Gubernur Bali Mapangapti Gerakan Resik Mis Plastik Kaunggahang ring sajeroning Awig-awig

Balitopnews.com, Buleleng

Pemerintah Provinsi Bali rikala kawawa olih Gubernur Wayan Koster nenten surud-surud satata miteketin tur nukung gerakan masif nyiatin kawentenan sampah utawi mis plastik sekali pakai sane prasida ngawetuang kaon majeng ring wawidangan palemahane. Mangda pikolih sane karasayang prasida sayan nincap, dane mapangapti gerakan resik sampah plastik kaunggahang ring sajeroning awig-awig/pararem Desa Adat se-Bali.

Pangaptine punika kasobyahang olih Gubernur Koster ring sajeroning sambrama wacanan dane sane kawacen olih Sekda Provinsi Bali Dewa Indra rikala acara Gerakan Semesta Berencana Bali Resik Sampah Plastik sane kapusatang pamargine ring Pasar Pancasari, Kecamatan Sukasada, Kabupaten Buleleng, dina Radite (19 Mei 2019).

Manut Gubernur Koster, dane dahating sumeken pisan ring sajeroning ngamargiang upaya mikamkamin indik pikobet mis plastik sane sampun sue dados isu global. Gerakan puniki pinaka pamargi sane kapertama anggen mebasang Bali saking cemaran mis plastik sekali pakai sakadi kantong plastik, sedotan plastik miwah styrofoam.

Nanging, dane sampun eling, utsaha pemerintah nenten pacang ngawetuang pikenoh sane mabuat yening tan kawantu olih makasami komponen masyarakat utawi krama, mustikannyane desa adat sane maderbe kainggilan inggih punika prasida negul krama adat makasami. Duaning kadi asapunika, dane dahat mapangapti gerakan resik sampah utawi mis plastik puniki prasida kaparidabdabin tur karincikang malih antuk ngaranjingang program pengelolaan sampah utawi mis ring sajeroning awig-awig/pararem Desa Adat se-Bali.

Kantun maosang indik daging sambrama wacanan dane, anak lanang sane taler kajudi dados Ketua DPD PDIP Bali puniki nyobyahang apresiasi utawi pamujinnyane antuk rasa jengah krama sajeroning nukung gerakan ngirangin kawentenan mis plastik sekali pakai. Dane ngawewehin, gerakan utawi utsaha puniki wantah pikamkam anggen ngamargiang Peraturan Gubernur Nomor 97 warsa 2018 indik Pembatasan Timbulan Sampah Plastik Sekali Pakai. Langkungan ring punika, program puniki wantah bagian sane nenten prasida kapasahang ring utsaha ngupapira miwah ngalestariang keagungan, kesucian, tur taksu jagat Bali sane kawangun antuk makudang-kudang wawidangan minakadi genah suci, sagara, danu, tukad, klebutan toya, gunung, alas, sarwa tumuwuh miwah wawidangan alam sane makanten tur sane nenten prasida kakantenang. "Parikrama puniki sampun anut ring visi Nangun Sat Kerthi Loka Bali, inggih punika ngemit kasucian wawidangan jagat Bali makamiwah sadagingnyane mangda ngawetuang kahuripan krama Bali sane rahajeng, bagia sekala (jasmani) miwah niskala (rohani)," baos dane.

Krama Bali sane atenga langkung magama Hindu sampun sapatutnyane ngamargiang ajaran Weda, sane silih sinunggilnyane nerangang majeng ring para umat mangda nenten ngentungang mis ngawag-ngawag. Malarapan saking paindikan punika, dane mituduhin majeng ring makasami krama mangda nguwah parilaksana. Sampunang, ngentungang mis ngawag-ngawag, ngiring sareng-sareng aktif ngamargiang edukasi utawi penyadaran indik mabuatnyane upaya ngemit wawidangan palemahan," teges dane.(Balitopnews.com/Amo Bali).       


TAGS :

Komentar