Nampa Sapangrauh Walikota Misato Jepang, Gubernur Bali Wayan Koster Ngedukung Pemargi Sister City
- 09 Februari 2020
- 22:02 WITA
- News
Balitopnews.com, DENPASAR – Gubernur Bali Wayan Koster nampa sapangrauh Walikota Misato, Jepang Takashi Kado ring Rumah Dinas Jaya Sabha, Denpasar, Soma (10 Februari 2020). Ring galah punika Gubernur Bali Wayan Koster ngaptian pemargi kerja sama sane sampun memargi makakalih minakadi Kota Misato lan Desa Mas Ubud Bali mangda ngangsan katincapan.
Walikota Takashi Kado maosan pakilitan Indonesia sareng Jepang dahat reket. Dane nguningan, ring Bali kerjasama Sister City sareng Kota Misato memargi sareng Desa Mas Ubud Gianyar.
"Kerjasama sane memargi ring teruna teruni Desa Mas kabuktiang antuk kakirimne ke Jepang sane matetujon mekarya lan melajah. Kenten taler krama Jepang rauh ke Desa Mas,” teges dane.
Dane raris ngaptiang mangda kerjasama sane becik puniki presida kalanturang. Takashi Kado ngawewehin, ring Kota Misato pacang kakembangan pariwisata antuk ngawentenang fasilitas-fasilitas sekadi hotel. Dane ngaptian Bali presida ngerauhan tenaga kerja ring wewidangan pariwisata ke Misato. Taler mangda prasida melajah kebudayaan lan pendidikan Bali lan Misato.
"Ring gumin titiange kramane kantun kedik, titiang nunas Desa Mas utawi krama Bali ledang jumenek utawi melajah derika. Warsa puniki wenten kalih diri sane melajah memacul ring Misato,” dane ngawewehin.
Kategesan, dumun krama ring Misato makeh, mangkin ngangsan kedik santukan makeh sane ngungsi ke kota tiosan.
“Dane mekarya ke kota tiosan lan nenten malih mewali. Yening presida krama Bali presida rauh utawi meneng ring Misato. Derika kakembangan bidang kesehatan, pertanian lan pariwisata,” baosne malih.
Takasi Kado malih ngawewehin, kawentenan ring kota Misato sekadi ring Ubud.
"Titiang ngaptian mangda presida wenten sekadi Ubud ring gumin titiange. Titiang ngemangguh kaluwihan Ubud ring sisi tukad sane dahat becik lan titiang dahat sering rauh ke Ubud," ucap dane. Kabaosan ring Misato taler wenten pura sane kaloktah maparab Pura Kagura."Wenten sane pateh Misato sareng Bali lan titiang ngemangguh kebudayaan titiang newek ring Bali,” baosne.
Ngawit dados pejabat pinaka walikota Misato, ring kantorne taler kejangkepin ukiran Bali lan sekantun dane dados pejabat pacang mekarya sinalih tunggil indik Bali ring Misato. Takasi Kado nguningan, Bali dahat ngulangunin utamane indik kebudayaan Bali lan kawentenan makeh khayangan miwah kramane saling rungu. "Titiang nyingak kemanten sampun puas. Sasolahan lan tetabuhan miwah seni dahat ngulangunin. Pengaptin titiang pungkuran Bali lan Misato kamunggahan ring sejarah. Krama ring Misato presida uning Bali yadiastun durung naenin rauh ke Bali,” dane nyineb.
Indik asapunika Gubernur Bali raris ngaturang suksema antuk sapangrauh Walikota Misato ke Bali. Dane nguningan kerjasama sane sampun memargi becik, utamane sareng Desa Mas. Gubernur Koster nunas mangda kerjasama presida katincapan lan Pemerintah Provinsi Bali sayaga ngdukung miwah ngawentenang fasilitasne. Gubernur Koster maosan Bali lan Jepang wenten sane pateh saking sisi kebudayaan.
“Suksema antuk sapangrauhne. Kerjasama sane sampun memargi suwe sampun becik. Kerjasama puniki dahat mawiguna majeng krama Bali utamane ring Desa Mas. Titiang dahat seneng antuk kawentenan punika," teges Gubernur Koster.
Pemerintah Provinsi Bali baos Gubenur Koster setata nincapan kerjasama sane sampun memargi becik lan sayaga mangda ngangsan reket. Desa Mas medue potensi wisata dahat becik.
“Kebudayaan Bali lan Jepang makeh sane pateh. Iraga pacang ngawentenang parikrama Bali World Culture Celebration ring sasih November. Titiang ngaptiang kota Misato presida nyarengin acare punika," Gubernur Koster nyineb. (Balitopnews.com/md/rls)
Komentar