Putri Koster : Bidan Satmaka Duta Nibakang Tresna saking Hyang Widhi
- 06 Juli 2019
- 13:09 WITA
- News
Balitopnews.com, Denpasar
Ketua TP PKK Provinsi Bali Ibu Putri Suastini Koster mungkah acara Seminar Kesehatan Reproduksi Perempuan sane sinarengan ring dudonan parikrama Wanti Warsa Ikatan Bidan Indonesia (IBI) Bali sane kaping 68, magenah ring Kampus ITEKES, Renon, Denpasar, rahina aniscara (6 Juni 2019).
Ring sajeroning sambrama wacanan dane, Ibu Putri Suastini Koster maosang indik peran bidan ring pantaraning krama dahat mabuat pisan, napimalih majeng ring kesehatan ibu miwah anak. Bidan madue swadharma sane mabuat, ngawit saking ngarawat ibu rikala ngamargiang tur muar bobotan, ngawantu persalinan, sasampune persalinan, nyantos ngarawat sarana reproduksi anak istri. Bidan taler maderbe swadharma lan peran sane ageng sajeroning ngawasin panglimbak tuwuh anak anak, ngawit saking embas, ngicenin imunisasi nyantos ring panglimbak bayi utawi anak alit miwah kesehatannyane.
Duaning punika, kapungkur wekas IBI pinaka organsasi sane madruwe warga mawit saking para bidan kaaptiang mangda terus nincapang kaweruhan utawi kompetensi, profesionalisme miwah kualitas para anggota utawi wargannyane ring sajeroning utsaha ngaturang pelayanan kesehatan majeng ring krama/masyarakat.
"Bidan puniki patut kabaos pinaka duta utawi utusan kasih saking Ida Sang Hyang Widhi anggen ngarawat lan miara kesehatan paa ibu lan anak-anak. Duaning punika kawentenannyane pinih mabuat. Kapungkur utsahannyane sajeroning ngamargiang swadharma titiang tunas mangda terus katincapang, pamekas ring upaya ngemit tur nincapang bobot kesehatan mustikannyane majeng ring para istri/ibu lan putra-putrinnyane," baos Ibu Putri Koster.
Tios ring punika, rabin sang sane nyakra werthi jagat Bali puniki taler mapangapti mangda warga/anggota IBI Bali nincapang sosialisasi ring pantaraning krama indik baya sane kawetuang olih narkoba lan HIV/AIDS.
Iwang migunayang narkoba lan panglahlah pinungkan HIV/AID sampun dados silih sinunggil wentuk penjajahan sane anyar. Duaning narkoba prasida ngarusak mental lan fisik generasi penerus bangsa, lian ring punika pamekasnyane ring HIV/AIDS sang sane keni pinungkan punika sampun akeh ring kelompok ibu rumah tangga, saantukan kalahlahin olih suami utawi somahipun sane maparilaksana kaon inggih punika sering tukar-tukar pasangan.
Duaning kadi asapunika, idan kaaptiang prasida nincapang edukasi utawi pangweruh majeng ring krama matatujon anggen ngicenin orti tur pangweruh indik baya sane kawetuang olih narkoba lan HIV/AIDS pinaka utsaha nincapang sajeroning pencegahan utawi nolah panglahlahnyane.
"Ngiring sareng-sareng, inggian saking IBI, PKK miwah stakeholder sane tiosan, ngiring iraga sinarengan. Ngiring iraga kemit miwah peliara generasi emas bangsa iraga ring baya narkoba lan HIV/AIDS. Ngiring iraga kemit miwah peliara para istri/ibu miwah para oka utawi putraputrin iraga mangda kesehatan ipun sami tetep becik," baos dane ngajakin.
Sajabaning punika, Kepala Dinas Kesehatan Provinsi Bali I Ketut Suarjaya ring sajeroning sambrama wacanan dane nyobyahang inggian peran bidan ring Bali dahat mabuat sajeroning upaya ngirangin angka kematian ibu melahirkan lan i anak.
Duaning punika, kapungkur para bidan kaaptiang mangda terus nincapang kompetensi miwah kaweruhan raga mangda prasida ngarepin pakibeh ring aab jagat sane mangkin sakadi panglimbak teknologi lan ilmu kesehatan sane terus nincap.
Sajabaning seminar, parikrama puniki taler kadudonin antuk acara pangukuhan pengurus IBI Bali periode 2018-2023 miwah perayaan Wanti Warsa IBI Bali sake kaping 68 sane kacihnayang antuk penugelan tumpeng. (Balitopnews.com / Amo Bali )
Komentar