Wagub Cok Ace : Ring Bali Durung Kepanggih Kasus Positif Covid-19, Saking 29 Pasien Katureksa 22 Hasil Tes Lab Negatif Covid-19, Pitung Kasus Kantun Nyantos Hasil Lab
- 03 Maret 2020
- 19:03 WITA
- News
Balitopnews.com, DENPASAR – Wakil Gubernur Bali Tjokorda Oka Artha Ardhana Sukawati negesan, kantos mangkin ring Bali durung wenten positif Covid-19. Saking data 29 pasien katureksa, 22 diri hasil laboratoriumne negatif. Raris pitung diri kantun nyantos hasil laboratorium.
Indik punika kaodar ring parum koordinasi nyagra virus corona ring genah parum Praja Sabha Kantor Gubernur Bali, Anggara semeng (3 Maret 2020).
Ring parum punika Cok Ace taler negesan pemargi-pemargi sane kaambil olih pemerintah provinsi antuk instansi sane mapakilitan utamane disampun Presiden nyobyahang indik kalih diri sane kalalahin virus corona.
“Iraga nenten presida malih maosan nenten wenten napi, yadiastun Jakarta lan Bali doh, melianan pulo sakemaon iraga makasami wantah Indonesia lan wenten sesaduan sampun wenten sane kalalahin ring Indonesia,” teges Cok Ace. Kabaos, pikayun mangda kabecikan, informasi sami gelis kauningin maduluran antuk media massa, media sosial lan media tiosan. "Untengne patut karemugin kawentenan fasilitas kesehatan ring Bali, rumah sakit - rumah sakit yening wenten sane kalalahin virus corona ring Bali,” baos Cok Ace.
Kategesan, kantos mangkin ring Bali durung wenten sane kejantenan kalalahin corona. “Sakemaon iraga tetep nyagra indik sarana kesehatan minakadi genah perawatan lan ruang isolasi khusus anggen nambanin pasien sane kalalahin,” ucap Cok Ace.
Kawewehin wenten tigang rumah sakit sane kadadosan rujukan anggen pasien kalalahin corona. Inggih punika RS Sanglah wenten 18 genah merem antuk 4 genah merem isolasi kajangkepin ruang matekanan negatif standar WHO. RS Sanjiwani Gianyar wenten 3 ruang isolasi lan 9 genah merem lan RSUD Tabanan wenten 7 genah merem lan 2 ruang isolasi. Kawente punika minab pacang kawewehin.
“Iraga taler marencana tios yening wenten indik sane nenten kakayunin, sinalih tunggil yening wenten pasien makehne 50 diri, yening lintang 100 diri, lintang 200 diri lan selanturnyane, parencana sane pacang kaambil sampun sadia. Sakemaon ring galah mangkin untengne ring 3 rumah sakit rujukan puniki dumun,” teges Cok Ace.
Kabaosan Pemprov Bali taler sampun nyadiayang parencana anggen nge-blok rumah sakit yening wenten makeh kasus. "RS Universitas Udayana ring Jimbaran, sadia nampa 100 pasien, raris RS Bali Mandara sumanggup nampa 200 pasien. Puniki indik paling kaon," ucap Cok Ace.
Ring parum punika taler kabaosan indik keresikan lan mekanisme alur penerbangan ring Bandara Ngurah Rai anggen nyanggra tetamiu sane ngeranjing ke Bali. Taler sampun kemargiang antuk SOP, dadosne nenten nyandang kanyapnyapin. Indik ring Bandara Ngurah Rai sampun kepasang 3 thermo scanner raris ring Pelabuhan Benoa kepasang 1 thermo scanner.
“Krama patut uning, pasien sane kalalahin virus corona puniki presida kenak kantos 98 persen. Sakemaon pengelimbakne gelis,” baos Cok Ace.
Dane taler nyobyahan majeng krama mangda wicaksana nganggen masker, munduhan pacang kahukum. Masker taler sampunan kaangge iwang santukan kaanggen wantah apisan. Sepatutne masker sane sampun kaangge gelis punggel mangda nenten wenten sane malih ngedaur ulang. “Jagra setata kesehatan lan keresikan palemahan mangda ngangsan nincap imunitas angga iragane,” teges Cok Ace.
Tiosan raris Kadis Kesehatan dr. I Ketut Suarjaya nyobyahan pasien katureksa (wenten gejala, nanging kantun nyantos hasil lab, red) ring RS Sanglah wenten 2 diri, ring RS Tabanan adiri ring RS Mangusada wenten adiri, ring RS Sanjiwani Gianyar wenten 3 diri.
“Dane punika kadi wenten penyungkan sekadi flu, sakemaon kantun maobservasi. Kemargian ping kalih uji lab ring 2 rahina,” teges nyane Kawewehin, indik sane katureksa mangkin makehne 13 diri lan makehan polih lunga ke dura negara nanging nenten nyihnayang sekadi sane kaucap. Tetep katureksa yadiastun sami kantun kenak lan sampun ngelintangin galah inkubasi virus. Makasami sampun katureksa ring lab lan yening negative dane kaucap resik.
Kategesan, kantos pinanggal 3 Maret 2020, makasami pasien katureksa wenten 29 diri lan hasil labne sampun medal. 22 diri hasilne negative, 7 diri kantun nyantos hasil lab. Pitung diri sane kantun katureksa katambanin inggih punika ring RSUP Sanglah 3 diri. Wenten rare lanang mayusa 11 sasih WNA Jepang, wenten anak lanang mayusa 23 tiban WNA Jepang lan anak istri mayusa 23 WNI. RSUD Sanjiwani Gianyar 3 diri inggih punika anak istri 34 tiban WNA Rusia, anak istri 69 tiban WNA Denmark, anak lanang 68 tiban WNA Denmark. RSUD Wangaya adiri anak lanang yusa usia 66 tiban WNI.
“Kulawarga dane sane katureksa taler setata kacingak olih petugas kesehatan,” baosne. Dane nangian krama mangda nyagra kesehatan lan palemahan mangda tetep resik.
“Virus puniki durung wenten tambane kantos mangkin sakemaon untengne wenten ring imunitas angga iraga,” sineb dane. Parum punika taler karauhin olih Kepala Dinas Pariwisata, Kepala Dinas Komunikasi, Informatika lan Statistik Provinsi Bali, jajaran Otoritas Bandara Ngurah Rai, Angkasa Pura, Pelindo III, Direktur RS Sanglah, RS Sanjiwani lan RS Tabanan. (Balitopnews.com/md/rls)
Komentar