Ny. Putri Koster : Krama Sane Geginane Mayasin Mangda Sareng Negen Tanggung Jawab Pelestarian
- 08 Maret 2020
- 08:03 WITA
- News
Balitopnews.com, TABANAN – Manggala Tim Penggerak PKK Provinsi Bali Ny. Putri Suastini Koster ngaptiang krama sane mageginan mayasin sareng negen tanggung jawab pelestarian. Indik punika kategesan Ny. Putri Koster duk ngerauhin Musyawarah Daerah ke-5 apisanan pelantikan pengurus Persatuan Ahli Kecantikan lan Pengusaha Salon Indonesia sane masikian ring DPD Tiara Kusuma Provinsi Bali sane memargi ring Ballroom Quest Hotel Denpasar, Redite (8 Maret 2020).
“Modifikasi sampunan moce kantos sentanan iragane ten malih uning ring pepayasan Bali. Titiang boya munggel kreatifitas lan tetincap ring baga pepayasan, sakemaon sane kaangge mangda patut. Ring adat, mangda tetep lestari manut pakem,” baos Ny Putri Koster.
Dane nyaksi, ring pepayasan utamane pepayasan anak merabian ring Bali ngangsan nincap.
“Titiang ngaptiang, dane sane mageginan ring utsaha pepayasan tetep nulad ring adat lan sima utamane yening pepayasan lan busana punika jagi kaangge karya adat. Ring pepayasan anak merabian, leluhure sampun ngewarisan uger-uger mabusana sane adung lan ngulangunin sane kakepah-kepah inggih punika payas agung lan madya. Pepayasan saking tutuk rambut kantos cokor wenten ugerne lan yening katinutin pacang ngamedalan pepayasan sane ngulangunin” teges Ny Putri Koster.
Antuk tetujon nagingin pikayun anten, pungkuran mangkin makeh memargi modifikasi ring pepayasan lan mabusana adat Bali. Sekadi ngawewehin kampid sane lantang kantos ngebekin natar, tegeh sekar taler wenten sane senten manut sikut mua anten kantos raris ngerauhan indik sane nenten becik lan ten adung miwah ngulgul.
Yening uger-uger pepayasan sane kawarisan leluhur katulad, pepayasan anten Bali sepatutne sampun becik olih sang sane ngangge. Dasar juru payas inggih punika etika, estetika lan norma. Rikala ngangge busana anten, penglingsire taler sampun narka sane engken kapangguh seksi. Dadosne seksi punika nenten wantah nyihnayang kulit ari.
Ring galah punika Ny. Putri Koster nunas mangda kawentenan FGD tigang organisasi sane memargi ring utsaha pepayasan lan salon kantos nunggal kayun ring utsaha ngalestqriang lan nincapan. OPD inucap katunas nyurat awig mangda kawentenan sang sane mageginan salon lan mayasin presda katunggalan mangda nenten wenten perang aji.
Tiosan punika awig inucap taler kawentenan angge nambakin parilaksana corah ring pepayasan, santukan pungkuran puniki makeh anak istri sane ngarsayang kulit nyane mutihan utawi iringne ngelanyingan. Patut kaelingin durung pastika produk sane kaadol salon kecantikan becik anggen dane. Sane wenten boya nyegegan sakemaon tungkalikanne.
Kantun indik busana anten, Putri Koster nunas majeng sane mautsaha mayasin sane nyewayang busana mangda ngangge kain songket tenun, boya bordiran sane pungkuran makeh wenten ring pakraman.
"Iraga janten mangda sareng ngutsahayang ngalestariang tenun tradisional Bali,” ucap dane. Tiosan raris, Manggala DPD Tiara Kusuma Bali periode 2020-2024 Dra. Ni Ketut Sriati Dana nangian kramanae mangda sareng-sareng melaksana manut tupoksi sane kadasarin manah lascarya. Raris Kadis Pendidikan Provinsi Bali sane kawalinin olih Sekretaris Dinas Pendidikan Ketut Sudarma nunas krama sane mageginan mayasin lan salon nangian kearifan lokal ring pekaryan dane. (Balitopnews.com/md/rls)
Komentar