Gubernur Wayan Koster Nyokong Reformasi Perizinan
- 05 November 2020
- 20:11 WITA
- News
DENPASAR, Balitopnews.com - Gubernur Bali Wayan Koster nyokong kawentenan reformasi perizinan berbasis Rencana Detail Tata Ruang (RDTR) sane kaunggahang ring Undang-Undang Cipta Kerja (UU Ciptaker). Reformasi puniki kaaptiang prasida ngawinang perijinan sayan dangan saha gelis, mawinan sahananing ijin sane kaarsaang sayan gelis, dangan miwah murah, pamekas melanin pabuat krama. Parindikan punika katuekang ri kala Dane dados narawakya ring acara Talkshow Tata Ruang sesampune Undang-Undang Cipta Kerja kamedalang, sane ngunggahang unteng ‘Kupas Tuntas Reformasi Perizinan Berbasis RDTR’ sane kalaksanayang antuk Kementerian Agraria dan Tata Ruang/Badan Pertanahan Nasional (ATR/BPN), Denpasar, Wraspati (5/11/2020).
Talkshow kalaksanayang antuk nganggen kalih pamargi, narawakya miwah pamilet wenten sane rauh langsung ring Aula Prona Lante 7 Gedung Kementerian ATR/BPN, miwah Gubernur Wayan Koster ngamiletin antuk virtual saking Rumah Jabatan Gubernur Bali, Jayasabha, Denpasar.
Ring pangawit panlatarannyane, Gubernur sane taler pinaka Ketua DPD PDIP Bali puniki, nyanggra becik pangupaya saking pemerintah antuk ngamedalang UU Cipta Kerja. Dane ngajiang becik kawijakan punika majanten sangkaning makudang-kudang wiwilan. Pecak anggota DPR RI tigang periode puniki maosang, sadurung ngicen panampen majeng kawentenan undang-undang, kapatutang mangda sayuwakti uning ring daging undang-undang punika, rauh ring titik komannyane. “Tiang sampun ping tiga munggah pinaka DPR saha sampun wenten 20 undang-undang sane taler sampun karembe wiadin karancang. Nanging durung wenten undang-undang sane daging ipun paripurna pamekas komprehensif, sekadi undang-undang Cipta Kerja puniki,” baosnyane. Tiosan ring komprehensif, napi sane kaunggahang ring UU Ciptaker taler katujuang sajroning ngicalang ego sektoral sane salami puniki ketah kapanggihin ring perijinan. Manutnyane parindikan puniki pinaka pamargi dahating becik sane kaambil antuk pemerintah mawinan samian widang prasida adung saha prasida kalimbakang.
Gubernur Koster ngaptiang, antuk pamargin UU Cipta Kerja puniki prasida nguwah tata titi perijinan sane salami puniki ketah kabaosang meweh, birokrasi panjang, saha nenten tatas ring standaripun. Dane ngicen conto indik kawentenan ijin hotel miwah restoran ring Bali. “Wenten sane kantos taunan manyantosang mangda ijinnyane medal, wenten sane gelis, wenten sane naur wenten taler sane nenten keni prabea. Durung wenten geguat wiadin standar sane pateh pantaraning kabupaten/kota, yadiastun perijinin sane kaurus pateh,” baosnyane.
Dane maosang, UU Ciptaker pinaka pamargi dahat becik saking pemerintah mawinan prasida wenten standar perijinan sane tinas, mawinan nenten wenten pabinayan malih, inggian ring galah wiadin prabea ri kalaning ngurus ijin pantaraning kabupaten/kota. “Tiang mapangapti mangda prasida madue tata titi perijinan sane saderana, murah, gelis, saha nenten raris dados tategenan majeng krama,” baosnyane.
Kawewehin malih, Bali taler banget muatang reformasi perizinan riantukan sane mangkin kantun uleng sajroning nglimbakang koperasi miwah UMKM. Yening sampun perijinannyane saderana, pelaku UMKM ring Bali kaaptiyang prasida nglimbakang usaha sane kaduwenang. Antuk punika, Dane banget mapangapti mangda pemerintah digelis ngamedalang Peraturan Pemerintah (PP) mawinan undang-undang puniki prasida digelis kalaksanayang. “Pemerintah Provinsi Bali nyantosang indik pamargi panglantur saking undang-undang puniki saha siaga jagi ngamargiang,” baos Dane.
Menteri ATR/BPN Sofyan Djalil sajroning bebaosannyane maosang yening silih tunggil tetujon kamedalangnyane UU Ciptaker wantah mangda pamargin perijinan sayan saderana saha dangan. Manutnyane, regulasi sane wenten sadurungnyane katureksain dados pialang sane nenten melanin pabuat UMKM. “Undang-undang puniki ngutamayang mangda tata titi perijinan prasida kauwah. Sapunapi mangda UMKM nglimbak saha prasida mungkah selah pikaryan sane sayan akeh,” baosnyane. Majeng ring widang ATR/BPN, tata titi perijinan jagi berbasis sistem Geopasial Tata Ruang (Gistaru). “Pangaptin titiang sapunapi mangda sayan becik. Samian investai sane jagi kalaksanayang, prasida kacingakin ring Gistaru,” baosnyane.
Parindikan sane masaih taler kabaosang antuk Menteri Koperasi dan UKM Teten Masduki. Dane maosang yening antuk mewehnyane tata titi ipun mategepan antuk akehnyane prasarat , ngawinang akeh UMKM nenten madue ijin usaha saha pamuputne kantun ngranjing ring kelompok sektor informal. Dane ngaptiang, UU Ciptaker ngicen pawesana becik majeng pelaku UMKM mawinan ring selanturipun sayan nglimbak saha prasida ngarepin pasaing sane wenten. (Gix_)
Komentar