Gubernur Bali Wayan Koster : Pergub 1/2020 Prasida Nangiang Arak Bali Manados Produk Industri
- 21 Oktober 2020
- 20:10 WITA
- News
DENPASAR, Balitopnews.com - Gubernur Bali Wayan Koster maosang yening kawentenan arak Bali sayan kasub kawentenane saha kakantenang prasida manados produk industri. Parindikan puniki nenten lempas saking kawentenan Peraturan Gubernur (Pergub) Bali Nomor 1 Warsa 2020 indik Tata Kelola Minuman Fermentasi dan/atau Destilasi Khas Bali.
Sekadi punika kabaosang antuk Gubernur Koster ring selagan parikrama ri kala nyanggra pangrauh audiensi Politeknik Negeri Bali ring Rumah Jabatan Gubernur Bali, Jaya Sabha, Denpasar, Buda (21 Oktober 2020)
Dane nenten sumanangsaya, yening minuman tradisional Bali puniki jagi manados barang industri sane prasida masaing sareng minuman tradisional saking panegara tiosan sekadi sake wiadin soju. “Titiang setata nyobyahang produk lokal puniki rauh ring Jakarta. Para wisatawan akeh sane seneng saha ngangkenin indik kabecikan arak Bali. Sangkaning punika, titian nenten sumanangsaya yening arak Bali ring selanturipun prasida sayan nglimbak manados produk industri, prasida masaing sareng sake, soju utawi vodka,” baos Ketua DPD PDI perjuangan Bali punika.
Manutnyane panglimbak kawentenan arak Bali sane sampun nampek sareng usaha industri, sangkaning kamedalangnyane Pergub Bali Nomor 1 Warsa 2020. “Ngawit kamedalang Pergub Nomor 1 warsa 2020, kawijakan punika mawesana becik majeng para petani wiadin krama sane makarya arak tradisional. Arak Bali sayan akeh kasenengin antuk krama,” baos Dane.
Kawijakan Pergub punika kakantenang taler mawesana becik majeng kasukertan krama pamekas sajroning nangiang kawentenan produk-produk lokal Bali. “Wau ring galahe mangkin manawi wenten produk lokal sane prasida sayan nglimbak risampune kamedalang kawijakan saking gubernur (Pergub, red). Napi malih durung awarsa kamedalang, kawijakan punika sampun macihna saha mawiguna pisan ring tengahing krama,” baosnyane.
Gubernur saking Sembiran, Buleleng ngawewehin, arak Bali ring masa pandemi puniki kakantenang taler prasida kaanggen tamba ‘usadha’ saha sampun mabukti ngawinang krama sane keni sungkan Covid-19 sayan gelis kenak.
Madasar antuk punika, mangda arak Bali prasida dados produk industri, anggannyane jagi maprakanti sareng perguruan tinggi sajroning nglimbakang produk lokal Bali puniki. “Sayan akeh kauningin antuk para jana majanten pangarsa majeng produk puniki jagi sayan akeh. Proses ipun ring galahe mangkin majanten kantun tradisional. Yening piranti sane modern prasida kakaryanin antuk wantuan saking angga perguruan tinggi, produksi jagi sayan akeh saha galah produksi prasida sayan cendet. Samian taler sampun kauningayang mangda nganggen sumber daya sane wenten ring Bali, sepisanan prasida nangiang ekonomi krama,” Dane nyutetang.
Direktur Politeknik Negeri Bali I Nyoman Abdi taler nyanggra becik pangaptine punika. Angannyane sane mangkin kantun midabdabin alat destilasi antuk teknologi tepat guna sane dangan kaanggen ring desa-desa sane ngasilang arak. “Konsep ipun wantah marupa piranti destilasi sane prasida kaanggen antuk krama desa, mawinan produksi arak nenten suwe, prabea sane kamedalang taler nenten akeh. Antuk punika produksi arak jagi sayan akeh saha pamuputne prasida nincapang kasukertan krama wiadin petani,” Dane nlatarang. (Gix)
Komentar