Gubernur Bali Wayan Koster : Bali Satya Ngelaksanayang Pilkada Demokratis Antuk Pamilet Sane Ageng
- 27 Februari 2020
- 06:02 WITA
- News
Balitopnews.com, BADUNG – Gubernur Bali Wayan Koster negesan Pemerintah Provinsi Bali kasarengin stakeholder sampun satya jagi ngelaksanayang pilkada sane becik, demokratis antuk angka pamilet sane ageng.
Indik punika kabaosan olih Koster duk mapidarta ring Rapat Koordinasi Bidang Politik lan Pemerintahan Umum lan Deteksi Dini Mendukung Sukses Pilkada Serentak Tahun 2020, ring Bali Nusa Dua Convention Centre (BNDCC), Badung, Respati (27 Februari 2020).
Ring penyanggra swasti rauhne Gubernur Bali nyumbungan antuk pemargi rapat koordinasi ring Bali, rikala pariwisata Bali nedeng lesu santukan kawentenan virus Corona. Antuk kawentenan kasus Corona, Bali presida keicalan sapangrauh wisatawan utamane Tiongkok. Antuk tedunne sapangrauh wisatawan, sane pinih ngarsayang inggih punika Badung, Denpasar, Gianyar lan Klungkung lan taler ngelimbak ring sapangrauh PHR sane raris ngelimbak ring PAD. Munggwing asapunika Gubernur ngaptiang mangda benjangan ngangsan makehan parikrama MICE minakadi saking kementerian taler lembaga tiosan sane kalaksanayang ring Bali kantos ngicen indik sane becik majeng pariwisata miwah ekonomi krama Bali.
Indik pilkada sinarengan sane pacang kalaksanayang ring September sane jagi rauh ring kabupaten/ kota inucap ring Bali, Gubernur Koster nguningan Pemprov Bali lan stakeholder sane mapakilitan satya jagi ngelaksanayang pilkada sane becik, demokratis antuk angka pamilet sane ageng.
Antuk pemargi rapat koordinasi sane karauhin langkung saking 2000 pemilet saking makasami wewidangan Indonesia puniki, Gubernur Koster ngaptiang mangda pilkada pacang memargi antar lan demokrasi ring Indonesia pacang ngamedalan pemimpin daerah sane presida makta pengobah, nincap lan manut sekadi pengaptin kramane.
Tios raris Menteri Dalam Negeri Tito Karnavian nguningan manut pituduh saking Presiden Republik Indonesia indik strategi sinarengan ngemanahin virus Corona sane ngeranayang pemargi ekonomi alon utamane majeng daerah pariwisata. Munggwing asapunika pemerintah ngambil pemargi-pemargi minakadi antuk ngogokan pemargi MICE ring wewidangan pariwisata sane kalimbak, utamane Bali. Menteri Tito taler negesan potensi wisatawan lokal memargi becik lan presida matetumbasan. Munggwing asapunika pasar domestik kaaptiang presida nagingin pasar Tiongkok sane ngendukan santukan Corona.
Indik pemargi Pilkada Serentak 2020, Menteri Tito negesan Pilkada 2020 mangda memargi antar ring makasami wewidangan utamane indik kasutrepti miwah netralitas pare ASN. Makasami jajaran sane ngamiletin taler awak media katunas nyikian pikayun indik pemargi Pilkada lan sareng ngewangun kasukerthan.
“Antarne pemargi pemilu boya wantah kacingak saking nincapne pamilet sane ngangge hak pilihne, sakemaon taler mangda kramane dados pemilih sane wikan sane memilih pemimpin sane ngerauhan kebecikan majeng gumi," baosne.
Rapat Koordinasi Bidang Politik lan Pemerintahan Umum lan Deteksi Dini Mendukung Sukses Pilkada Serentak warsa 2020 karauhin Jajaran Forkopimda Provinsi Bali, Sekda, Direktur Intelkam Polda, Asintel Kodam/ Korem, Kabinda sane suwang-suwang karauhin olih sane ngewalinin saking 34 Provinsi, KPU lan Bawaslu Provinsi (sane ring wewidanganne ngelaksanayang Pilkada), DKPP 34 Provinsi, Kejaksaan Tinggi 34 Provinsi miwah Bawaslu ring Kabupaten/Kota (Balitopnews.com/md/rls)
Komentar