Nglimbakang Ekspor Produk Lokal, Gubernur Koster Ngalepas Penerbangan Kapertama Cargo Flight Denpasar-Hongkong
- 07 November 2020
- 16:11 WITA
- News
DENPASAR, Balitopnews.com - Gubernur Bali Wayan Koster nglepas resmi penerbangan kapertama Maskapai Garuda Indonesia rute khusus kargo Denpasar - Hongkong ring Bandara Internasional I Gusti Ngurah Rai, Denpasar, Saniscara (7 November 2020) rahina semeng. Penerbangan kapertama puniki makta 30 ton kargo minakadi komoditas perikanan miwah asil bumi sane tiosan saking Bali.
Gubernur Bali Wayan Koster nyanggra becik saha ngajiang pisan ekspor komoditas lokal Bali ring kawentenan industri pariwisata sane durung degdeg sangkaning pandemi Covid-19
“Antuk galah pengiriman sane sayan gelis, majanten sayan ageng selah ipun yening komoditas lokal pamekas produk perikanan miwah pertanian lokal Bali prasida katrima ring pasar ekspor,” baos pecak anggota DPR RI tigang periode puniki.
Kawentenan layanan kargo ekspor puniki anut sareng kawijakan saking Gubernur Bali sajroning nglimbakang widang pangan, sane nenten nagingin pabuat krama Bali kemanten, nanging taler prasida nagingin pabuat ekspor.
Gubernur Bali, Wayan Koster, ngaptiang melarapan antuk kawentenan layanan penerbangan kargo puniki prasida nangiang produksi UMKM sepisanan mecikang diversifikasi produk ekspor Bali mawinan ekonomi krama prasida tumbuh becik.
Sangkaning punika, Ketua DPD PDIP Provinsi Bali puniki ngaptiang mangda layanan puniki prasida kalimbakang malih saha mangda dangan karuruh antuk pelaku pelaku UMKM wiadin ekspor Bali.
Penerbangan khusus kargo Rute Denpasar - Hongkong wantah kamargiang apisan kewanten salami awuku antuk nganggen armada Airbus A330-300 sane madue daya angkut 30-40 ton ring satunggil penerbangan. Rute khusus kargo Denpasar - Hongkong puniki ngawit saking Bandara Internasional I Gusti Ngurah Rai, Denpasar ring galah 07.00 WITA saha rauh ring Hongkong ring galah 12.00.
Direktur Utama Garuda Indonesia Irfan Setiaputra ring siaran persnyane maosang, penerbangan rute khusus kargo wantah pinaka silih tunggil selah bisnis sane dahat becik sane kasokong antuk Garuda Indonesia saha anut ring tren pengangkutan kargo sane ring pungkuran puniki sayan nglimbak. “Antuk kawentenan jaringan penerbangan kargo puniki, pangaptine wantah parikrama direct export Usaha Kecil dan Menengah (UKM) ring widang perikanan, perkebunan, peternakan lokal wiadin komoditas unggulan sane tiosan ring wewidangan Bali, prasida ngarepin pasaing sane wenten, mawinan ekonomi nasional taler kawentenane sayan becik,” baosnyane.
Dane ngawewehin, kawentenan penerbangan khusus kargo puniki wantah kapikamkam antuk Garuda Indonesia miwah Gubernur Bali sajroning nincapang daya saing produk Bali melarapan antuk ngirangin galah utawi waktu tempuh penerbangan.
"Kawentenan rute penerbangan khusus kargo puniki wantah kapikamkam antuk Garuda Indonesia sareng Gubernur Bali Wayan Koster sajroning nincapang daya saing komoditas ekspor unggulan provinsi Bali, melarapan antuk ngicen layanan penerbangan langsung antuk galah pengiriman sane sayan cendet riantukan nenten madaging transit, mawinan produk kawentenane kantun seger, saha ring prabea logistic taler nenten ageng pisan mawinan prasida ngarepin pasaing," baos Irfan.
Anut ring pangupaya nglimbakang pasar kargo saha nyokong daya saing komoditas unggulan nasional, Garuda Indonesia sadurungnyane taler sampun ngicen layanan penerbangan khusus kargo Manado - Narita miwah Makassar - Singapura.
Pelepasan penerbangan perdana puniki taler karauhin antuk General Manager PT. Angkasa Pura I (Persero) Kantor Cabang Bandar Udara Internasional I Gusti Ngurah Rai, Herry A.Y Sikado miwah Regional CEO Bali dan Nusra Region PT Garuda Indonesia (Persero) Tbk, Ngakan Septigraha. (Gix)
Komentar