Purnama Kalima, Gubernur Bali Ngalinggatanganin Pergub Bali Energi Bersih miwah Penggunaan KBL
- 12 November 2019
- 22:03 WITA
- News
Balitopnews.com, Denpasar
Sinarengan ring Purnama Kalima, Gubernur Bali Wayan Koster ngalinggatanganin kalih Peraturan Gubernur soang-soang Pergub nomor 45 warsa 2019 indik Bali Energi Bersih miwah Pergub nomor 48 warsa 2019 indik Penggunaan Kendaraan Bermotor Listrik (KBL) Berbasis Baterai.
Parikrama ngalinggatanganin kalih Peraturan Gubernur puniki kamargiang ring Gedung Gajah, Rumah Jabatan Gubernur Bali, Jayasabha, Denpasar, rahina Anggara (2 November 2019).
Gubernur Koster maosang makakalih Peraturan Gubernur punika wantah cihna sane nyata sajeroning nguningayang indik sumekennyane Pemerintah Provinsi Bali sajeroning ngamargiang Visi "Nangun Sat Kerthi Loka Bali" malarapa antuk Pola Pembangunan Semesta Berencana nuju Bali Era Baru. Sane madrue kasukseman "Ngemit Kasucian miwah Keharmonisan Alam Bali miwah sadagingipun, Anggen Ngamolihang Kahuripan Krama Bali sane Sukerta miwah Bagia, Sakala-Niskala, Nuju Kahuripan Krama miwah Gumi Bali manut ring Prinsip Tri Sakti Bung Karno. Berdaulat ring Politik, Berdikari ring Ekonomi, miwah Madue Kepribadian sajeroning Kebudayaan Malarapan Pawangunan sane Terpola, Menyeluruh, Terencana, Terarah miwah Terintegrasi sajeroning Bingkai Negara Kesatuan Republik Indonesia Manut ring Nilai-nilai Pancasila 1 Juni 1945. "Makakalih Peraturan Gubernur puniki pacang ngawe gelis utsaha sane margiang iraga sareng-sareng anggen ngemit miwah ngabecikang alam utawi palemahan Bali rauhing sadagingipun," baos Gubernur Koster nalatarang.
Gubernur Koster ngawewehin, Peraturan Gubernur Nomor 45 Indik Bali Energi Bersih kasusun antuk 11 Bab miwah 33 Pasal antuk semangat utama inggih punika mastikayang pemenuhan makasami kebutuhan energi ring Bali secara mandiri, ramah lingkungan, miwah berkelanjutan, miwah berkeadilan antuk nganggen Energi Bersih. "Indik ngediang, pemanfaatan, miwah pengembangan Energi Bersih Terbarukan utawi sane anyar puniki inggih punika marupa Sinar Matanai, Tenaga Air, Angin, Panas Bumi, Biomassa, Biogas, Mis ring kota/desa, Gerakan miwah Pebaruan Suhu Lapisan Sagara/Samudra, miwah Bahan Bakar Nabati Cair," baos Gubernur Koster.
Kasobyahang taler olih dane, Peraturan Gubernur puniki taler ngatur indik utsaha ngalimbakang Bangunan Hijau, wawangunan sane maderbe keseimbangan pantaraning energi sane kawetuang sareng energi sane kaanggen (zero energy building). Wawangunan hijau sane jagi kalimbakang inggih punika maderbe karakter tropis miwah anut ring arsitektur tradisional Bali. ajabaning punika, desain utawi tata letak wawangunan sane ngawigunayang sinar utawi cayan surya sane penuh utawi optimal; ngawigunayang material wawangunan sane ramah lingkungan, alat kelistrikan miwah transportasi ring gedung sane hemat utawi inih ring listrik, sistem PLTS (Pembangkit Listrik Tenaga Surya) saking Atap miwah/utawi ngawigunayang teknologi surya sane tiosan; efisiensi Sumber Daya Air/Toya miwah nganggen piranti saniter sane inih ring toya, miwah ngelola mis miwah toya limbah manut ring prosedur.
Gubernur Koster negesang, Ngalimbakang Wawangunan Hijau puniki pacang katerapang ring Wawangunan Pemerintah Pusat miwah Daerah, miwah Wawangunan Komersial, Industri, Sosial, miwah Rumah Tangga antuk jimbar lantai langkung ring 500 meter persegi. "Pemasangan/ngenang PLTS ring atap miwah/utawi ngawigunayang teknologi surya sane tiosang ring wawangunan-wawangunan punika pacang kamargiang ring galah sane nenten janten, ngawit saking 2021 nyantos 2024," baos Gubernur Koster.
Nanging ring sajeroning wawangunan industri, komersial, miwah mall antuk jimbar lantai langkung ring 1000 (siu) meter persegi; wawangunan resort antuk jimbar lahan langkung ring 3000 (tigang tali) meter persegi, miwah wawangunan hotel bintang 4 (pat) miwah langkungan saking irika ngangge listrik sane mawit saking Energi Bersih sane kawigunayang proposional polih tarif listrik khusus/tarif hijau saking pelaku usaha kelistrikan.
"Pelaku Usaha Ketenagalistrikan patut ngamargiang konversi pembangkit listrik sane mawit saking bahan bakar batubara miwah/utawi bahan bakar minyak/lengis nuju ring pembangkit listrik energi bersih. Konversi kamargiang mapaiketan ring galah sane sampun kacumpunin olih Pelaku Usaha Kelistrikan sareng Pemerintah Daerah miwah/utawi paling sue manut ring yusan ekonomi pembangkit listrik punika," baos Gubernur Koster.
Tios ring punika, Peraturan Gubernur Nomor 48 warsa 2019 Indik Penggunaan Kendaraan Bermotor Listrik (KBL) madasar antuk baterai kawangun antuk 17 Bab miwah 25 pasal. Manut Gubernur Koster, kebijakan ngawigunayang KBL Madasar antuk Baterai inggian punika tatujonnyane anggen ngemit kelestarian wawidangan alam Bali miwah meminimalisir kerusakan situs tetamian budaya miwah bangunan suci keagamaan ring Bali, nukung program pemerintah sajeroning efisiensi energi miwah ngirangin polusi ring widang transportasi, miwah nukung kesiapan infrastruktur kendaraan listrik ring Bali anggen ngelisang peralihan saking kendaraan sane mawit saking bahan bakar minyak fosil nuju KBL Madasar antuk Baterai.
Gubernur Koster negesang, siasat sane kamargiang sajeroning ngelisin ngawigunayang KBL sane madasar antuk Baterai kalaksanayang malantaran antuk kewajiban ngengge KBL sane madasar antuk baterai ring instansi pemerintah, otorita pengelola kawasan, BUMN/BUMD, miwah perusahaan sane 'bergerak' ring widang angkutan umum antuk utsaha sane alon-alon. "Kewajiban majeng ring industri KBL sane madasar antuk baterai miwah utsaha pendukungnyane anggen ngangge konten lokal, ngicenin intensif majeng ring sane nuenang lan/utawi sane ngangge KBL madasar saking baterai, ngicenin intensif majeng ring industri sane magenah ring daerah mangda memproduksi utawi ngarakit KBL madasar saking baterai miwah utsaha pendukungnyane," baos Gubernur Koster nyantenang.
Pinaka utsaha ngendaliang penggunaan kendaraan bermotor sane ngangge bahan bakar minyak fosil mangda bertahap nganutin kaperluan, kesiapan sarana miwah prasarana nganutin Peraturan Perundang-undangan. Kapungkur jagi kawentuk komite percepatan ngangge KBL sane Madasar antuk Baterai, miwah Penetapan Zona penggunaan KBL sane Madasar antuk Baterai ring daerah-daerah pinaka tatujon wisata utama. "Kampanye nganggen KBL sane madasar antuk baterai katujuang majeng ring kelompok pelajar miwah generasi muda pinaka sang sane jagi ngawigunayang KB sane madasar antuk baterai kapungkur wekas," baos Gubernur Koster. (Balitopnews.com/DW/Hms).
Komentar