Cok Ace : Pilkada Serentak 2020 Mangda Nganutin Protokol Kesehatan
- 02 Juli 2020
- 19:07 WITA
- News
DENPASAR, Balitopnews.com -Wakil Gubernur Bali Tjokorda Oka Artha Ardana Sukawati ( Cok Ace ) kaabih Kepala Badan Kesatuan Bangsa lan Politik Provinsi Bali I Gusti Agung Ngurah Sudarsana nyarengin apel siaga 'Bali Siap Pemilihan Serentak 2020’ sane kalaksanayang olih KPU Provinsi Bali antuk virtual, ring ruang kerja Wagub Bali, Respati 2 Juli 2020.
Cok Ace nguningan, pilkada puniki mateges lan pemargi sane dahat mabuat majeng demokrasi utamane majeng pemilihan Kepala Daerah. Proses pemilihan kepala daerah mangda tetep memargi ring masan Covid 19 anggen ngemastikayang kepemimpinan ring suwang-suwang daerah tetep wenten, santukan indik punika ngelimbak ring stabilitas politik, pembangunan daerah lan kasukerthan krama.
Cok Ace nunas mangda pemargi Pilkada Serentak warsa 2020 kalaksanayang manut protokol kesehatan ring makasami dudonanne. Wagub ngaptiang rarembug pare Gugus Tugas lan Dinas Kesehatan ring suwang-suwang daerah presida memargi becik lan janten katureksa Bawaslu.
Untengne Pemerintah Provinsi Bali nyujur “Bali Era Baru” melarapan “Nangun Sat Kertih Loka Bali” nukung Pilkada Serentak warsa 2020 mangda presida demokratis lan ngunggahang aspek kesehatan krama sami antuk ngemargiang protokol kesehatan.
Cok Ace ngaptiang tetincap nyanggra Pilkada Serentak pinanggal 9 Desember 2020 antuk ngemargiang protokol kesehatan saking undag desa/ kelurahan kantos kabupaten/kota presida memargi antar.
Tiosan raris Ketua KPU RI Arif Budiman duk mapidarta nguningan Pilkada Serentak warsa 2020 pinaka Pilkada sane pacang kalaksanayang ring 270 daerah ring Indonesia. Indik ring Provinsi Bali, Pilkada kalaksanayang ring 6 kabupaten/ kota, sane sedurungne kaungkuran santukan wenten covid-19.
Munggwing asapunika, ring makasami dudonan Pilkada mangda kasagayang sebecikne minakadi sarana prasarana, personel taler indik prebeane. Dane nunas mangda mekarya nganggen alat pelindung diri (APD). Sampunan kantos penyelenggara pemilu ngelalahang virus lan dados kluster Covid 19.
Patut kasobyahang ke angga maka sami kalih indik mabuat ring pemargi Pilkada inggih punika indik kerahayuan lan kenak. Sapunapi antuk ring masan pandemi puniki presida ngelaksanayang pah-pahan Pilkada antuk becik miwah rahayu lan kenak taler Pemilu sane luber lan jurdil presida kemargiang.
Apel siaga puniki taler karauhin olih Ketua DPRD Provinsi Bali, Pangdam IX/ Udayana, Ketua Bawaslu RI, Ketua KPU Provinsi Bali, Ketua Bawaslu Provinsi Bali, Anggota KPU saking 6 kabupaten/ kota ring Provinsi Bali, Dinas Kesehatan Provinsi lan kab/kota miwah Gugus tugas Penanganan Covid 19 Provinsi Bali lan 6 kabupaten/ kota se-Bali. (gix)
Komentar