Nincapang PAD, Gubernur Koster Jagi Midabdabin Becik Aset Daerah.
- 20 Oktober 2020
- 20:10 WITA
- News
DENPASAR, Balitopnews.com - Gubernur Bali Wayan Koster mapangapti mangda nenten banget ngandelang kawentenan pendapatan Pemprov Bali saking kendaraan bermotor sane kawentenane nyemerin palemahan, silih tunggil ipun antuk midabdabin becik kawentenan aset duwen Pemprov Bali.
Sangkaning punika, Dane nyanggra becik indik pamargin Rapat Koordinasi Optimalisasi Pendapatan Daerah dan Manajemen Aset Daerah Provinsi Bali sane ngrauhang Komisi Pemberantasan Korupsi (KPK) RI ring Gedung Wiswa Sabha Utama, Kantor Gubernur Bali, Renon, Denpasar, Anggara 20 Oktober 2020.
Gubernur Koster maosang,pinaka genah wisata, palemahan jagat Bali majanten patut katitenin becik. Palinggihan utawi kendaraan sane sayan akeh sampun karasayang ngawetuang macet maweweh malih antuk kawentenan udara sane sayan cemer.
“Sangkaning punika tiang nenten wenten manah malih nincapang kawentenan pendapatan asli daerah (PAD) sane mawit saking kendaraan bermotor. Sampun sapatutnyane ngambil pamargi sane tiosan sajeroning nincapang kawentenan pendapatan asli daerah mawinan nenten raris nyemerin palemahan wiadin ngawetuang pikobet sosial sane tiosan. Manawi sane prasida kaambil wantah antuk midabdabin becik aset daerah Pemerintah Provinsi Bali sane akeh,” sekadi punika baosnyane.
Gubernur Koster ngawewehin, melarapan antuk Rakor puniki, KPK RI kaaptiang prasida ngicen tuntunan saha conto sane wenten ring wewidangan tiosan, sane manawi prasida kamargiang ring Bali. Manutnyane, Pemprov Bali antuk kapamucukan Dane, setata mautsaha midabdabin tata kelola pemerintahan mangda sayan becik.
Mapaiketan ring tujuh area intervensi Korsupgah KPK RI, Gubernur Koster maosang sampung ngamedalang instruksi mawinan pamarginipun prasida trepti, saha jagi setata kaselehin mawinan capaian MCP (Monitoring Centre for Prevention) Korsupgah Provinsi Bali ring galahe mangkin wenten ring 84,30 persen.
“Kakantenang rumasuk ageng imbangang ring provinsi tiosan ring Indonesia. Titiang ngamanahin kawentenane prasida katincapang malih. Karyanang manten anceng wiadin target ring awarsa sane jagi rauh. Tiang sane jagi setata nyelehin kawentenane,” baos Dane Ketua DPD PDIP Provinsi Bali.
Kepala Satgas Koordinator Pencegahan Wilayah IX KPK Sugeng Basuki maosang, nilai nilai MCP Bali sane kantos 84 majanten becik kawentenane. Saantukan standar nasional ring galahe mangkin wantah posisi 40 saha 75 sampun ngranjing nilai sane becik.
Sugeng maosang, Bali kaaptiang prasida ngranjing ring tiga besar sajebag Indonesia. “Pangaptine majeng provinsi Bali napi malih antuk agengnyane pangaat wiadin komitmen saking Bapak Gubernur sajeroning nincapang nilai MCP, mugi ring warsa 2020 prasida ngranjing ring 3 besar.,” baosnyane.
Manunyane MCP wantah dados geguat wiadin indikator tata kelola pemerintahan sane becik. Sangkaning punika penindakan ketahipun katujuang ring wewidangan sane nilai ipun alitan ring 40.
Sugeng maosang yening saking 7 intervensi sane kalaksanayang antuk Korsupgah, ring warsa 2020 puniki ngunggahang unteng nincapang pendapatan daerah miwah penyelamatan pengamanan aset daerah. Makakalih parindikan punika manutnyane kantun akeh manggihin pikobet. Melarapan antuk midabdabin saha nangiang malih pendapatan daerah, kasukertan ASN ring pemda jagi sayan becik saha kasukertan krama taler prasida kakardinin.
Pialang ring galahe mangkin sane kaarepin wantah ring pariwisata Bali, sane muatang pamargi-pamargi anyar mawinan prasida ngarepin kahanan sane sekadi mangkin. “Kawiaktiannyane kantun akeh pendapatan-pendapatan daerah sane wenten, mawinan pendapatan daerah puniki mangda kapidabdabin becik,” baosnyane.
Sekretaris Daerah Provinsi Bali Dewa Made Indra maosang, Pemprov Bali sampun nglaksanayang napi sane kanikain antuk KPK RI mapaiketan ring pengelolaan pemerintahan mangda sayan kabecikang. Silih tunggil ipun ring widang manajemen aset saha ring panguntat warsane puniki samian aset Pemprov Bali kaaptiang sampun kasertifikasi.(Gix_)
Komentar