Nampi Pangrauh Dubes Swiss, Gubernur Koster Mapikahyun Jagi Ngalimbakang Industri Jam ring Bali
- 05 Desember 2019
- 09:05 WITA
- News
Balitopnews.com, Denpasar - Gubernur Bali Wayan Koster nyanggra pangrauh Duta Besar Swiss Kurt Kunz ring Ruang Tamu Gubernur Bali, Kantor Gubernur Bali, rahina Buda (4 November 2019). Patemuan puniki mligbagang gatra anyar ngeninin indik ekonomi, lingkungan, pariwisata, miwah pawangunan Bali kapungkur wekas.
Duta Besar Swiss Kurt Kunz maosang, nyabran warsa kirang langkung 700 tali wisatawan Swiss rauh ke Indonesia sane alebih langkung rauh ka Bali. Sajabaning punika, nenten kidik krama Swiss sane nongos ring Bali. "Wenten kirang langkung 520 jadma krama Swiss sane jenek ring Bali," baos Kunz.
Ipun makasami terjun ring makudang-kudang widang sakadi ring pendidikan, pariwisata, kuliner, miwah lingkungan. Punika makahawinan Dubes Kunz ngulengang uratiannyane ring sajeroning kenyamanan miwah keamanan wisatawan Swiss ring Bali.
Dubes Kunz taler ngicenin makudang masukan ring widang pariwisata sakadi ngeninin indik layanan imigrasi, karesikan, miwah lalu lintas. Dane nyanggra becik utsaha-utsaha sane kamargiag olih Gubernur Bali Wayan Koster sajeroning nitenin pawangunan ring Bali. "Budaya miwah lingkungan dahat mabuat majeng ring krama lokal. Puniki anggen modal sane patut kakemit olih Bali," baos Dubes Kunz sinambi ngaturang pamuji ring sajeroning kebijakan Pemprov Bali sane ngalimbakang energi bersih miwah pertanian organik.
Dane mapangapti paiketan Swiss sareng Indonesia, sareng Bali pamekas, mangda mamargi sayan becik, utamannyane ring widang ekonomi, lingkungan, mmiwah pariwisata.
Ring galah puniki Gubernur Bali Wayan Koster maosang indik arah tur tatujon pawangunan Bali kapungkur wekas, antuk visi Nangun Sat Kerthi Loka Bali pinaka utsaha inggian punika silih sinunggilnyane nitenin widang pariwisata, ngemit kearifan lokal, miwah ngemit wawidangan alam. "Majeng ring alam sane resik utawi bersih puniki, titiang jagi ngamargiang sistem pertanian organik, sane prasida ngirangin zat kimia ring tanah, duaning punika nenten nyantos nyemerin wawidangan lingkungan. Taler sampun titiang desain antuk Pergub sane nerapang kebijakan Bali energi bersih," baos Ketua DPD PDIP Provinsi Bali puniki.
Mapaiketan ring keamanan wisatawan, Gubernur maosang Bali maderbe Badan Penanggulangan Bencana Daerah sane siaga ngarepin utawi mengantisipasi panca bayane sane gumanti prasida rauh. "Pelaku pariwisata sampun taler siaga," baosnyane.
Pinaka utsaha anggen ngalimbakan ekonomi kreatif ring Bali, Gubernur mapangapti mangda Bali prasida malajah saking Swiss sajeroning anggen ngalimbakan industri jam tangan. "Jadma Bali maderbe ketrampilan utawi kawagedan sajeroning ngawigunayang tangannyane sane becik tur pascat ngaryanin desain," baos dane. Dane mapangapti inggian desain sane kakaryanin olih jadma Bali pastika nyangkepin pengalaman lan teknologi sane kadruenang olih Swiss sajeroning ngaryanin jam tangan.
Dubes Kunz nyanggra becik indike puniki. Manut dane, Bali maderbe desain sane unik tur sane pepes ngawe kadaut manah para desainer ring makudang-kudang panagara ring dunia puniki.
Rauh taler ring acara puniki inggih punika, Konsul Kehormatan Swiss ring Baku Gerhard L. Nutz, Kepala Biro Pemerintahan Setda Provinsi Bali Ketut Sukra Nagara, miwah Kepala Biro Administrasi Pembangunan Setda Provinsi Bali Tjok Bagus Pamayun. (Balitopnews.com/DW/Rls).
Komentar