LPKJ Gebernur Bali Tahun 2019 Katerima lan Kasumbungan DPRD Bali.
- 14 Mei 2020
- 22:05 WITA
- News
DENPASAR, Balitopnews.com - Dewan Perwakilan Rakyat Daerah (DPRD) Provinsi Bali ngemargiang sidang paripurna, Respati (14 Mei 2020 ).
Sidang paripurna sane kalaksanayang ring Ruang Sidang Utama Kantor DPRD Bali punika maosan pakeling keputusan dewan indil rekomendasi antuk Laporan Keterangan Pertanggungjawaban (LKPJ) Gubernur Tahun Anggaran 2019.
Tiosan raris, sidang paripurna taler maosan laporan lan sikap/keputusan dewan majeng Rancangan Peraturan Daerah (Raperda) inggih punika Raperda Inisiatif Dewan tentang Perubahan Atas Perda Nomor 5 Tahun 2010 indik Penyertaan Modal Daerah, Raperda indik Standar lan Penyelenggaraan Kepariwisataan Budaya Bali, Raperda indik Penyelenggaraan Kesehatan lan Raperda indik Penguatan lan Pemajuan Kebudayaan Bali.
Ring wacana penyineb, DPRD Bali igum ngesahang 4 Raperda dados Perda lan nerima LKPJ Gubernur Tahun Anggaran 2019 antuk apresiasi lan suksemaning manah.
Nyoman Adnyana, SH.MH pinaka Koordinator Pembahasan LKPJ Gubernur maosang untengne dewan nerima LKPD sane kauningan Gubernur ring pidartane pinanggal 20 April 2020. Disampun mikayunin asiki-asiki laporan saking gubernur, jajaran legislatif nyumbungan santukan makasami manut sekadi sane kaapti. Semalihne wenten ngungkulin ulengan nasional sekadi tetincap ekonomi, indeks pembangunan manusia, PDRB lan PAD sane ngungkulin ulengan.
"Titiang taler nyumbungan santukan gubernur sampun ngamedalang makeh awig lan uger sane kasanggra becik," ucap dane.
Antuk baos tiosan, dane nyaksi Gubernur Wayan Koster sampun wikan ngenterang pemerintahan.
"Indik puniki uningan titiang boya sangkaning titiang saking PDIP, sakemaon santukan napi sane kakaryanin gubernur sampun kaarsayang olih krama Bali. Tiosan nyumbungan, dewan taler ngicen rekomendasi inggih punika mangda gubernur nincapan sektor primer sekadi pertanian mangda wenten pilihan tiosan saking pariwisata rikala memargi byuta sekadi merana COVID-19. Lintang saking punika, dewan taler ngarekomendasi mamgda gubernur gelis maupanaya nincapang ekonomi kreatif antuk tetujon nincapang pengupa jiwa kramane," ucap dane.
Agung Adi Ardana ST sane ngewacen tanggapan dewan indik Raperda Tentang Standar lan Penyelenggaraan Kepariwisataan Budaya Bali nyanggra becik pemargi gubernur ngunggahang awig-awig ring baga pariwisata puniki.
Manut dane, awig-awig puniki dahat mabuat majeng Bali pinaka genah tetujon wisata. Napi malih perda puniki sampun nambakin tetincap pariwisata ring era digital. Nyaksi kaonne baga pariwisata ring kawentenang COVID-19, dewan ngarekomendasian mangda gubernur nambakin kawentenang sane pacang memargi rinv baga puniki rikala kawentenan jagat mewali becik utawi new normal.
"Sane patut kemanahin benjangan pinaka indik resik, kesehatan lan sanitasi sane becik. Munggwing asapunika, kawentenang genah ngewajik tangan, toilet resik pinaka garansi sane patut kamunggahang ring wisatawan," baosne
Raperda indik Penyelenggaraan Kesehatan taler kaigumin lan kasumbungan a
dewan. Ngewacen wacana penyineb dewan, Ir. I Gusti Putu Budiarta nguningan perda puniki kaaptiang presida ngejamin amongan kesehatan sane ngangsan becik lan maintegrasi majeng krama Bali. Lintang saking punika, awig-awig puniki kasanggra becik santukan ngamunggahang sistem pengobatan tradisional.
Raperda indik Penguatan lan Pemajuan Kebudayaan Bali lan Raperda indik Perubahan antuk Perda Nomor 5 Tahun 2010 indik Penyertaan Modal Daerah taler kaigumin dewan lan kasumbungan santukan pinaka kalih awig sane dahat mabuat. Indik punika kaodar olih kalih anggota dewan sane ngewacen wacana panyineb indik makakalih raperda punika inggih punika Ketut Suryadi, S.Sos lan I Gede Komang Kresna Budi.
Saking wacana penyineb sane kawacen olih suwang-suwang koordinator pembahasan raperda, Ketua DPRD Bali I Nyoman Adi Wiryatama maosan dewan ngigumin kasahang papat Raperda dados Perda.
Gubernur Bali Wayan Koster ring galah punika ngaturang suksema majeng jajaran pimpinan lan anggota dewan makasami, antuk swadharmane lan gotong royong muputan pembahasan Raperda, yadiastun mewates santukan kawentenan kasus COVID-19.
"Maka papat Raperda puniki pinaka cihna kasujatian Pemerintah Provinsi Bali nincapan swadharma pemerintahan, rikala ngelaksanayang omongan pembangunan lan nangian ayah-ayah majeng krama pinaka implementasi saking paradigma good governance. Titiang ngaptiang awig-awig puniki presida memargi antar lan becik," teges Koster.
Koster negesan Raperda Penguatan lan Pemajuan Kebudayaan Bali dahat mabuat santukan Bali medue budaya tios sane malianan lan gemuh antuk nilai-nilai luhur sane madasar antuk Tri Hita Karana lan rauh saking kearifan lokal Sad Kerthi sampun dados dasar panumadian sane kawarisin lan katincapan antuk turun-temurun. Kawentenang budaya Bali sane dados jiwa kramane patut kalestariang lan katata antuk komprehensif antuk tetujon nyantenan bagia sekala lan niskala. Pranata hukum janten mabuat pisan anggen ngewaliang Bali pinaka puser peradaban budaya dunia. Duk dumun, budaya Bali dahat luwih lan kasumbungan duk Kerajaan Gelgel sane madeg ratu, Raja Waturenggong. Sakemaon pungkuran kebudayaan Bali nyamurang santukan pemargi yuga ring nasional lan global. Puredne budaya nenten dados ngelantur. Munggwing asapunika patut wenten upanaya penguatan lan pemajuan.
Penguatan lan pemajuan kebudayaan dahat mabuat pinaka tameng sapangrauh nilai-nilai saking jejaban sane nenten manut sareng Kebudayaan Bali. Munggwing asapunika patut pengenter sane komprehensif indik penguatan lan pemajuan kebudayaan pinaka dasar anggen ngelaksanayang indik pemerintahan ring baga kebudayaan ring Provinsi Bali.
Penetapan Raperda Penguatan lan Pemajuan Kebudayaan Bali dados Peraturan Daerah matetujon ngukuhan apisanan nincapan Kebudayaan Bali. Penguatan lan Pemajuan Kebudayaan Bali kalaksanayang mangda ngangsan teguh taksu (spirit) pinaka jati diri miwah mangda krama Bali sukertha sakala lan niskala. Taler anggen nyarengin nincapan kebudayaan nasional ring kawentenan jagat sekadi mangkin.
"Perda Penguatan lan Pemajuan Kebudayaan Bali dados pranata hukum rikala ngabih Bali saking pikobet lan byuta minakadi sane rauh saling lokal, nasional miwah internasional merupa konsumerisme, komersialisasi, profanisasi, degradasi nilai lan muredang kualitas lan kuantitas karya miwah kelembagaan budaya. Santukan Perda puniki medue tetujon nangiang krama Bali sane maintegritas, kompeten, berdaya saing, berkepribadian, lan menginspirasi peradaban dunia (Bali Padma Bhuwana)," tegesne.
Kantun manut Koster, baga kepariwisataan taler patut gelis kaenterang antuk awig. Santukan kantos mangkin perekonomian daerah kantun katandalin olih sektor pariwisata. Nincapne sektor puniki makta indik kaon sekadi samurne budaya, palemahan lan manusa Bali. Pariwisata sekadi memargi nenten rungu antuk kawentenang krama lokal. Dominasi saking jejaban ngerauhang pocol domestik. Tios antuk nguningan, ramia pariwisata Bali wantah pepayasan Pariwisata memargi newek ngutang Bali lan nenten nincapan kagemuhan kramane.
"Ngiring pikayunin pengusaha, pekerja lan modal makehan saking jejaban. Iraga kutange, kaluwihan budaya dados objek, sakemaon sira sane ngarsayang. Yening kabanggyang, indik puniki pacang ngerauhang baya majeng Bali," teges Koster.
Puniki patut kaenterang antuk fundamental lan komprehensif malarapan Perda.
"Ngenterang pariwisata Bali patut kadasarin nilai kearifan lokal sakemaon tetep nganut tetincap dunia digital. Kantos raris pariwisata Bali pacang presida nyanggra dinamika lokal, nasional lan global. Perda puniki kaaptiang presida dados dasar rikala ngemargiang kepariwisataan budaya Bali sane makualitas lan ngelantur nyujur Bali Era Baru," baosne
Raris indik Raperda Tentang Penyelenggaraan Kesehatan dados Perda, Pemerintah Provinsi Bali sampun medue dasar lan awig antuk upanaya nincapan mutu ngemargiang pelayanan kesehatan. Ngemargiang pelayanan kesehatan pinaka dasar utawi tetulad sane kaanggen pinaka sasuluh ngemargiang kesehatan sane efektif lan efisien antuk tetujon nyujur krama Bali sane landuh lan bagia sakala-niskala.
Minakadi indik sane kaaurat ring Peraturan Daerah indik Penyelenggaraan Kesehatan puniki inggih punika sumber daya kesehatan, upanaya kesehatan, tata titi ngelaksanayang amongan kesehatan, informasi kesehatan, tetincap pemargj amongan kesehatan pembinaan lan panureksa pengargan miwah kauratian kramane. Peraturan Daerah puniki taler ngeterang standar pelayanan kesehatan sane sampun katah memargi ring Indonesia, taler ngeterang indik spesifik sane dadis cihna khas Provinsi Bali inggih punika: ngeterang indik kesehatan tradisional, aplikasi sistem informasi kesehatan SIK-KBS, kesehatan wisata, nangian Badan pengawas Kesehatan Daerah miwah nambakin kawentenang merana/pandemi minakadi ngeterang pangekeb miwah rumah sakit mangda medue genah ngekeb.
"Iraha melajah saking pikobet kesehatan sane sampun memargi utamame antuk kawentenan COVID-19 dadosne pemargi majeng pikobet punika kasurat ring Peraturan Daerah puniki," Koster ngawewehin.
Selanturne antuk katetapan Raperda indik Perubahan Atas Peraturan Daerah Nomor 5 Tahun 2010 indik Penyertaan Modal Daerah, raris penyertaan modal sampun manut sareng kawentenanne mangkin kadasarin saking mecikan, mubaran lan/ utawi nyineb perusahaan olih instansi sane wenang kantos ngicen kepastikayang hukum ring penyertaan modal sane sampun kalaksanayang. (Md/rls)
Komentar