Mungkah FSBJ II, Gubernur Koster Mautsaha Ngwangun Ekosistem Pemajuan Seni Modern, Kontemporer, Miwah Karya Inovatif Tiosan.
- 31 Oktober 2020
- 23:10 WITA
- News
DENPASAR, Balitopnews.com - Gubernur Bali Wayan Koster mungkah Festival Seni Bali Jani (FSBJ) II warsa 2020 ring Gedung Ksirarnawa, Art Centre, Saniscara 31 Oktober 2020.
FSBJ ring galahe mangkin ngunggahang unteng #BaliArtsVirtual sane jagi kamargiang antuk virtual melarapan kanal YouTube resmi druwen Dinas Kebudayaan (Disbud) Provinsi Bali, ngawit tanggal 31 Oktober kantos 7 November 2020.
Gubernur Koster nguningayang yening anggannyane setata sumeken midabdabin festival puniki pinaka genah sajroning ngajiang para pelaku seni pamekas seni modern. Festival puniki pinaka genah sajroning misuguhang makudang-kudang kawagedan para seniman, sapisanan pinaka pangupaya ngwangu ekosistem pemajuan seni modern, kontemporer, wiadin karya inovatif tiosan.
“Tiosan ngajiang kawentenan pelaku seni tradisi sane sampun kaingkupang ring Pesta Kesenian Bali (PKB), pemerintah taler ngicen genah majeng seni modern melarapan antuk FSBJ puniki, sane ring galahe mangkin pinaka parikrama kaping kalih. Antuk punika, Bali sane mangkin madue kalih genah anggen ngingkupang widang seni. Mogi program puniki sayan becik pamekas ring kualitas, saha makakalih program taler sayan ngalimbak wiadin nincap satunggil warsa,” baosnyane.
Antuk kairing Putri Koster miwah Wagub Tjokorda Oka Artha Ardana Sukawati (Cok Ace), Gubernur Koster mawali nuekang yening parikrama puniki, tiosan matetujon nyokong kalestarian kabudayan Bali bilih-bilih selami pandemi, taler pinaka cihna kasumekenan sajroning ngamargiang Perda Nomor 4 warsa 2020.
“Perda punika nguningayang indik Penguatan miwah Pemajuan Kebudayaan Bali sane kapikukuhang daweg 9 Juli 2020, saha anut sareng visi Pembangunan Provinsi Bali 2018-2023, Nangun Sat Kerthi Loka Bali melarapan Pola Pembangunan Semesta Berencana Nyujur Bali Era Baru,” baosnyane.
“Bali nenten madue sumber daya alam, mawinan patut bagia Bali wibuh antuk seni miwah budaya sane mautama. Kabudayan puniki jagi setata rajeg selami kramanipun kantun maurip saha kayun nindihin sapisananan nglimbakang kabudayan sane kaduwenang,” Dane nuekang.
Kepala Dinas Kebudayaan Provinsi Bali, Prof.Dr. I Wayan 'Kun' Adnyana S.Sn.,M.Sn, nlatarang pamargin seni virtual ring galahe mangkin kaaptiang prasida misuguhang sahananing reriptan seni sane kreatif, elaborasi, miwah eksplorasi mapaiketan ring estetik, stilistik, teknik artistik, wiadin tematik. Rumasuk olah wahana utawi media (ngawigunayang makudang-kudang piranti media sane anyar/digital risajroning misuguhang reriptan seni).
"Pamargin parikrama festival antuk virtual puniki pinaka wentuk transformasi sosial majeng krama Bali. Irika jagi wenten pamargin alih pengetahuan wiadin keterampilan ring Bali. Minakadi mapaiketan sareng proses persiapan wiadin produksi ri kala misuguhang reriptan komunal antuk daring, rumasuk sapunapi krama manonton wiadin ngresepang pamisuguhan seni inucap," baos Kun Adnyana.
Kun Adnyana ngawewehin, FSBJ II ngunggahang unteng 'Candika Jiwa: Puitika Atma Kerthi', sane pitegesipun ring basa Indonesia semesta kreativitas terkini dalam 'mencandikan' jiwa, spirit, taksu, utawi ide-ide cemerlang. Parikrama. Puniki misuguhang makudang-kudang parikrama seni minakadi Pawimba (Lomba), Adilango (Pergelaran), Megarupa (Pameran), Timbang Rasa (Serasehan), Beranda Pustaka (Bursa Buku), miwah Penghargaan Bali Jani Nugraha. Parikrama kamiletin antuk 45 sanggar/yayasan/komunitas seni sajebag Bali sane nyarengang kirang langkung 1.000 seniman wiadin pekerja seni.
Sajroning acara pamungkah kapisuguhang Adilango (pergelaran) Seni Kolosal sane ngunggahang unteng 'Malaikat Pencubit Jiwa' sane pinaka operet sane kapisuguhang antuk Sanggar Kini Berseri, maprakanti sareng komunitas seni SMA/SMK.(Gix_)
Komentar