna rungu lan wicara kaicen kesempatan sane pateh ring dunia kerja. (Rls/Btnc)

• TAGS:
• Pemprov Bali