Ny. Putri Koster Ngewacen Puisi Malelampahan Sumpah Kumbakarna Ring Acare Apresiasi Puisi Seni VS Korupsi
- 01 Maret 2020
- 05:03 WITA
- News
Balitopnews.com, JAKARTA - Ny. Putri Suastini Koster ngerauhin acare Apresiasi Puisi sane ngerauhan penyair-penyair nasional antuk lelampahan "SENI VS KORUPSI", ring Auditorium Abdulrahman Saleh RRI, Jln Medan Merdeka Barat No 4 & 5 Jakarta Pusat, Saniscara wengi (29 Februari 2020).
Acare apresiasi puisi puniki taler kadagingin antuk gelar aksi lan karya saking pare pemilet seni sekadi Ine Febrianti, Joshua Suherman, Septian Dwi Cahyo, Mustapa, Nabila Gomez miwah sasolahan Sosiawan Leak sane karauhin olih Ny. Putri Koster, Ketua KPK RI Komjen. Pol. Drs. Firli Bahuri, M.Si., Direktur Utama LPP RRI Bapak M. Rohanudin lan pemilet seni tiosan.
Istri Gubernur Bali Ny. Putri Koster sane pinaka pemilet seniman sarwa wikan, kaloktah antuk pungkusan "Penyair Mantra" presida rauh lan ngewacen puisi malelampahan "SUMPAH KUMBAKARNA" karya Dhenok Kristianti sane taler rauh nyaksi acare punika. Puisi sane nyurat indik "patut utawi iwang sang raja, gumi tetep katindihin" nyihnayang indik jiwa nasionalisme.
Indik punika patut kasobyahang saking alit mangda dados karakter sane becik lan teguh majeng sang sentana. Santukan antuk jiwa nasionalisme sane kaduwenang suwang-suwang pastika pacang mapikayun yening jagi ngusak gumine sekadi korupsi.
Ring gelar karya puisi sane kawan suwang-suwang antuk ngulangunin kairing olih ring piano sane ngarerengi sane kaaransemen sang pianis luwih Indonesia, Dwiki Dharmawan.
Ny. Putri Suastini Koster maosan indik idealisme, satya iraga majeng gumi presida saking napi kemanten. Ngawit saking napi? Ngawit saking alit-alit iraga. Bekelin punika pinaka karakter dewek, budi pekerti, napi sane patut kelaksanayang majeng gumi,” baos Ny. Putri Koster
Kawewehin, yening nasionalisme punika tetep tumbuh ring dada, janten pacang mapikayun yening malaksana sane ngusak gumine.
“Dadosne, korupsi taler presida kaicalan yening nasionalisme ring dada iraga tetep mendih” Ny. Putri Koster nyineb. (Balitopnews.com/md/rls)
Komentar