Gubernur Koster Nyanggra Becik Pangrencana Uji Coba Bus Listrik ring Bali
- 04 November 2020
- 20:11 WITA
- News
DENPASAR, Balitopnews.com -Pangupaya Gubernur Bali Wayan Koster sajroning ngardi jagat Bali sane resik saha luput saking polusi nganutin sareng visi Nangun Sad Kerthi Loka Bali, sayan akeh ngamolihang sokongan. Sane pinih anyar, Bali kautamayang nglaksanayang uji coba transportasi umum ramah lingkungan marupa bus listrik.
Peluncuran uji coba bus listrik karencanayang jagi kalaksanayang ring rahina Sukra, 6 November 2020. Pangrencana puniki kauningayang olih Direktur Utama Perum Pengangkutan Penumpang Djakarta (PPD) Pande Putu Yasa ri kala nglaksanayang audiensi sareng Gubernur Bali Wayan Koster ring Rumah Jabatan Gubernur Bali, Jaya Sabha, Buda 4 November 2020.
Peluncuran uji coba bus listrik puniki jagi kalaksanayang sinarengan sareng peluncuran angkutan wisata Kawasan Strategis Pariwisata Nasional (KSPN) ring Bali.
Gubernur Bali Wayan Koster nyanggra becik pangrencana uji coba bus listrik ring Bali. Gubernur maosang, pidabdab kawentenan bus listrik majanten anut sareng kawijakan Pemerintah Provinsi (Pemprov) Bali sane sampun kaunggahang ring Peraturan Gubernur Bali Nomor 45 Warsa 2019 nganinin indik Bali Energi Bersih miwah Peraturan Gubernur Bali Nomor 48 Warsa 2019 nganinin indik Penggunaan Kendaraan Bermotor Listrik Berbasis Baterai.
"Bali majanten sampun madue geguat nganinin indik kendaraan listrik napi malih wantah sane kapertama wenten ring Indonesia,” baos Bapak Koster.
Dane ngawewehin, sayan akehnyane krama miwah antuk kawentenan genah sane sayan cupek, ngawinang krama kabuatang mangda magingsir ring transportasi publik.
"Nenten prasida sekadi puniki kewanten (antuk nganggen kendaraan pribadi, red). Krama mangda kaicen tuntunan sapunapi indik mabuatnyane transportasi publik,” baosnyane.
Tiosan nenten nyemerin palemahan, Gubernur ngaptiang mangda transportasi publik prasida ngicen rasa degdeg ring para penumpang makamiwah prasida dados genah makarya majeng krama Bali.
Dirut Perum PPD, Pande Putu Yasa pinaka operator maosang, uji coba bus listrik ring Bali jagi kakawitian antuk kalih armada. Dane ngaptiang mangda uji coba nenten manggihin pialang mawinan ring awarsa sane jagi rauh Bali prasida ngajuang malih kawentenan armada bus listrik majeng pemerintah pusat.
Majeng angkutan KSPN ring Bali kasiagayang 12 armada sane ngicen layanan limang rute. Bus KSPN ring Bali jagi nganggen warna Tridatu pinaka cihna budaya lokal Bali antuk pramudi kautamayang mangda anak Bali.
Tiosan nguningayang indik pangrencana peluncuran angkutan KSPN miwah uji coba bus lstrik, Perum PPD taler nguningayang indik pangupaya nglaksanayang prakanti sareng Perusda Bali sajroning ngelola angkutan publik ring Bali mangda prasida profesional.
Ring parikrama punika taler karauhin antuk Kepala Dinas Perhubungan Provinsi Bali I Gde Wayan Samsi Gunarta miwah Perwakilan Perusda Bali.(gix)
Komentar