Menhub RI Nguningan Bali Aget Medue Wayan Koster
- 03 Agustus 2020
- 20:08 WITA
- News
NUSA PENIDA - Ground Breaking pelabuhan Nusa Penida ringSampalan lan Pelabuhan Nusa Ceningan ring Bias Munjul, miwah sane nyikiang ke Pelabuhan Sanur ribg Matahari Terbit utawi kaloktah antuk Pelabuhan Segi Tiga Emas ring Bali puniki kakawitin Menteri Perhubungan (Menhub) RI, Budi Karya Sumadi sareng Gubernur Bali, Wayan Koster, Ketua DPRD Bali, I Nyoman Adi Wiryatama lan Kejaksaan Tinggi Bali ring rahina Purnama, Soma, Umanis, Tolu (3 Agustus 2020)
Yadiastun masan gering Covid-19 puniki Pemerintah Pusat ngemargiang refocusing anggaran, sakemaon satya Pemerintah Pusat melarapan Presiden RI, Joko Widodo jagi ngewangun infrastruktur pelabuhan punika yukti-yukti kemargiang lan anggaran sane kamedalan Kementrian Perhubungan RI anggen ngewangun Pelabuhan Segi Tiga Emas ring Bali punika makehnyane Rp 450 Milyar.
"Rahina mangkin tanjek becik ngemargiang Ground Breaking pelabuhan puniki, santukan numpel rahina Purnama, kantos titiang ngaturang angayu bagia program puniki memargi lan kaabih becik olih Bapak Menteri Perhubungan, Budi Karya Sumadi,” baos Gubernur Bali, Wayan Koster ring Pelabuhan Nusa Penida, Sampalan.
Wayan Koster ring ajeng krama Nusa Penida, Bupati Klungkung, Nyoman Suwirta, Ketua DPRD Klungkung, Anak Agung Gde Anom, lan Kepala Kejari Klungkung, Otto Sompotan taler nguningan indik ring pinanggal 22 April 2019, dane masadu ajeng sareng Bapak Presiden Joko Widodo ring Istana Jakarta, lan nunas wantuan anggaran pembangunan infrastruktur. Pikolihne anggaran sane katunas Wayan Koster saking APBN Kementerian Perhubungan RI punika presida tedun antuk perjuangan Gubernur Koster melarapan Menteri Perhubungan, Budi Karya Sumadi. Kantos mangkin, Kementrian Perhubungan presida ngarealisasian pembangunan pelabuhan punika. Yadiastun ring jeg APBN wenten kakitangan santukan Covid-19.
Baos Koster, program puniki pinaka implementasi pembangunan infrastruktur darat, laut lan udara antuk materintegrasi lan makoneksi ring visi Nangun Sat Kerthi Loka Bali melarapan Pola Pembangunam Semesta Berencana nyujur Bali Anyar.
Tiosan raris Sekretaris Ditjen Perhubungan Darat, Imran Rasyid maosang Demand Transport ke Wilayah Kecamatan Nusa Penida sane ngawewengkonin Nusa Penida, Nusa Lembongan lan Nusa Ceningan sampun kawangun antuk makeh sapangrauh Wisatawan Domestik lan Wisatawan Mancanegara, sane nyabran rahina kantos 3.913 diri sakemaon durung wenten fasilitas pelayanan anggen munggah nedunan penumpang sane becik.
"Majeng kawentenang punika, Pemerintah Pusat melarapan Kementerian Perhubungan ngigumin usulan Pemerintah Daerah mangda nyadiayang Anggaran Pembangunan Pelabuhan Nusa Penida ring Sampalan lan Pelabuhan Nusa Ceningan ring Bias Munjul ring APBN Kementerian Perhubungan Warsa Anggaran 2020, antuk prebea suwang-suwang Pelabuhan Sampalan Rp. 88.151.324.700 ngawewengkonin pekaryan Brakwater, Pengerukan Kolam, Dermaga Fast Boat, Terminal Penumpang, genah Parkir palinggihan lan Prasarana margi," teges dane.
Majeng pelabuhan Bias Munjul Rp. 112.403.019.700 antuk pekaryan ngeduk genah pelayaran Dermaga Moveable Bridge, Dermaga Fast Boad, Terminal Penumpang miwah genah parkir Mobil lan Sepeda Motor. Sekretaris Ditjen Perhubungan Darat, Imran Rasyid nyaduang ring pemargi Pembangunan Pelabuhan Sampalan lan Pelabuhan Bias Munjul puniki, duk ngawitne karencanayang kapuputang ring awarsa anggaran, sakemaon santukan wenten Covid-19 lan ring pemargi pekaryan patut nganutin protokol kesehatan, raris kemargiang dados kalih warsa anggaran antuk undag anggaran warsa I majeng Pelabuhan Sampalan Rp. 38.980.495.000 lan Pelabuhan Bias Munjul Rp. 37.091.571.571.800. Raris ring undag ping II majeng Pelabuhan Sampalan Rp. 49.757.910.000 lan Pelabuhan Bias Munjul Rp. 75.312.448.900, indik puniki sampun kasaduang lan sampun kaigumin bapak Menteri.
Mireng gatra punika Menhub RI, Budi Karya Sumadi duk mapidarta nguningan Bali pinaka aget medue Wayan Koster, santukan memperjuangkan Bali lan Nusa Penida. Pinaka hadiah, tiosan nedunan wantuan APBN anggen ngewangun Pelabuhan Nusa Penida ring Sampalan lan Pelabuhan Nusa Ceningan ring Bias Munjul, Menhub RI taler masemaya pacang ngicen kapal disampu pelabuhanne puniki puput ring warsa 2021, kantos akses nyeberang saking lan ke Nusa Penida memargi becik lan trepti.
"Indik puniki anggen nyunggi konsep Presiden sane mekayunan nadosan Bali sane super hub tourism. Dumogi pembangunan pelabuhan puniki presida nyunggi pariwisata ring wewidangan Nusa Penida," ucap Menhub RI sane ngangken sampun uning Nusa Penida saking SD, duk melajah ilmu bumi (geografi, red) sane kspanggih dahat luwih antuk pulau alit ring kelod kangin Pulau Bali punika.
Pinaka penyineb, Budi Karya Sumadi ngaturang salam Presiden Jokowi majeng krama Bali lan Nusa Penida. Menhub Budi maosang, Presiden dahat asih majeng Bali, munggwing asapunika Presiden Jokowi nguratiang pisan ring kawentenang Bali.(gix)
Komentar