Wakil Gubernur Bali Cok Ace : Bali Nangian Satgas Penanggulangan Covid 19
- 12 Maret 2020
- 06:03 WITA
- News
Balitopnews.com, DENPASAR – Ngayunin indik kawentenan virus covid 19 sane kantos mangkin ngerauhan 50 pasien suspect, saking 50 pasien punika 38 diri sampun kaucap negatif, 1 padem lan 11 kantun nyantos hasil laboratorium. Pemerintah Provinsi Bali sampun nangian Satuan Tugas (Satgas) Penanggulangan Covid 19.
Indik punika kategesan Wakil Gubernur Bali Tjokorda Oka Artha Ardhana Sukawati kaabih Kepala Dinas Pariwisata Provinsi Bali Putu Astawa duk mimpin rapat kesiapsiagaan Provinsi Bali midabdabin COVID 19 ring Ruang Rapat Prajasabha, Kantor Gubernur Bali, Respati (12 Maret 2020).
Wagub Tjokorda Oka Artha Ardhana Sukawati utawi sane kaloktah antuk aran Cok Ace maosan, Satgas penanggulangan Covid 19 kakepah antuk limang satuan tugas inggih punika satuan tugas kesehatan, satuan tugas area lan transportasi publik, satuan tugas area institusi pendidikan, satuan tugas komunikasi public lan satuan tegas pintu masuk Indonesia.
"Satgas puniki pacang ngelaksanayang tugas masikuan jagi ngelaksanayang kawaspadan lan nambakin Covid 19 makasami lan nyaduang pemargine nyabran rahina manut sekadi protokol penanggulangan Covid 19,” teges Cok Ace.
Cok Ace maosan, midabdabin kawentenan Virus Corona, Pemprov Blai miwah stakeholder inucap setata mligbagin jagi ngambil pemargi preventif pinaka utsaha nambakin pengelimbak Virus Corona.
Kawewehin, gegambaran mangkin indik cakepan Covid 19 ring Provinsi Bali madasar antuk data saking Dinas Kesehatan Provinsi Bali, kantos mangkin wenten 50 pasien suspect Covid 19, saking 50 pasien punika 38 kaucap negatif, 1 padem lan 11 kantun nyantos hasil laboratorium.
“Indik adiri WNA sane padem santukan Covid 19 ring RSUP Sanglah, Dinas Kesehatan Provinsi Bali nedeng ngelaksanayang contact tracing ring genah pasien polih madunungan lan ambil conto ring makasami krama sane naenin nampek sareng pasien inucap," bawosne.
Tiosan raris, Rumah Sakit sane kajodi dados genah rujukan midabdabin pasien Covid 19 setiosan RSUP Sanglah ring Denpasar, RS Sanjiwani ring Gianyar, RSUD Tabanan mangkin RSUD Buleleng taler sampun kadadosan pinaka rumah sakit sane kajodi midabdanin Covid 19 ring Provinsi Bali.
“Pungkuran Pemprov Bali pacang nincapang utsaha nambakin sane sinalih tunggilne antuk nincapan utsaha sprayer disinfeksi Virus Corona utamane ring genah-genah umum ring makasami wewidangan ring Bali," teges dane
Taler rauh ring peparuman semeng punika, Kepala OPD sane mapakilitan ring wewidangan Pemprov Bali, Kepala Dinas Pariwisata Kabupaten/kota se-Bali, Kepala Dinas Lingkungan Hidup kabupaten/kota se-Bali, organisasi kepariwisataan miwah oleman sane tiosan. (Balitopnews.com/md/rls)
Komentar