Gubernur Koster : Bali Dahat Sayaga Nyanggra Sapangrauh Wisatawan Duranegara
- 03 Februari 2020
- 03:02 WITA
- News
Balitopnews.com, DENPASAR - Gubernur Bali Wayan Koster nguningan yadiastun wenten wabah Virus Corona sane ngelimbak ring jagate, Bali dahat sayaga nyanggra sapangrauh wisatawan duranegara. Santukan Bali medue sistem monitoring sane becik, sane sampun kauji saking amyugne kasus Flu Burung (SARS) duk warsa 2003 nguni.
Indik punika kauningan olih Gubernur Bali disampun puput ngemimpin parum koordinasi indik pulah palih muputang kawentenan Virus Corona majeng pariwisata Bali, ring Jayasabha, Rumah Jabatan Gubernur Bali, Soma (3 Februari 2020).
Gubernur sane kaabih olih Wakil Gubernur Tjok Artha Adhana Sukawati ring parum sane karauhin komponen-komponen pariwisata sekadi Angkasa Pura Bali, Otoritas Bandara, Balai Karantina, lan sane tiosan malih maosan, Bali dahat trepti lan nenten wenten wisatawan sane kasengguh kalalahin Virus Corona.
Bebaosan Gubernur sane dahat pastika kakukuhin antuk data, sekadi sane kasaduan olih Kepala Dinas Kesehatan Provinsi Bali. Saking 73.073 wisatawan mawit RRT sane rauh ke Bali saking pinanggal 13 Januari 2020 kantos mangkin, wenten sane kasengguh sungkan makeh nyane 18 diri. Disampunne katureksa lan kauji laboratorium maka sami nenten mabukti kalalahin antuk Virus Corona.
“Bali dahat sutrepti lan dahat sayaga nyanggra sapangrauh wisatawan saking duranegara, antuk produk pariwisata sane prima miwah ngesor antuk budaya maceciri Bali. Nenten wenten sane ngeranayang wisatawan jejeh rauh ke Bali,” teges Gubernur Koster.
Bali, pinaka genah mautama pariwisata kelas dunia janten mabukti trepti lan raharja miwah sampun ping 13 ngamolihan predikat pinaka The Best Island Destination saking Majalah Conde de Nash miwah ngamolihan makudang-kudang awards saking lembaga-lembaga internasional, sekadi PATA, WTTC lan UNWTO.
Data saking Dinas Pariwisata Provinsi Bali nyihnayang Wisman RRT pinaka kaping kapih saking makeh sapangrauh ke Bali disampun Australia. Saking 6,3 yuta wisman sane rauh ke Bali ring warsa 2019, 1.185.519 diri (18,2 %) pinaka wisman saking RRT. Data warsa 2019 nyihnayang panegara-panegara sane pinaka sapangrauh utama wisman ke Bali inggih punika India (374.784 diri), Inggris (287.577 diri), Amerika (277.391diri) lan Jepang (258.142 diri). (Balitopnews.com/ngr/rls)
Komentar