Wagub Cok Ace Nyumbungan Amongan KPID Antuk Ngukuhang Lembaga Penyiaran
- 21 Oktober 2020
- 19:10 WITA
- News
DENPASAR, Balitopnews.com - Wakil Gubernur Bali Tjokorda Oka Artha Ardhana Sukawati (Cok Ace) nyumbungan amongan Komisi Penyiaran Indonesia Daerah (KPID) Bali ring ngukuhang lembaga penyiaran. Indik punika kabaosan duk nampa audiensi Ketua KPID Bali I Made Sunarsa lan jajaran ring Ruang tamu Kantor Wakil Gubernur, Buda 21 Oktober 2020.
Wagub Cok Ace nguningan KPID medue amongan strategis rikala nincapne kawentenan media online. Guru Besar ISI Denpasar puniki ngaptiang, lembaga penyiaran sane wenten ring sor pengawasan KPID setata ngicen pegalang lan orti penuda hoax.
"Ring masan gering lan malih ajebos malih iraga taler pacang nyanggra Pilkada, iraga dahat ngaptiang lembaga penyiaran ngicen orti sane mawiguna lan dados sasikut majeng krama mangda uning napi sujatine memargi," bawosne.
Nyawis pengaptin Wagub Cok Ace, Ketua KPID Made Sunarsa nguningan indik lembaga sane kapimpinne nenten wantah nguleng ring pengawasan, sakemaon taler ngamongin ring upanaya ngukuhang lembaga penyiaran.
Sunarsa nguningan, lembaga penyiaran sekafi radio lan televisi sane pinaka pupulan media konvensional ring galah mangkin mangguh tantangan sane ngangsan abot. Sinalih tunggil tantangan sane kapangguh inggih punika madesekne lembaga penyiaran olih kawentenan media online. Pinaka lembaga sane makilitan sareng penyiaran, KPID nenten kayun kaon lan setara maupanaya ngelaksanayang pengukuh.
"Titiang nenten dados kaon, santukan mangkin lembaga penyiaran konvensional tetep dados sumber informasi sane patut kagugu," ucap dane.
Pinaka dudonan saking upanaya ngukuhang lembaga penyiaran, KPID Bali pacang ngawentenang parikrama mamurda 'Gema Cipta 2020', saking pinanggal 4 November 2020 kantos 3 Desember 2020. Parikrama puniki pacang kadagingin antuk makudang pemargi inggih punika nyobyahang nyanggra era televisi digital lan pacentokan kreatif iklan layanan masyarakat cintai penyiaran Indonesia.
Apisanan Gema Cipta 2020, KPID taler pacang ngedumang 1000 radio majeng krama. "Sane kaeduman wantah radio, dadosne nenten presida kaanggen tiosan. Melarapan parikrama punika titiang meled nyihnayang indik wenten krama sane kantun mirengan radio," pawewehne.
Acara tiosan, ring pinanggal 19 November 2020 sane numpel rahina Respati, KPID ngewajiban makasami lembaga penyiaran ring Bali ngangge Bahasa Bali ring siaranne sesampun galah 12.00 wita antuk suwe nyane sekirangne 15 menit. Tiosan saking punika taler patut ngangge Busana Adat Bali.
Manut Sunarsa, indik puniki matetujon mangda ngangsan nincap pemargi Peraturan Gubernur Bali No.80 warsa 2018 indik Pelindungan kan Penggunaan Bahasa, Aksara lan Sastra Bali Serta Penyelenggaraan Bulan Bahasa Bali miwah Peraturan Gubernur Nomor 79 warsa 2018 indik Hari Penggunaan Busana Adat Bali. Kekalih parikrama selanturne inggih punika ngelaksanayang radio akademi lan penganugerahan KPID Award majeng insan penyiaran.
Mangda memargi antar dudonan Gema Cipta 2020, KPID Bali dahat kaaptiang ogokan saking Pemprov Bali. Wagub Cok Ace sane kaabih Kepala Bidang Informasi lan Komunikasi Publik Diskominfos Provinsi Bali Ida Bagus Ketut Agung Ludra nguningan indik dane ngapti Gema Cipta 2020 memargi antar. Napi malih puniki matetujon anggen ngukuhang lembaga penyiaran.(gix)
Komentar