Balitopnews.com, Jembrana. 

Pemasangan fasilitas Wi-Fi gratis ring sajebag desa adat ring sawewengkon Bali sane kaparidabdabin antuk pikamkam sane resmi olih Gubernur Bali Wayan Koster kaaptiang mrasidang nultul tur nangiang kreatifitas para yowana miwah sida ngawerdiang ekonomi kerakyatan. 

 

Indike punika kabaosang olih Bendesa Desa Pakraman Dauh Waru, I Nengah Rinata sane kasadokin ring sela acara peluncuran sane bertajuk "Wi-Fi gratis Nuju Bali Smart Island" magenah ring Wantilan Desa Pakraman Dauh Waru, rahina Buda (10 April 2019) sore. 

 

Rinata, mapangapti kramane pamekas Sekaa Teruna Truni sane magenah ring soang-soang wawidangannyane mangda ngawigunayang fasilitas Wi-Fi gratis puniki antuk rauh ring Wantilan miwah mengakses situs-situs sane mabuat. "Para yowana sane maurip ring aab jagat sekadi mangkin sampun biasa nganggen internet, sampun biasa nakenin (ngarereh informasi.red) sakancan informasi ring google utawi sane kasengguh 'mbah google," baos Rinata. 

 

Punika makahawinan, Rinata mapangapti kawentenan fasilitas akses internet sane sayan aluh tur dangan antuk ngarereh ngicenin dampak sane becik majeng ring krama sane jenek ring wawidangan soang-soang desa adat sane kapasangin. 

 

Tios ring punika, Rinata taler mapangapti mangda kapungkur wekas penyediaan fasilitas Wi-Fi gratis puniki mrasidang kalimbakang malih duaning wenten makudang-kudang desa adat sane madruwe jebar wawidangan sane jimbar tur jumlah krama sane akeh. "Punika makahawinan, pinunas titiang pinaka bendesa mrasidang ngalimbakang malih pemasangan Wi-Fi duaning yening ambil titiang pratiwimba ring Desa Dauhwaru silih sinunggilnyane, titiang iriki madruwe 2 (kalih) wantilan. Yening mrasidang mangda ledang ugi Bapak Gubernur ngawewehin malih (titik) pemasangan Wi-Fi puniki duaning jebar kakuwub desa kalintang jimbar," kadi asapunika tegesnyane. 

 

Akses Wi-Fi gratis puniki taler kaaptiang prasida kawigunayang olih para pelaku UKKM anggen ngadol utawi memasarkan produk kerajinannyane, mangda mrasidang nyantos nembus pasar global. "Maka tatujonnyane mrasidang nincapang perekonomian lokal," kadi asapunika pinunasnyane. 

 

Sajabaning punika, mapaiketan ring utsaha pemeliharaan, Rinata nyantenang kapungkur fasilitas sane sampun kapicayang puniki pacang kajaga tur sapisanan kakemit olih petugas saking desa inucap mangda sida kawigunayang, sebecik antuk mangda sida katitenin. "Titiang percaya, kramane nenten pacang mengakses konten-konten sane negatif duaning titiang sampun memanah program internet positif saking pemerintah mrasidang nangkal konten-konten sane kaon punika, kadi asapunika baos Rinata. 

 

Sakadi sane sampun kaortiang rahina sane sampun lintang, Gubernur Koster maosang peluncuran titik Wi-Fi gratis pacang digelis ngalimbak ring sajebag desa adat sane wenten ring Bali. "Sami wantilan desa adat pacang kapasangin Wi-Fi gratis. Antuk wentennyane Wi-Fi gratis puniki, titiang mapangapti mangda prasida kawigunayang becik-becik anggen ngukuhang kasukertan krama. Mangda wantilan prasida dados "Balinese Culture Meeting Point," kadi punika Koster maosang ring sajeroning sambrama wacanannyane ring acara sane karauhin olih Bupati Jembrana Putu Artha miwah Wakil Bupati Kembang Hartawan punika. 

 

Sajabaning punika, Gubernur taler mapangapti akses Wi-Fi prasida ngawantu nincapang perekonomian, kepariwisataan, ngukuhang budaya, kesehatan, miwah pengetahuan manut ring potensi lokal miwah wawasan global tur pakibeh jagat," baos dane. Manut Ketua DPD PDI Perjuangan Bali puniki, wentennyane infrastruktur informasi puniki pinaka utsaha sane kapertama kamargiang nuju "Bali Smart Island." "Akses Wi-Fi gratis puniki kaaptiang prasida karasayang nyantos makasami komponen masyarakat/krama, inggian punika desa adat, objek pariwisata, puskesmas, miwah sekolah saking tingkat SD nyantos SMA/SMK, makasami mangda polih, anggen nukung revolusi industri 4.0, nukung Bali Era Baru," kadi punika teges dane Wayan Koster. 

 

Koster mapangapti, mangda kapungkur wekas, prasida kalimbakang pemerataan akses informasi miwah pembangunan sane berkeadilan majeng ring makasami krama Bali, pamekas sane magenah ring desa adat. 

 

Pemasangan layanan internet gratis puniki, sujatinipun sampun kalaksanayang ngawit bulan November 2018. Ring warsa 2019 sampun karincikang anggaran pemasangan Wi-fi akehipun 1.825 akses poin. Saking jumlah total punika, pacang kapasang ring wantilan desa adat akehnyane 1.371 akses poin, Puskesmas akehnyane 107 poin, objek wisata akehnyane 203 akses poin, SMA/SMK/SLB akehipun 132 akses poin, Publik Ares akehipun 12 akses poin. Makahawinan kapungkur ring warsa 2020 katargetin makasami desa pakraman miwah makasami fasilitas publik sane akehipun 4.157 unit prasida kapasangin akses Wi-Fi. (Balitopnews.com / Amo Bali )