Sekda Dewa Indra Negesan Virus Corona Durung Ngeranjing ke Bali
- 27 Januari 2020
- 00:00 WITA
- News
Balitopnews.com, Denpasar - Midabdabin kagresyuhan antuk pangelimbak virus corona, Pemerintah Provinsi Bali ngawentenan parum maosan indik pemargi nambakin panyungkan sane kapertama kapangguh ring Kota Wuhan, Tiongkok punika. Parum sane kapimpin Sekda Provinsi Bali Dewa Made Indra ring Ruang Praja Sabha Kantor Gubernur Bali, Soma (27 January 2020) karauhin saking unsur kesehatan kabupaten/kota, pariwisata, keamanan lan Kantor Kesehatan Pelabuhan (KKP) pinaka sane paling ajeng medue tugas ngadeteksi wisatawan sane ngeranjing ke Bali.
Ring galah punika, Dewa Indra sane kaabih Kadis Kesehatan Provinsi Bali dr. Ketut Suarjana negesan kantos mangkin virus corona durung kajantenan ngeranjing ke Bali. Dane ngangken sungsut antuk amyugne orti sane nyobyahan kawentenan pasien suspect corona.
“Puniki mangda kakresepin sinareng sami, sampunan ngawag maosan suspect. Santukan saking medis yening maosan suspect patutne wenten kriteria-kriteria sane kaanutin. Tiosan taler wenten cihna fisik marupa angga anget, dekah, pilek, kolongan ten becik lan pneumonia. Sane patut kaucap keni suspect corona yening polih lunga ke China utawi wewidangan panegara sane kalalahin antuk galah 14 dina sedurung medal cihna. Tiosan malih sang kaucap polih reket sareng kasus terkonfirmasi corona utawi ngerauhin fasilitas kesehatan ring panegara sane kainfeksi corona," baosne
Dane ngelanturan, yadiastun kantos mangkin virus anyar sane makode 2019-nCoV during kajantenan ngeranjing ke Bali, sakemaon dane tetep nyayagayang pemargi lan parilaksana midabdabin manut sekadi SOP sane sampun kasumgkemin olih Kementerian Kesehatan.
Mangkin wenten rumah sakit-rumah sakit rujukan jagi midabdabin corona inggih punika RSUP Sanglah, RS Sanjiwani Gianyar dan Rumah Sakit Tabanan. Sekda Dewa Indra taler nyobyahan indik sungsut dane antuk kawentenan virus anyar sane pungkuran puniki dados orti dunia internasional. Majenga Bali, kawentenan panyungkan puniki nenten wantah ngerauhang nyapnyap saking pah-pahan kesehatan, nanging taler ngelimbak kantos sektor pariwisata.
Munggwing asapunika Dewa Indra negesan dahat mabuat pisan nincapne pulah palih nambakin mangda penyungkan puniki nenten kantos ngeranjing ke Bali. "Ngiring tincapan jagra ring genah-genah ngeranjing sekadi bandara lan pelabuhan," baosne. Tiosan malih, dane ngaptiang kauratian media mangda nyurat warta kasus puniki adung. Mangda orti nenten ngangsan amyug, Sekda Dewa Indra ngajodi Kadis Kesehatan Bali Ketut Suarjaya pinaka juru raos sane wenang ngicen informasi inucap.
Raris Kadiskes Bali dr. Ketut Suarjaya nyobyahang situasi global virus corona kantos pinanggal 25 Januari 2020 makehne 1.320 lan sampun ngelimbak ring panegara China, Thailand, Jepang, Korea Selatan, Singapura, Vietnam, Australia, Nepal, Perancis lan Amerika Serikat.
"Makasami kasus punika kasurat naenin lunga ke Wuhan. Semalihne pungkuran kasus puniki ngangsan nincap. Wengine dibi sampun ngelalah rong 2019 diri lan ring 14 panegara,” dane ngawewehin.
Suarjaya maosan, kantos mangkin durung wenten vaksin anggen virus corona santukan kajantenan anyar lan rauhne ring warsa 2019. "Tetamban sane kemargian sifat nyane supportif manut sareng cihna sane wenten," ucap dane.
Munggwing asapunika, pidabdab nepis dados mabuat pisan lan patut katincapan. Antuk pengapti punika, KKP Kelas I Denpasar samun nyayagayang thermal scanner ring bandara lan pelabuhan. Pemargi punika kalaksanayang santukan penyungkan inucap wau kapertama kapangguh ring Kota Wuhan, Tiongkok. (Balitopnews.com/ngr/rls)
Komentar