Gubernur Koster Mungkah Uji Coba Angkutan Shuttle Bus Listrik
- 06 November 2020
- 21:11 WITA
- News
DENPASAR, Balitopnews.com - Gubernur Bali Wayan Koster mungkah pamargin ujicoba layanan angkutan ring Kawasan Strategis Pariwisata Nasional (KSPN) miwah ujicoba angkutan shuttle bus listrik ring wewidangan Kota Denpasar, Sukra 6 November 2020 ring Rumah Jabatan Gubernur Bali, Jayasabha, Denpasar.
Gubernur Koster nyanggra becik peluncuran kendaraan bermotor sane nganggen bahan bakar ramah lingkungan sane ring pangawitipun kalaksanayang majeng shuttle bus.
Manutnyane, antuk nganggen bahan bakar sane nenten nyemerin palemahan pamekas mawit saking energi listrik ring kendaraan bermotor, pinaka silih tunggil cihna pamargin Peraturan Gubernur Bali Nomor 45 Warsa 2019 nganinin indik Bali Energi Bersih. Parindikan puniki anut sareng visi “Nangun Sat Kerthi Loka Bali”. Tetujonnipun wantah nyaga kasucian saha karahayuan jagat Bali miwah sadagingnyane, ngulati karahayuan saha kasukertan krama wiadin jagat Bali.
“Antuk nganggen energi listrik ring kendaraan bus sane kaujicoba ngawit rahina mangkin majanten dahat becik. Ring selanturipun, nenten ring mobil kemanten, nanging taler jagi kamargiang ring motor, piranti rumah tangga saha nenten ring sarana transportasi kemanten, nanging taler ring restauran, hotel, kaaptiang ngawit nganggen energi sane nenten nyemerin palemahan, “baosnyane.
Gubernur Koster sane taler pinaka Ketua Umum DPD PDI Perjuangan Bali puniki ngawewehin, ring selanturipun sapunapi prasida ngulati jagat Bali mandiri energi bersih, mawinan pembangkit listrik sane jagi kalimbakang ring Pulo Dewata, mangda samian mawit saking energi baru terbarukan. Sekadi angin, tenaga surya, gelombang wiadin sumber energi ramah lingkungan sane tiosan, sane majanten nenten malih mawit saking minyak bumi wiadin batubara.
Melarapan antuk punika Bali pinaka genah pariwisata sane sampun kaloktah ring jagate mangda sayuwakti resik saha asri sane kakawitin antuk kawentenan energi ramah lingkungan.
"Yening bahan bakar sane nenten nyemerin palemahan puniki prasida kamargiang ring sakancan widang, sampun kapastikayang udara Bali nenten kotor. Udara sane wenten majanten bersih, sane mawesana becik majeng kesehatan krama Bali,“ baosnyane.
Ring selanturipun, prakanti saren becik pantaraning makudang-kudang angga setata katincapang saha sokongan saking krama sajroning ngardi pangupaya puniki taler dahat kabuatang.
“Antuk punika iraga sareng sami prasida ngardi Bali Energi Bersih nganutin sareng visi Nangun Sat Kerthi Loka Bali,” baosnyane.
Selami uji coba bus KSPN puniki, jagi ngicen layanan ring 5 trayek pariwisata. Minakadi Trayek 1: Bandara I Gusti Ngurah Rai-Central Park Kuta-Ubung-Mengwi-Bedugul-Singaraja. Trayek 2: Bandara I Gusti Ngurah Rai-Sanur-Ubud-Kintamani-Singaraja. Trayek 3: Singaraja-Menjangan-Taman Nasional Bali Barat. Trayek 4: Bandara I Gusti Ngurah Rai-Goa Lawah-Padangbai-Manggis-Amuk-Amed miwah Trayek 5: Bandara I Gusti Ngurah Rai-Sanur-Klungkung-Besakih.
Nenten sekadi bus wiadin angkutan umum sane tiosan, bus puniki wenten genah ipun mararian saha nenten ngawag sajroning ngamunggahang wiadin nedunang penumpang, nanging sampun wenten genah sane sampun kasediayang.
Parikrama puniki taler karauhin antuk Manggalaning DPRD Provinsi Bali, Bupati/ Walikota sajebag Bali, angganing Kementrian Perhubungan wiadin OPD sane mapaiketan ring Pemprov Bali, miwah kadagingin antuk ngalinggatanganin MoU pinaka cihna uji coba pengoperasian bus listrik ring wewidangan Kota Denpasar.(Gix_)
Komentar