Kasus Kampung Jawa, Gubernur Bali Wayan Koster Nunas Krama Sami Ngewangun Kasutreptian, Nenten Pade Ngiwangan
- 26 Mei 2020
- 21:05 WITA
- News
DENPASAR, Balitopnews.com - Gubernur Bali Wayan Koster nunas krama sami ngewangun kasutreptian nenten pade ngiwangan, ngawi byuta, sakemaon patut nincapan parilaksana becik antuk semangat gotong-royong, sareng pemerintah lan krama mangda merana COVID-19 gelis ical sekadi pengaptin krama sami.
Indik punika kaodar Gubernur Koster, Anggara (26 Mei 2020) nyawis kawentenan kasus krama mepupul sane ten adung sareng protokol kesehatan lan presida ngerauhang COVID-19 ngelalah ring Dusun Wanasari Kampung Jawa, Desa Dauh Puri Kaja, Denpasar.
Manut Gubernur Koster krama mepupul ring pinanggal 23 Mei 2020 duk malam takbiran sane pinaka pemargi nadak olih anom-anom ring wewidangan punika.
"Anom-anom sane nyarengin acare punika sampun nunas ampura malarapan video majeng aparat penegak hukum lan krama," teges Gubernur Koster.
Kawewehin, angga kepolisian inggih punika Polresta Denpasar sampun ngemargiang sasuduk antuk ngerauhang krama sane ngamiletin acara punika miwah katunasin baos lan pemargi puniki patut kadukung olih makasami.
"Pinaka Gubernur, titiang nunas majeng ring krama sami mangda nenten ngeka lan ngepolitisir kawentenan punika lan nenten patut matehan sareng Upacara Ngaben ring Desa Sudaji Kabupaten Buleleng, santukan kawentenang makakalih matiosan," teges Gubernur Koster.
Dane taler nunas majeng kramane sami mangda nenten ngamedalan bebaosan sane ngiwangan Aparat Penegak Hukum lan Satuan Gugus Tugas Penanganan COVID-19 santukan Aparat penegak hukum sampun mekarya becik, kooperatif lan nukung pemargi Gubernur pinakq Ketua Gugus Tugas antuk kawentenan COVID-19 ring Bali. Malarapan pasikian, reremug lan gotong royong sane becik punika, pemargi nambakin COVID-19 ring Provinsi Bali presida memargi becik, trepti lan sukertha.
Rikala nambakin COVID-19 ring Provinsi Bali, sane sampun nyihnayang pikolih becik.
"Titiang ngelingin kramane sami mangda sareng-sareng ngewangun kasutreptian antuk nenten pada ngiwangan, ngaryanin byuta, sakemaon patut nincapan parilaksana luwih antuk semangat gotong-royong, sareng pemerintah lan masyarakat, mangda merana COVID-19 presida ical sekadi sane kaaptiang," sineb Gubernur Koster. (Md)
Komentar