Koster Mapiteket Mangda Sareng Nukung Pikolih Pemilu, Sampunang Sareng-Sareng Demo

Balitopnews.com, Klungkung

Gubernur Bali Wayan Koster mituduhin makasami krama utawi elemen masyarakat, mustikannyane krama Bali mangda nukung KPU miwah pikolih panyumpuannyane indik Pemilihan Presiden miwah Legislatif  ring tanggal 22 (dua likur) Mei sane jagi rauh puniki. "Ngiring iraga sareng-sareng ngarastiti mangda pleno sane kamargiang olih KPU prasida mamargi becik tur antar, sampunang sangkaning ngetohin pilihan sane pada matiosan puniki ngaranayang persatuan bangsa miwah NKRI dados korban," baos Gubernur Koster ring sajeroning sambrama wacanan dane duk acara 'Merajut Kebersamaan dalam Bingkai NKRI' sane kamargiang olih Polda Bali magenah ring Lapangan Puputan Klungkung, Semarapura, Klungkung, dina Soma (20 Mei 2019) sore.

Ring sajeroning acara sane kamarggiang sapisanan ring pakeling Hari Kebangkitan Nasional miwah masa-masa panguntat tahapan pemilu punika, Gubernur Bali taler mikelingin yening wenten utsaha nolak pikolih pemilu tan kadulurin antuk pamargi sane manut konstitusi, tungkalikannnye katolak.      

Iraga ring Bali wantah kadadosang pinaka jadma sane paling inggil, magenah paling di ajeng  anggen ngaruruh persatuan miwah perdamaian, titiang mapangapti majeng ring makasami krama Bali sampunang sareng-sareng demo. Bali taler kasengguh pinaka tujuan wisatawan utawi toris ring sajebag jagat puniki, duaning punika kenyamanan miwah keamanan patut kainggilang," pangaptin dane Gubernur sane embas ring Desa Sembiran, Buleleng puniki. 

Koster taler mapikeling indik perdamaian miwah persatuan risampune wusan pemilu puniki prasida gelis kacihnayang ring Bali, tios ring nyingakin kawentenan pemilu ring Bali sane sampun mamargi antar miwah aman. "Suksema majeng ring Bapak Kapolda sane sampun ngarincikang acara sane ageng tur mautama pisan, di rahina miwah ring genah sane bersejarah puniki, ngiring iraga sobyahang sareng-sareng ke sejebag jagat Indonesia, komitmen iraga ring sajeroning ngarajegang dharma negara, berbangsa miwah bernegara," baos Koster.

Sajabaning punika, Kapolda Bali Irjen. Pol. Petrus R Golose nenten lali mapikeling majeng ring makasami stakeholder mangda sareng-sareng ngemit keamanan ring Bali risampune wusan pemilu. "Rahina mikelingin Hari Kebangkitan Nasional puniki dados cihna kebangkitan iraga anggen mawali maingkupan risampune wusan pemilu serentak," baos Kapolda Bali.

Antuk baos sane teges, dane taler mapikeling mangda nulak sahananing utsaha sane mapikahyun pacang ngusak-ngasik ideologi, dasar nyantos semboyan negara napimalih antuk alasan matiosan pilihan daweg pemilu. "Iraga sareng sami tresna ring Pulau Dewata, tresna ring NKRI. Punika makahawinan, napi kemanten pilihannyane, iraga maderbe tanggung jawab ngemit keamanan Bali miwah Indonesia. Iraga nenten wantah ngarajut, nanging mangda satata ngemit kukuhnyane NKRI," baos dane.

Acara puniki salanturnyane kadagingin antuk nguncarang puja pangastawa utawi doa sane kalintang hening olih panyolasan pinandita, buka puasa sinarengan, miwah karameang antuk makudang-kudang tontonan utawi hiburan sane kasanggra becik olih krama sami.

Tios ring Gubernur Koster lan Kapolda Bali, makanten rauh ring parikrama puniki inggih punika, Sekda Provinsi Bali Dewa Made Indra, Ketua MUDP Jro Gede Suwena Putus Upadesa, perwakilan Bupati/Wali Kota se-Bali, pemuka lintas agama, para tokoh masyarakat miwah jajaran Polda Bali. (Balitopnews.com / Amo Bali )  


TAGS :

Komentar