Ngalestariang Danu, Telebesan, Tukad lan Segara Antuk Sekala Niskala, Gubernur Bali Ngamedalang Pergub Nomor 24 Warsa 2020 

  • 10 Juli 2020
  • 21:07 WITA
  • News

 

DENPASAR, Balitopnews.com -  Ring galah mangkin danu, telebesan, tukad lan segara ring Bali kualitas lan kuantitasne nedunan. Antuk tetujon ngewalian lan ngalestariang indik punika antuk sekala niskala, Gubernur Bali Wayan Koster ngamedalang Peraturan Gubernur nomor 24 warsa 2020 indik ngalestariang danu, telebesan, tukad lan segara Sukra (10 Juli 2020). 

Gubernur Bali Wayan Koster maosan dasar medalne Pergub Nomor 24 warsa 2020. Kapertama toya majeng krama Bali pinaka taksu kahuripan lan pinaka sarana yadnya manut visi pembangunan daerah “Nangun Sat Kerthi Loka Bali” melarapan Pola Pembangunan Semesta Berencana nyujur Bali Anyar. Kaping kalih danu, telebesan, tukad lan segara ring Bali ring galah mangkin ngedikang lan kualitasne nedunan kantos patut katedungin antuk nilai-nilai Sad Kerthi ring upanaya nyuciang lan ngajegang Bali nyujur kahuripan krama Bali sane sukertha lan bagia niskala-sakala. Kaping tiga, Peraturan Gubernur puniki pinaka sikut uger-uger majeng pemerintah provinsi, kabupaten/ kota, desa adat lan krama ring sisi wewidangan, siki pulo, siki pola lan siki pengemong. Raris tatujon medalne Pergub nomor 24 warsa 2020 puniki inggih punika ngalestariang kawentenan daya dukung daya tampung, kawigunan danu, telebesan, tukad lan segara mangda setata presida nyadiayang toya ring kuantitas lan kualitas anggen nagingin sane kaanggen i manusa lan tiosan. Taler ngalestariang saking usak, leteh lan kagulgul olih pituduh jagat lan geginan manusa, setata resik lan nyucian danu, telebesan, tukad, segara lan  ngelaksanayang kearifan lokal.  

Kantun manut Gubernur Koster, ngalestariang danu, telebesan, tukad lan segara kalaksanayang antuk niskala lan sakala madasar saking tetamian lokal Sad Kerthi.  Kalaksanayang olih perangkat daerah sane ngalestariang danu, telebesan, sungai lan segara sareng pemerintah kabupaten/ kota lan desa adat. 

“Ngalestariang danau, telebesan, tukad lan segara saking niskala antuk sering ngelaksanayang yadnya nyucian,” teges Gubernur Koster. 

Upacara nyucian punika minakadi nyucian danu (Danu Kerthi),  nyucian segara (Segara Kerthi); lan  nyucian sarwaning tumuwuh (Wana Kerthi). Yadnta nyucian danu (Danu Kerthi) lan segara (Segara Kerthi) kalaksanayang nyabran Saniscara Kliwon Wuku Uye  (Tumpek Uye). Raris yadnya nyucian sarwa tumuwuh (Wana Kerthi) kalaksanayang nyabran Saniscara Kliwon Wuku Wariga (Tumpek Wariga/ Tumpek Atag). Raris indik undag yadnya minakadi: alit lan utama. Yadnya nyucian alit kemargiang nyabran 6 (nem) sasih kalender (pawukon) Bali olih desa adat. Yadnya nyucian sane utama kalaksanayang nyabran 5 (limang) warsa kalender (pawukon) Bali olih Pemerintah Provinsi. Tiosan olih Pemerintah Provinsi, krama taler dados ngelaksanayang manut dresta inucap. Tata titi pemargine nganutin sastra utawi dresta.   Yadnya nyucian puniki kalaksanayang sinarengan ring Bali.
 
“Ngalestariang danu, telebesan lan tukad saking sakala minakadi angga toya, sempadan, pemargin toya lan DAS/Sub DAS saking hulu kantos ke teben,” teges Gubernur Koster.  

Raris ngalestariang segara minakadi toya lan pesisi. Antuk sakala kalaksanayang olih Perangkat Daerah Pemerintah Provinsi sane ngemargiang baga sumber daya air, lingkungan hidup lan kehutanan mesikian sareng instansi inucap manut wenangne. Ring pemargi ngalestariang danu, telebesan, tukad lan segara,  desa adat patut ngaryanin pararem utawi awig-awig sane sekirangne nyurat nandur taru ringpemargi yadnya Tumpek Wariga, nenten nadosan krama desa adat, krama tamiu lan tamiu ngawag ngutang luhu, limbah lan tai, ngebah taru ring wewidangan danu, telebesan, tukad lan segara antuk ngicen sanksi. Desa adat ngalestariang newek utawi masikian sareng desa adat sane wewidangan lan angga tiosan. 

“Pare pangutsaha sane ngawigunayang danu, telebesan,  tukad lan segara patut ngalestariang antuk niskala lan sakala,” baos Gubenur Koster.

Indik ngalestariang  toya kalaksanayang olih perangkat daerah sane ngemargiang baga kelautan, setiosan perairan laut ring wewidangan Taman Nasional Bali Barat. Ngalestariang pesisi kalaksanayang olih pemerintah kabupaten/ kota setiosan Taman Hutan Raya Ngurah Rai yang kalaksanayang olih perangkat daerah sane ngemargiang baga kehutanan lan Taman Nasional Bali Barat sane kalaksanayang olih instansi inucap sane ngelaksanayang baga kehutanan. 

“Ngalestariang danu, telebesan, tukad lan segara kalaksanayang sinarengan antuk Pola Semesta Berencana nyabran Saniscara Kliwon Wuku Uye," teges Gubernur Koster. 

Gubernur Koster malih negesan ngalestariang kalaksanayang olih perangkat daerah sane ngemargiang baga sumber daya toya masikian sareng pemerintah kabupaten/ kota lan desa adat. Krama mangda urati magotong-royong. Kauratiang krama antuk newek, masekehe utawi organisasi.  

“Kauratiang marupa forum partisipasi parikrama ngalestariang danu, telebesan, tukad lan segara ring baga parencana pemargu utawi nureksa, nanem lan meliara taru miwah ngedasan luhu lan sesaduan majeng sane tempal utawi nenten adung pemargi ngalestariang danu, telebesan, tukad lan segara," sineb Gubernur Koster. (Gix/md)


TAGS :

Komentar