Nguripang Ekonomi Kerakyatan, Gubernur Koster Mapangapti BPD Nukung Pemberdayaan UMKM
- 24 Agustus 2019
- 08:04 WITA
- News
Balitopnews.com, Denpasar
Gubernur Bali Wayan Koster ngicenin sambrama wacana sapisanan mungkah acara Seminar Nasional Peran Bank Pembangunan Daerah (BPD) Sajebag Indonesia Ring Sajeroning Nincapang Perekonomian ring Daerah Malarapan Antuk Pemberdayaan UMKM ring Hotel Hyatt Regency, Sanur, Denpasar, rahina Sukra (23 Agustus 2019).
Ring sajeroning sambrama wacanananyane Gubernur Koster mapinunas majeng ring para pamilet seminar sane mawit saking direksi lan komisaris BPD sajebag Indonesia puniki maosang indik makudang-kudang pangrancana sane konkret anggen nincapang kemajuan BPD.
Gubernur Bali Wayan Koster nyihnayang pamujinnyane duaning ring sajeroning acara pamungkah seminar nasional puniki para pamilet nganggen destar khas Bali. "Dadosnyane sampun molihang dampak ring pengrajin rakyat sane memproduksi udeng utawi destar puniki," baosnyane.
Mantan Anggota DPR RI puniki maosang malarapan antuk kebijakan nganggen busana adat Bali sane sampun kasungkemin punika gumanti sampun mikolihang dampak majeng ring industri kerajinan busana adat Bali.
Dane maosang saking mawit aturan punika kamargiang omzet utawi pikolih para perajin sayan nincap nyantos 30 persen lan omzet pedagang tumbuh nyantos 35 persen. "Tur punika wantah (ekonomi-red) kerakyatan. UMKM tumbuh antuk busana adat Bali. Nanging sujatinnyane tatujon riin wantah nincapang kebanggaan, rasa tresna majeng ring identitas busana Bali pinaka bagian saking budaya. Kasujatiannyane saking widang ekonomi ngicenin kawigunan," baos Ketua DPD PDIP Provinsi Bali puniki.
Dane maosang silih sinunggil fungsi strategis sane kamargiang olih BPD wantah nincapang lan ngawerdiang kekuatan UMKM ring daerah soang-soang.
Sajabaning 150 diri Komisaris lan Direksi BPD se-Indonesia, parikrama puniki taler karauhin olih Dirjen Bina Keuangan Daerah Kementerian Dalam Negeri Drs. Syarifudin MM, Kordinator Pengawas Lembaga Jasa Keuangan Wilayah Barat Otoritas Jasa Keuangan Lukdir Gultom miwah Ketua Umum Asosiasi Bank Daerah (Asbanda) Dr. Supriyatno miwah pejabat bidang keuangan sane tiosan. (Balitopnews.com/Amo Bali).
Komentar