GPDRR 2022 Kaaptiang Presida Dados Parikrama Promosi Bali Pinaka Pariwisata "Aman Bencana"
- 01 Oktober 2020
- 20:10 WITA
- News
DENPASAR, Balitopnews. com – Bali kajodi pinaka genah parikrama Global Platform for Disaster Risk Reduction (GPDRR) sane pacang kemargiang ring 2022 sane rauh. Parikrama maundag internasional puniki kaaptiang presida dados tanjek promosi majeng Bali pinaka pariwisata aman bencana ring jagate.
Asapunika kaodar duk Deputi Bidang Sisban Strategi Badan Nasional Penanggulangan Bencana (BNPB) Wisnu Widjaja mesadu ajeng sareng Gubernur Bali Wayan Koster sane rauh jagi maosan parikrama punika, Respati (1 Oktober 2020) ring Jayasabha, Denpasar.
Ring pemahbah pesadu ajeng punika, Gubernur Koster nguningan indik Bali nenten surud maupanaya ngunggahang napi sane dados rekomendasi saking pemerintah pusat indik pariwisata aman bencana, taler rikala nyanggra kawentenanne mangkin indik nambakin gering COVID-19.
"Ring galah mangkin Bali kantun wenten ring wewidangan zona barak. Sakemaon titiang setata ngemargiang awig ngunggahang protokol kesehatan majeng kramane,” baos Gubernur sane sedurungne menjabat dados anggota DPR RI tigang periode puniki.
Gubernur Koster taler ngaptiang antuk pasikian saking pemerintah daerah lan kauratiang kramane Provinsi Bali presida setata nedunan pangelalah COVID-19. Kantos Bali presida sayaga lan trepti ring parikrama GPDRR warsa 2022 sane jagi rauh.
Sedurungne Deputi Bidang Sisban Strategi BNPB Wisnu Widjaja maosan indik kajodine Indonesia utamane Bali pinaka tuan rumah GPDRR 2022 puniki, polih dados galah majeng pemerintah Indonesia lan Provinsi Bali jagi nincapang promosi pariwisata mabasis ngirangin pengrauh bencana ring undag internasional.
“Pinaka pemargi luwih majeng Indonesia, utamane Bali pinaka dados tuan rumah GPDRR ring warsa 2022 sane jagi rauh. Parikrama puniki presida dados galah promosi pariwisata Bali ring undag internasional,” baos Wisnu Widjaja
GPDRR pinaka forum multi-pemangku kepentingan makalih warsa sane kawangun olih Badan Perserikatan Bangsa-Bangsa (PBB) anggen nureksa tetincap makudang pengetahuan lan maosan tetincap lan indik pinih anyar ngirangin pengrauh bencana.
Parikrama sane kemargiang ring warsa 2022 sane jagi rauh puniki katarka pacang karauhin olih 182 negara minakadi saking pejabat tinggi pemerintah, lembaga nonpemerintah, akademisi, sektor wisata lan media.
Tiosan raris Kementerian Luar Negeri Republik Indonesia kantun nyantos keputusan lan paiguman saking pikolih pengkajian saking makasami. Santukan makeh indik sane patut kakayunin indik pemargi parikrama ageng puniki. (Gix)
Komentar