Jusuf Kalla Ngamikukuhang Pengurus miwah Dewan Kehormatan PMI Provinsi Bali
- 28 Oktober 2020
- 19:10 WITA
- News
DENPASAR, Balitopnews.com - Palang Merah Indonesia (PMI) pinaka silih tunggil organisasi sane sampun suwe wenten ring Indonesia sane madue amongan ring widang kemanusiaan wiadin parikrama sosial. Kawentenan PMI dahat mabuat ring widang kemanusiaan wiadin sosial. PMI dados silih tunggil pamucuk sajroning ngarepin pandemi Covid-19, saha nenten karasayang antuk krama ring Indonesia rumasuk Bali sampun ngeranjing ring tatanan kehidupan era baru. Pencegahan, penanggulangan wiadin distribusi wantuan saking relawan setata kalaksanayang sajroning ngaluputang kawentenan pandemi Covid-19.
Parindikan puniki kabaosang antuk Wakil Gubernur Bali Tjokorda Oka Artha Ardhana Sukawati ri kala ngwacen sambrama wacana Gubernur Bali sajroning pamargin Pamikukuhan Pengurus miwah Dewan Kehormatan PMI Provinsi Bali, ring Gedung Wiswa Sabha Utama, Buda (28 Oktober 2020)
Dane ngawewehin, ring masa pandemi Covid-19, PMI nganutin ring amongannyane setata mautsaha ngamargiang swadarmannyane sabecik-becikne melarapan antuk parikrama donor darah sane katur majeng sira ugi krama sane kayun donor darah wiadin therapi plasma convalescent sane majanten mabuat kawentenane.
PMI Provinsi Bali pinaka pahan saking organisasi Palang Merah Indonesia ring warsa 2020 puniki, sampun nglaksanayang daging AD miwah ART melarapan antuk nglaksanayang Musyawarah Provinsi (MUSPROV) XI PMI Provinsi Bali sane kalaksanayang satunggil limang warsa, antuk silih tunggil parikramanipun ngamikukuhang Ketua Pengurus masa bhakti 2020-2025.
Ring pamikukuhan pengurus wiadin dewan kehormatan PMI, Jusuf Kalla pinaka Ketua Umum PMI ngamikukuhang Pengurus miwah Dewan Kehormatan PMI Bali Palang Merah Indonesia (PMI), pinaka paguyuban nasional sane kasayubin antuk Undang-undang Nomor 1 Warsa 2018 indik Kepalangmerahan miwah Peraturan Pemerintah (PP) Nomor 7 Warsa 2019 indik Peraturan Pelaksanaan UU Nomor 1 Warsa 2018 indik Kepalangmerahan.
I Gusti Bagus Alit Putra kapikukuhang malih antuk aklamasi pinaka Ketua Pengurus PMI Provinsi Bali masa bhakti 2020-2025, melarapan antuk kawentenan SK Pengurus Pusat PMI Nomor : 051/KEP/PP.PMI/X/2020 Tanggal 8 Oktober 2020 nganinin indik Pengurus PMI Provinsi Bali masa bhakti 2020-2025 miwah Nomor : 069/KEP/PP.PMI/IX/2020 Tanggal 29 September 2020 indik Dewan Kehormatan PMI Provinsi Bali masa bhakti 2020-2025, saha kaaptiang prasida dados pangaat anyar majeng para prajuru sane anyar, mawinan PMI prasida sayan becik.
Ketua Umum PMI Muhammad Jusuf Kalla ngamikuhang langsung 17 (pitulas) Prajuru miwah 7 (pitu) diri Dewan Kehormatan PMI PMI Provinsi Bali masa bhakti 2020-2025, sane mawit saking Tokoh Masyarakat, Anggota DPRD, Pengusaha, Birokrat wiadin Pejabat Pemerintah. Anggannyane taler ngaptiang mangda anggota PMI prasida ngaturang ayah sabecik-becikne majeng krama riantukan amongan PMI wantah ngayah ring krama tiosan.
"Antuk silih tunggil amongan utama nglaksanayang donor darah, PMI wantah angga sane madue amongan ngwantu sira ugi, pamekas pikobet wiadin sengkala sangkaning wenten bencana, riantukan samian kabuatang saling wantu saha masikian, pantaraning pusat sareng daerah, inggian bencana sane nibenin ring Indonesia rauhing ring mancanegara,"Baos Jusuf Kalla.
Ring pamikukuhan Pengurus miwah Dewan Kehormatan PMI Provinsi Bali kalaksanayang antuk ngamargiang Protokol Kesehatan nees panglimbak Covid-19, pamekas antuk ngamargiang 3M, inggian nganggen Masker, ngwajikin tangan rauhing jaga jarak. "Mapaiketan ring kawentenan Covid-19, Jusuf Kalla nuekang yening rasa eling samian angga sajroning ngamargiang becik 3M (nganggen masker, ngwajikin tangan, jaga jarak) wantah pinaka dasar utama sajroning nambakin panglimbak virus corona, mawinan samian saling nyaga," Jusuf Kalla ngawewehin.
Jusuf Kalla maosang yening ring masa pandemi Covid-19 puniki, parikrama sane sampun kalaksanayang antuk anggota PMI sane maprakanti sareng Pemerintah wiadin angga tiosan, minakadi penyemprotan disinfektan ring makudang-kudang genah sane katureksain dangan nglimbakang kawentenan covid-19, sekadi pasar, terminal wiadin genah umum tiosan.
Pamargin pamikukuhan puniki karauhin antuk Wakil Gubernur Bali, Ketua DPRD Bali, Pangdam IX/Udayana, Kapolda Bali, Ketua PMI Kabupaten/Kota Sajebag Bali wiadin angga sane tiosan. (Gix_)
Komentar