Gubernur Koster Nangian PSMTI Bali Mangda Masikian Ngewangun Bali
- 02 Februari 2020
- 06:02 WITA
- News
Balitopnews.com, DENPASAR - Gubernur Bali Wayan Koster kaabih Ny.Putri Koster miwah Wakil Gubernur Bali Tjokorda Oka Artha Ardana Sukawati ngerauhin Perayaan Tahun Baru Imlek 2571 sareng Paguyuban Sosial Marga Tionghoa Indonesia (PSMTI) Bali ring Hongkong Garden Restaurant, Denpasar, ring rahina Saniscara (1 February 2020) wengi.
Duk mapidarta, Gubernur Koster nyumbungan antuk reket pasemetonan sane sampun memargi becik. Gubernur ngaptian mangda paguyuban puniki presida setata masikian, ngadunga pemargi lan sareng-sareng ngewangun Bali manut visi Nangun Sat Kerthi Loka Bali.
"Sapunapi antuk mangda paguyuban puniki igum, masikian lan sampunan kantos enyag. Antuk reket lan masikian, titiang ngaptian pacang presida sareng-sareng ngewangun Bali nyujur kasukerthan manut swadharma suwang-suwang krama paguyuban," baosne.
Gubernur Koster sane taler Ketua DPD PDI Perjuangan Bali puniki taler ngaptian mangda paguyuban nyarengin jagra pasikian miwah sareng-sareng nyujur kasutreptian Bali. Santukan dados pinaka destinasi pariwisata jagat, Bali pastika dados bebalihan lan yeninh wenten pemargi kaon pacang gelis amyug ring wewidangan internasional. Pastika indik puniki pacang ngerauhan indik tan becik ring sektor pariwisata Bali.
"Paguyuban puniki boya ekslusifitas. Munggwing asapunika, titiang ngaptian mangda presida masikian lan rukun. Pungkuran taler titiang ngaptian kerukunan ngangsan kukuh, iraga megotong royong nyujur visi mangda sami ngemangguh kasukerthan," teges dane.
Perayaan Tahun Baru Imlek 2571 sane malelampahan "Dengan Semangat Baru Kita Rajut Kebhinnekaan dan Perkokoh Persatuan" taler kadagingin antuk pelantikan pengurus PSMTI Bali periode 2019-2023 miwah ngewacen puisi Sumpah Kumbakarna sane ngulangunin olih Ny.Putri Koster.
Parikrama sane taler kadagingin antuk sasolahan musik, igel-igelan miwah bebalihan kembang api puniki taler karauhin olih Ketua Umum Forum Kerukunan Umat Beragama sane apisanan dados Bendesa Agung Majelis Desa Adat Provinsi Bali Ida Penglingsir Agung Putra Sukahet, Ketua PSMTI Bali miwah krama PSMTI.(Balitopnews.com/mgr/rls)
Komentar