Koster Ngamedalan Perda Nomor 4 Warsa 2020 Indik Penguatan lan Pemajuan Kebudayaan Bali
- 16 Juli 2020
- 16:07 WITA
- News
DENPASAR, Balitopnews.com - Gubernur Bali Wayan Koster ngamedalan Perda Nomor 4 warsa 2020 indik Penguatan lan Pemajuan Kebudayaan Bali, ring Museum Bali, Respati 16 Juli 2020.
Manut Koster, penguatan lan pemajuan kebudayaan Bali pinska anggen nambakin kawentena obahne krama sane saking lokal, nasional lan global sane ngelimbak ring kawentena kebudayaan Bali lan tetincapanne, apisanan ngukuhang kebudayaan nasional lan ngewaliang Bali pinaka puser peradaban dunia/Bali Padma Bhuwana.
Perda puniki medaging 20 bagw lan 81 pawos sane pinaka upanaya Penguatan lan Pemajuan Kebudayaan kalaksanayang madasar asas sane kajiwain olih filosofi Tri Hita Karana sane mawit saking kearifan lokal Sad Kerthi, minakadi asas spiritualitas, kearifan lokal, kemanusian, gotong royong lan asas kasukerthan sane kamargiang ring siki wewidangan, siki pulo lan siki tata kelola madasar kesucian, kepatutan, kabecikan lan kaluwihan.
Indik puniki matetujon mangda dados sikut uger-uger rikala ngukuhang jati diri krama Bali, ngalestariang nilai-nilai kebudayaan, nincapan kebudayaan anggen nincapan kakukuhan budaya lan kontribusi budaya Bali majeng pakibeh jagat, nelebang kebudayaan ring kahuripan angga, krama lan lembaga, nincapan kasukerthan lan kasutreptian tata titi kahuripan krama Bali niskala lan sakala miwah nincapan apresiasi budaya lan ngajian pemilet penguatan lan pemajuan kebudayaan.
Nyujur tetujon sane kaapti, raris wewengkon saking peraturan daerah puniki antuk komprehensif ngenterang 15 aspek, indik objek penguatan lan pemajuan kebudayaan, penguatan lan pemajuan, tugas lan wewenang, majelis kebudayaan Bali, ekosistem kebudayaan, apresiasi budaya, Pesta Kesenian Bali, Jantra Tradisi Bali, Festival Seni Bali Jani, Perayaan Kebudayaan Dunia, ngajian, kauratiang krama lan prasarana, prebea, sanksi.
19 Objek penguatan lan pemajuan kebudayaan inucap minakadi kearifan lokal, ritus, benda sakral, pengetahuan tradisional, teknologi tradisional, pengobatan tradisional, tradisi lisan, manuskrip, ritus, adat istiadat, seni, arsitektur tradisional, bahasa lan aksara, permainan rakyat, olahraga tradisonal, kerajinan, desain, busana lan boga. Objek penguatan lan pemajuan kebudayaan punika mawit saking warisan budaya wit Bali, budaya serapan, utawi hasil kreasi anyar krama Bali.
Sane anya kaenterang ring Perda puniki inggih punika Ceraken Kebudayaan Bali pinaka sistem ngolah cakepan kebudayaan mapad mabasis teknologi digital, Jantra Tradisi Bali pinaka kegiatan apresiasi budaya tradisi anggen mikukuhin lan nincapan kearifan lokal, pengetahuan tradisional, teknologi tradisional, pengobatan tradisional, permainan rakyat lan olah raga tradisional, Festival Seni Bali Jani pinaka wahana nincapan kesenian modern, kesenian kontemporer lan kesenian sane pinaka inovatif; lan perayaan kebudayaan dunia pinaka upanaya diplomasi budaya ringforum internasional anggen ngewaliang Bali pinaka puser peradaban dunia / Padma Bhuwana. Pesta Kesenian Bali, Jantra Tradisi Bali, Festival Seni Bali Jani, lan perayaan kebudayaan dunia kalaksanayang nyabran warsa.
Sane anyar taler kaenterang ring Perda puniki inggih punika katangianne Majelis Kebudayaan Bali (MKB) sane medue amonga ngicen pikayu lan tetimbang majeng pemerintah rikala ngukuhang lan nincapan kebudayaan, ngewantu dinas ngelaksanayang pendataan, standarisasi lan sertifikasi lembaga lan sumber daya manusia baga kebudayaan. (gix)
Komentar