Sekda Dewa Indra Nyumbungan Kawangunne Organisasi Geginan Panureksa Keuangan
- 04 Agustus 2020
- 22:08 WITA
- News
DENPASAR, Balitopnews.com - Sekretaris Daerah Provinsi Bali Dewa Made Indra nyanggra becik lan nyumbungan kawangunne Institut Pemeriksaan Keuangan Negara (IPKN), pinaka organisasi geginan sane ngawengkonin panureksa keuangan negara. Indik punika kategesan duk ngerauhin parikrama sosialisasi ngewangun IPKN ring Aula Kantor BPK RI Perwakilan Bali, Anggara 4 Agustus 2020.
Manut Dewa Indra, indik punika patut kaicen santukan organisasi puniki katangian antuk pikayun lan tetujon sane becik inggih punika nincapan profesionalisme pejabat panureksa. Napi malih organisasi puniki taler pungkuran pacang nyurat kode etik sane dados sikut uger-uger majeng pejabat panureksa rikala ngelaksanayang amongan ngangsan profesional. Dewa Indra ngawewehin pemerintah dahat ngaptiang pejabat panureksa sane kredibel sane profesional santukan indik punika makilitan sareng kapercayan krama.
“Yening pejabat panureksane profesional, kepercayan krama ring tata kelola administrasi keuangan pemerintah pacang ngangsan becik lan indik puniki janten pacang ngicen yus becik majeng birokrasi,” baosne.
Birokrat saking Singaraja puniki ngaptiang tetangi IPKN dados baga saking upanaya nyujur tata titi panureksan sane ngangsan profesional.
Tiosan raris Kepala BPK RI Perwakilan Bali Sri Haryono Suliyanto negesin, tetangi IPKN pinaka amanat Permenpan RB Nomor 49 warsa 2018 indik Jabatan Fungsional Pemeriksa. Permenpan RB punika nyurat indik “BPK medue amongan ngefasilitasi embasne organisasi profesi Jabatan Fungsional Pemeriksa” lan “tetangi organisasi profesi pinih suwene 5 (limang) warsa saking Peraturan Menteri PAN lan RB kemargiang.
Tetangi IPKN matetujon anggen nincapan lan ngawigunayang potensi panureksa majeng kepentingan bangsa lan negara. IPKN ngelaksanayang parikrama sekadi nincapan standar panureksan, nincapan metodologi, teknik lan tiosan miwah praktik panureksan sane becik. Tiosan punika taler ngelaksanayang parikrama nincapan geginan majeng kramane, ngelaksanayang tetulad majeng krama lan masikian sareng organisasi geginan tiosan ring wewidangan nasional lan internasional.
Parikrama sosialisasi taler kalanturang antuk nyodi aran-aran sane dados prejuru IKPN Wilayah Bali. Ketua BPK RI Sri Haryono Suliyanto pinaka ketua, Sekda Provinsi Bali Dewa Made Indra pinaka Dewan Konsultatif kasarengin kalih angga tiosan inggih punika Ketua Ikatan Akuntan Indonesia (IAI) Wilayah Bali Made Gede Wirakusuma lan Prof. Dr. I Made Arya Utama. Raris Kepala BPKP Perwakilan Bali Ari Dwikora Tono lan Inspektur Provinsi Bali I Wayan Sugiada suwang-suwang dados pinaka Ketua I lan Ketua II.(gix)
Komentar