Desa Abuan Nyineb Ngekeb Wewidangan
- 15 Mei 2020
- 20:05 WITA
- News
BANGLI, Balitopnews.com -14 rahina sampun suwene krama Br. Serokadan lan makudang banjar ring Desa Abuan ngemargiang ngekeb wewidangan antuk tetujon nambakin lan munggel merana Covid-19.
Gatra becik raris rauh, krama Desa Abuan kaicen mewali ngelaksanayang geginan sekadi dumun disampun status ngekeb wewidangan kasineb.
Indik punika kaodar olih Sekretaris Daerah Provinsi Bali Dewa Made Indra pinaka Ketua Harian Gugus Tugas Percepatan Penanganan Covid19 kasarengin Bupati Bangli Made Gianyar ngerauhin ngobah status ngekeb wewidangan Desa Abuan ring Bale Banjar Serokadan, Abuan, Bangli, Sukra (15/5).
“Ngawit rahina mangkin ngekeb wewidangan Desa Abuan kaucap puput. Krama dados mewali ke swadharmane suwang-suwang, sekadi dumun utawi yakni kramane dados ngelaksanayang geginan sakemaon setata waspada. Boya ngurag sakemaon setata nganutin protokol nambakin Covid-19,” teges DM Indra.
"Ngekeb janten sampun puput, sakemaon mewali titiang negesan upanaya nambakin Covid durung puput. Niki kantun memargi, kantos Bali jakti-jakti kabaos nenten wenten sane kalalahin covid19. Sinalih tunggil anggen ngemastikayang inggih punika nenten kantun wenten transmisi lokal. Yening kantun wenten transmisi lokal punika kabaos Bali kantun wenten kramane sane mamengkung saking tata titi nambakin virus punika. Kantos mangkin taler kantun wenten transmisi lokal, taler ring Bangli. Antuk kawentenang punika titiang raris purun nunas mangda waspada,” baosne.
Pemargi ngekeb masue 14 rahina taler kaaptiang ngerauhang indik positif majeng krama Desa Abuan, lan tatulad majeng krama Bali makasami mangda ngangsan uning, keresep lan waskita majeng baya pengelimbak Covid19.
Pateh sekadi Sekda DM Indra, Bupati Bangli Made Gianyar taler nyumbungan pemargi ngekeb wewidangan sane kemargiang olih Desa Abuan antuk tetujon munggel pengelimbak Covid19. Disampun ngobah status antuk puputne ngekeb masue 14 rahina, dane raris mikelingin kramane nincapang waspada lan kauratian antuk tetujon nambakin covid-19.(gix)
Komentar