Gubernur Koster Mapangapti 60 Persen Krama Bali Siaga Ngambil Pakaryan Mamacul

  • 19 Oktober 2019
  • 18:53 WITA
  • News

Balitopnews.com, Denpasar

Gubernur Bali Wayan Koster nyobyahang, silih sinunggil kebijakan sane sedeng kasusun pihaknyane ri tepengan mangkin inggih punika ngutamayang sektor pangan. "Visi titiang inggih punika ngawigunayang saking hulu nyantos ke tepen/hilir, tur titiang dahat merluang pisan kawagedan para sujana utawi para wagri ring sajeroning pangan mangda prasida nangiang punika," baos Gubernur Koster ring acara gala dinner miwah malam kesenian 16th Asian Food Conference 2019, magenah ring Jayasabha, Denpasar, rahina Wrehaspati wengi (17 Oktober 2019).

Dane nyobyahang, salami puniki kebijakan pemerintah akeh sane kapusatang ring hulu. "Nanging risampune wenten hasil, nenten katitenin becik. Musim jeruk, manggis, anggur, pangargannyane rikala kaadol 'jatuh' pisan. Petani kirang polih kasukertan. Pikobet puniki patut katitenin lengkap tur becik," baos anak lanang sane embas ring Sembiran, Kabupaten Buleleng punika.

Dane ngalanturang, kebijakan sane kasurat sajeroning Pergub 99 warsa 2018 ngeninin indik pemanfaatan miwah migunayang hasil pertanian, perlu kadukung olih para wagmi/sujana. "Iraga perlu akeh mabligbagan tur magendu wirasa sareng para wagmi pangan anggen nincapang industri pengelolaan pangan miwah ngariptayang sentra-sentra pengolahan pangan," baosnyane.

Gubernur Koster taler nalatarang, pikenoh utawi sumbangsih saking widang pertanian miwah pangan wawu ring angka 14,5 persen saking total pendapatan Bali, saihang ring sektor pariwisata sane sampun wenten ring angka 69 persen. "Kedeh manah titiang ngentosin parindikan puniki, mangda nenten timpang. Nilai tukar hasil komoditi patani kantun alit pisan. Perlu hilirisasi pertanian anggen ngalimbakang sektor pangan ring Bali," baosnyane ngalimbakang.

Mapaiketan ring punika, Gubernur Koster maosang pacang ngulemin para sujana/wagmi mangda sareng-sareng maosang miwah ngarerehang solusi. "Saka kidik iraga pacang menggeser ketergantungan ring sektor pariwisata nuju ke sektor primer inggian punika ring widang pertanian. Mapaiketan ring punika, 4,2 juta penduduk/krama Bali, 60 persennyane kaaptiang mangda ngambil pakaryan pinaka petani/mamacul, dadosnyane maderbe dasar ekonomi anggen kapungkur wekas," baos Gubernur sane taler pinaka Ketua DPD PDI Perjuangan Bali.

Tios ring punika, Prof Umar Santoso, Presiden The Federation of the Institute of Food Science and Technology in ASEAN (FIFSTA) maosang, pihaknyane sane taler ngangganin perhimpunan ahli pangan Indonesia, ngaturang pamuji sane ageng majeng ring acara gala dinner sane kalaksanayang olih Gubernur Bali. "Titiang mapangapti prasida ngamolihang akeh kawigunan ring sajeroning ngamargiang konfrensi ring Bali," baosnyane.

Parikrama sane kamargiang antuk akeh dudonan puniki kakawitin saking workshop nyantos kompetisi pantaraning mahasisya suennyane 3 dina ring Bali puniki, baos Prof Santoso, kamargiang olih pihaknyane kasarengin olih Fakultas Teknologi Pertanian Universitas Udayana (Unud).

Ring sajeroning acara punika, Prof Umar maosang siaga jagi ngawantu miwah nukung program gubernur mangda prasida ngukuhang widang pertanian miwah pangan kakawitin saking pasca panen, gizi, widang pengolahan nyantos distribusi pangan. "Kebeneng pisan anggota titiang akehan mawit saking widang teknologi pertanian miwah pangan. Anggota titiang siaga pacang nukung tur icen titiang ngawantu sawates sane prasida wantu titiang," baos Prof. Santoso, antuk suara sane banban.

Ring sajeroning parikrama punika, sajabaing ngawentenang sasolahan tari saking para seniman yowana SMKN 5 Denpasar, taler nenten luput Ny. Putri Suastini Koster ngawacen puisi sane mamudra 'Sumpah Kumbakarna'. Sakadi biasannyane, pendamping sang sane ngawerat ring Bali puniki prasida nultul pikahyunan para penonton malarapan antuk 'penghayatan' miwah 'pendalaman' puisi sane katangiang saking carita Ramayana punika. (Balitopnews.com/MD/Amo Bali)   


TAGS :

Komentar