Nyokong Re-Opening Monkey Forest, Wagub Cok Ace Ngelingang Mangda Sampunang Kantos Wenten Malih Gelombang Covid-19
- 05 November 2020
- 21:11 WITA
- News
GIANYAR,Balitopnews.com - Wakil Gubernur Bali Tjok. Oka Artha Ardhana Sukawati nyanggra becik Re-Opening kawasan suci wenara wana monkey forest risampune salami kutus sasih sampun tutup sangkaning pandemi Covid-19 sane nibenin ring pungkuran puniki. Yadiastun kawentenan pasien sane keni Covid-19 sampun nedunang (ring rahina rabu dibi kalikita wenten 662 utawi 5,53%), nanging Wagub Cok Ace ngaptiang mangda makudang-kudang pidabdab patut kamargiang, pamekas ring protokol kesehatan mangda setata kamargiang becik ring genah wisata. Parindikan puniki kabaosang ri kala mungkah wewidangan suci wenara wana monkey forest, Ubud, Kabupaten Gianyar, Wraspati (5/11).
"Ngiring iraga sareng sami saka kidik maparidabdab mungkah genah wisata sane wenten. Riantukan sajroning nguningayang yening genah wisata iraga kantun becik saha aman, patut kakawitin saking iraga sareng sami antuk matangi, silih tunggilnyane antuk mungkah malih artshop, warung miwah ngresikang wewidangan soang-soang, sekadi conto ring wewidangan monkey forest miwah Ubud. Napi sane dumunan, adeng napi ayam, nika sekadi pratiwimba. Napike iraga wau maparidabdab sesampune pariwisata kabungkah malih, majanten nenten. Pangaptin titiang mangda pelaku pariwisata ngawit maparidabdab antuk mecikang sistem promosi saha mungkah genah usahannyane soang-soang," Wagub Cok Ace ngawewehin.
Re-Opening kawasan suci wenara wana monkey forest kalaksanayang antuk ngaruruh dewasa ayu manut agama Hindu, antuk pangapti mangda akeh wisatawan sane rauh miwah prasida luput saking kawentenan virus corona sane kantos mangkin kantun manibenin.
Antuk kabungkahnyane wewidangan suci wenara wana monkey forest puniki, panyokong-panyokongnyane sekadi artshop, warung wiadin restoran sane wenten ring wewidangan irika taler kabungkah, mawinan prasida nangiang pariwisata Bali, mawinan kasukertan krama taler prasida kakardinin.
Antuk kabungkahnyane wewidangan suci wenara wana majanten saking manageman monkey forest prasida nyelehin indik pangrauh wisatawan sepisanan nangiang pariwisata Bali, riantukan yening iraga wantah nyantosang kewanten majanten ekonomi nenten prasida mamargi, napi malih ring kawentenan pandemi Covid-19 sekadi mangkin.
Sajroning nyokong re-opening destinasi wisata monkey forest, General Manager Mandala Suci Wenara Wana I Nyoman Sutarjana maosang yening protokol kesehatan kamargiang becik, wenten 50 pcs kasiagayang ring makudang-kudang genah sawewidangan monkey forest. Ring salanturnyane katarka yening wisata alam sane jagi akeh karuruh. Akehnyane wisatawan sane rauh kaanutang sareng kahanan sane wenten. Angga manageman durung prasida mastikayang yening pangrauh wisatawan jagi akeh salami pandemi,yadiastun monkey forest pinaka silihh tunggil genah wisata sane utama ring Ubud, nanging pangupaya antuk mungkah malih genah wisata puniki wantah pinaka pamargi sajroning ngawitin pidabdab mecikang pariwisata Bali risampune jagate katiben Covid-19.( Gix_)
Komentar