Pemprov Bali Nyayagayang RS PTN Udayana Dados Puser Isolasi Pasien Covid-19
- 29 Maret 2020
- 14:03 WITA
- News
Pemprov Bali Nyayagayang RS PTN Udayana Dados Puser Isolasi Pasien Covid-19
Balitopnews.com, DENPASAR - Gubernur Bali Wayan Koster maosang Pemerintah Provinsi Bali sampun nyayagayang RS PTN Udayana dados puser isolasi pasien COVID-19 wiadin puser nambakin. Indik punika kaodar Sabtu ( 28 Maret 2020).
"RS PTN Udayana sane pacang kaangge ring pinanggal 7 April, mangkin kantun kasayagayang. Yening sampun sayaga, dadosne RS daerah tiosan sane mangkin nambanin pasien COVID-19 pacang kapuputan mangda pengelimbakanne presida nunggal, nenten sekadi sambeh. Antuk punika pemargi nambanin COVID-19 ring Bali wantah ring RS PTN Udayana," teges Gubernur Koster.
Ring galah punika Gubernur Koster ngawewehin indik upanaya sane sampun kemargian antuk tetujon nambakin pengelimbak COVID-19. Sinalih tunggilne melarapan pakeling mangda kramane tetep ring pekubonan lan ngewatesin utawi ngungkuran lunga saking lan medal saking Bali. Manut dane, pemargi puniki dados pemargi mabuat saking upanaya ngirangin kramane saling nampek sane presida baya kalalahin COVID-19.
Raris indik ngewatesin ngeranjingne turis dura negara saking nyineb bandara, pemargi punika durung kemargiang. Sakemaon dane ngawewehin makeh panegara sampun ngelaksanayang awig antuk nyineb kantos nente wenten penerbangan ke Indonesia utawi Bali saking panegara-panegara punika.
"Yening nyineb bandara utawi pelabuhan, titiang patut nganut pewarah lan uger-uger pemerintah pusat. Yening punika kasineb, titiang ngemanah pemargi lockdown sane wenang kemargiang olih pemerintah pusat. Titiang nenten ngambil pemargi punika santukan titiang nenten wenang. Sane margian titiang ngewatesin krama medal saking pakubonan utawi karya sane karauhin krama makeh," baos dane.
Ring galah mangkin baos Koster, ring Bali makeh PDP 130 diri. Saking punika sane kaucap negatif COVID-19 87 diri sampun budal lan kenak. Pasien sane positif COVID-19 wenten 9 diri, 4 WNA, 5 WNI. Kantun wenten 38 diri sane katambanin ring RS, minakadi ring Sanglah taler ring 10 RS pemerintah sane wenten ring kabupaten/kota.
"Iraga kantun medue genah isolasi yening malih wenten pasien positif," Gubernur Koster ngawewehin.
Raris indik fasilitas sane patut wenten ngeterang COVID-19, Bali sampun polih wantuan saking pusat marupa APD, inggih punika 4000 unit, kiriman rapid test kit makehne 3.800 unit. Punika wau pah 1, pacang kakirim malih ring pah tiosan.
"Alat-alat punika sampu kasobyahang melarapan Satgas majeng RS rujukan sane nambanin pasien COVID-19," teges Gubernur Koster.
Tiosan raris Rapid test sampun ngawit kemargian dibi, kautamayang pare tenaga medis sane tugas ring RS rujukan antuk tetujon ngemastikayang para tenaga medis puniki jakti-jakti kenak.
"Titiang taler ngutamayang Pekerja Migran Indonesia (PMI) sane wau budal saking dura negara. PMI sane kakekeb sampun ngemargiang rapid test, pikolihne negatif lan dane kaicen surat keterangan sehat lan kadadosan budal ke jerone suwang-suwang raris ngekeb angga," ucap Koster.
Pikolih rapid test medal antuk galah 15 menit dadosne nenten ngangge galah suwe nyantos pikolihne. Manut orti saking dokter, tingkat akurasinya kantos 99 persen.
Gubernur Koster taler negesan indik nyineb destinasi wisata, sane sampun ngaturang sewalaptra majeng bupati/walikota se-Bali ring pinanggal 23 Maret lintang mangda nyineb objek wisata ring wewidanganne suwang-suwang.
"Bupati/walikota sampun anut sareng uger-uger sane titiang medalan dadosne mangkin destinasi wisata sane ageng sampun kasineb sami," teges Koster.
Kantun manut Gubernur Koster, Kementerian Kesehatan sampun ngicen RS Sanglah ngemargian uji Swab. "Titiang sampun nyayagayang fasilitas anggen nika sekadi tenaga medis dadosne ngawit pinanggal 26 maret, RS Sanglah sampun ngemargian uji Swab majeng PDP COVID-19. Antuk punika pikolih panureksa gelis kauningin. Sane sampun memargi kakirim dumun ke Jakarta lan Surabaya. Pikolihne suwe kajantosan. Mangkin sampun kemargian ngeraga ring RS Sanglah," Koster nyobyahang.
Indik budalne PMI, titiang polih orti saking Kedubes dane pacang mewali. Titiang antisipasi antuk ngaremug sareng pihak penerbangan travel, agen sane ngirim ke LN raris nureksa jadwal lunga ke Bali. Kantos ring Bandara Ngurah Rai, manut sareng prosedur sane patut ngelintangin margi tiosan nyihnayang sertifikat sehat. Yening nyihnayang sertifikat sehat lan nenten saking panegara kalalahin, dane kaicen budal. Yening saking panegara kalalahin mangda kakekeb, katureksa yening pikolihne kenak utawi negatif wau dados budal, yening sungkan kaisolasi ring RS. Kantos mangkin makehan sane budal wantah 41 sane kakekeb, durung wenten positif, sami negatif lan dados budal. Wengine mangkin kantun wenten sane pacang rauh.
Indik minab Bali ngelaksanayang local lockdown, sekadi sane kemargiang olih daerah tiosan. "Titiang nyantos pewarah lan uger-uger saking pemerintah pusat santukan punika patut manut pewarah Bapak Presiden. Sakemaon titiang, yadiastun durung ngemargian lock down makasami sampun dahat ngewatesin geginan krama warga medal saking pakubonan, antuk pakeling mekarya, melajah saking pakubon lan nenten nadosan medal yening nenten antuk tetujon sane nesek utawi santukan medue tetujon tios. Nenten kadadosan ngerauhin genah ramia, genah malila cita sane wenten ring kabupaten/kota. Titiang nunas mungkuran parencana lunga medal saking Bali. Enteran krama medal ngeranjing mangda baya ngelalah presida kepunggel," teges Gubernur Koster.
Pemerintah Provinsi Bali taler sampun ngamedalan pakeling mangda karya adat lan agama paling akeh kasarengin 25 diri.
"Yening lintang titiang nitahan desa adat lan pecalang mangda ngewatesin. Duk pinanggal 26 Maret, kawantu aparat kepolisian, kramane sutrepti nenten medal saking pakubonan. Kantos mangkin krama sane medal kedik. Margi ring wewidangan Bali makasami Bali suwung, taler supermarket suwung, rumah makan suwung, pakeling sane kamedalan memargi becik. Puniki sami antu sokongan Bapak Pangdam, Kapolda lan pihak tiosan, utama nyane bupati/walikota se-Bali miwah desa adat sane ngemargian ayah-ayah becik kantos pemargi nambakin COVID-19 ring Provinsi Bali memargi becik lan mawiguna," Gubernur Koster nyineb. (Balitopnews.com/md/rls).
Komentar