Putri Koster Nauhin Insan Media mangda Nyiatin Baya Narkoba miwah HIV/AIDS

  • 03 Juli 2019
  • 14:11 WITA
  • News

Balitopnews.com, Denpasar

Ketua TP PKK Provinsi Bali, Ibu Putri Suastini Koster nauhin utawi nyarengin makudang-kudang pihak pamekasnyane angga krama sami, inggian saking media cetak lan elektronik mangda sayan sumeken ngalimbakang kampanye indik baya narkoba miwah panglahlah pinyungkan HIV/AIDS. Duaning media maderbe peran sane dahat mabuat pisan ring sajeroning nyobyahang orti utawi informasi anggen ngawangun kesadaran krama/masyarakat.

 

Indik punika kasobyahang rikala Ibu Putri Koster nyanggra audiensi Gerakan Anti Narkoba Nasional (GANNAS) Bali sane kamanggalanin oleh ketuanyane, Yusdiana MY ring Jaya Sabha, Denpasar, (Buda, 3 Juli 2019).

 

Napimalih ring aab jagat mangkin, manut panarkannyane ring sajeroning ngawigunayang media/piranti pamekas media online sampun kalintang ngalimbak pisan, antuk punika utsaha malarapan sosialisasi ring media wantah silih sinunggil upaya sane paling efektif ngawangun kesadaran krama ring baya sane kawetuang olih narkoba miwah HIV/AIDS.

"Media wantah ujung tombak informasi ring krama/masyarakat, antuk punika media maderbe kawigunan utawi peran sane mabuat pisan sajeroning ngemit kesehatan krama miwah ngawangun rasa eling krama ring baya sane kawetuang olih narkoba lan HIV/AIDS. Ngiring iraga sareng sami mamargi, maupaya nyakupang tur nunggilang pamargi antuk rasa sane sumeken tur terus ring sajeroning nyiatin pangrabdan pinyakit punika, dadosnyane kapungkur Bali prasida bebas saking narkoba lan HIV/AIDS," baos dane nauhin.

 

Dukungan miwah peran serta makudang-kudang pihak puniki dahat kaperluang pisan, duaning panglimbak narkoba sampun wenten ring tingkat sane nyejehin pisan. Iwang pamargi ring sajeroning nganggen narkoba wantah wangun penjajahan sane wentuknyane tios, duaning pacang mapuara ngarusak tur munahang mental para yowana penerus bangsa.

 

Duaning punika, makudang-kudang utsaha anggen nulakang singsal pamargi nganggen narkoba puniki patut sayan kagietin malih utamannyane ring generasi millinial sane salanturnyane pacang dados tumpuan tur masa depan bangsa. "Saking narkoba pacang nularang HIV/AIDS majalaran antuk nganggen jaum suntik sinarengan. Indik punika dahating nyejehin pisan. Iraga patut mautsaha sareng-sareng, tunggil visi, tunggil tatujon, ngiring iraga nyiatin sareng-sareng narkoba miwah HIV/AIDS," baos dane negesang.

 

Sajabaning punika, Ketua GANNAS Bali Yusdiana MY maosang, GANNAS Bali wantah organisasi sane maderbe anggota saking elemen krama/masyarakat sane mautsaha giet pisan ngamargiang makudang-kudang upaya sajeroning nulakang panglimbak narkoba ring pantaraning krama. Silih sinunggil utsaha punika wantah ngamargiang sosialisasi ring makudang sekolah, karang taruna, miwah para orang tua/i rarama mapaiketan sajeroning metunyane baya laten narkoba.

 

Kapungkur wekas, pihaknyane mapangapti pacang ngamargiang sinergitas utawi kerjasama sareng pemerintah sane ritepengan puniki sareng TP PKK Provinsi Bali mangda mautsaha sareng-sareng ngawangun rasa eling krama ring baya ageng sane metu saking narkoba. Malaparan antuk kerjasama punika, pihaknyane mapangapti utsaha nulakang iwang parilaksana sajeroning ngangge narkoba prasida kalaksanayang antuk masif lan terpadu.

 

Nyawis indik punika, Ibu Putri Koster nyihnayang pamujinnyane tur dukungan dane ring kawentenan organisasi sane khusus maupaya anti ring narkoba punika. (Balitopnews.com / Amo Bali )   


TAGS :

Komentar