Tutup Festival Seni Bali Jani II, Koster : Sampunang Waneh Nglimbakang Seni Miwah Budaya Mangda Prasida Ngwangun Eksistensi Daya Saing, Sane Prasida Dados Sumber Kahuripan Ring Selanturnyane.
- 08 November 2020
- 15:11 WITA
- News
DENPASAR, Balitopnews.com - Gubernur Bali Wayan Koster nutup Festival Seni Bali Jani II "Candika Jiwa Puitika Atma Kerthi" ring Gedung Ksirarnawa Art Center, Saniscara wengine, 7 November 2020.
Festival Seni Bali Jani sane kapikamkam antuk Putri Suastini Koster ring awarsa sane sampun lintang, pinaka genah majeng para seniman modern sajroning nyihnayang reriptannyane sane katujuang sajroning nglimbakang kasenian, sapisanan nglestariang budaya Bali.
Sajroning ngadungang kawentenan seni tradisi sareng seni modern sane sampun madue paingkupan ipun, inggian ring Pesta Kesenian Bali (PKB) wiadin Festival Seni Bali Jani (FSBJ), mawinan Gubernur Bali sayan ngukuhang kawentenannyane melaparan antuk makarya payung hukum sane kaunggahang ring Perda Provinsi Bali Nomor 4 Warsa 2020 nganinin indik Penguatan miwah Pemajuan Kebudayaan Bali.
Parindikan puniki pinaka cihna bukti kasumekenan saking Gubernur Wayan Koster sajroning nyayubin reriptan seni krama Bali riantukan budaya pinaka kaluihan Bali, napi malih Bali antuk katah kramannipun sawetara limang yuta diri, nenten madue kekayaan alam sekadi batu bara, minyak bumi, emas, wiadin pertambangan sane tiosan.
Festival Seni Bali Jani pinaka genah sane kasediayang majeng krama sane seneng saha nelebang seni Bali pinaka pangupaya sajroning ngukuhang saha nglimbakang budaya sane kaduwenang Provinsi Bali. Seni tradisi wiadin seni modern pinaka kasenian sane dahat utama sane prasida nyarengin nagingin peradaban sane wenten ring jagate.
"Sampunang kantos waneh ngwangun seni budaya ring Provinsi Bali mawinan ring selanturipun prasida ngwangun eksistensi miwah daya saing, sane ring pamuputne prasida kanggen genah pangupa jiwa. Antuk kawentenan reriptan-reriptan seni sane inovatif miwah kreatif, katureksain jagi prasida ngawetuang daging pikayunan pamekas ide sane anyar," baos Gubernur Koster.
Melarapan antuk Festival Seni Bali Jani majanten jejak sejarah Bali pinaka pusat peradaban dunia pamekas Padma Bhuwana jagi sayan ngukuhang kawentenan kasenian miwah budaya Bali melarapan antuk reriptan seni saking para yowana, seniman wiadin kurator, prasida kakardinin.
"Anggen genahe puniki sabecik-becikne sajroning ngadungang kasenian antuk kolektif miwah masekaa mawinan sane kapisuguhang sayuwakti becik saha prasida ngarepin pasaing sane wenten," baosnyane.
Gubernur Koster sane taler pinaka Ketua DPD PDI Perjuangan Provinsi Bali ngawewehin yening silih tunggil caciren peradaban bangsa sane maju wantah akehnyane para jana sane nyurat buku. Anggannyane ngaptiang mangda pamargin Festival Seni Bali Jani sane kaping tiga ring warsa 2021 sane jagi rauh, kadagingin antuk pameran buku tingkat internasional.
Kepala Dinas Kebudayaan Provinsi Bali Prof. I Wayan Adnyana nlatarang, Festival Seni Bali Jani II kalaksanayang sajroning nglimbakang seni modern, kontemporer wiadin reriptan seni sane inovatif antuk ngunggahang unteng "Candika Jiwa Puitika Atma Kerthi" sane pitegesipun semesta kreativitas terkini dalam mencandikan jiwa spirit, taksu wiadin ide-ide cemerlang antuk platform konsep eksplorasi, eksperimentasi, lintas batas, kontekstual lan kolaborasi.
Salami kutus rahina pamargin Festival Seni Bali Jani II pinaka galah sane mabuat sane akeh ngawetuang seni virtual sane kasokong antuk 295 pamilet saking kutus soroh lomba, kasarengin antuk 1000 seniman sane maingkupan ring 45 komunitas pagelaran, maweweh antuk kawentenan 45 perupa saha 1 komunitas mural sajroning pameran Megarupa. Tiosan ring punika taler wenten 17 penerbit buku ring beranda pustaka antuk 341 persentasi judul inggian fiksi wiadin non fiksi, makamiwah wenten 10 tokoh sane kapikukuhang ngamolihang Bali Jani Nugraha 2020 sangkaning prestasi wiadin dedikasinnyane.
Ring pamargin penutupan Festival Seni Bali Jani II Warsa 2020, Putri Koster kairing antuk Balawan maktayang puisi sane mamurda "AGUSTUS". Tiosan punika taler kapisuguhang Adilango sane ngunggahang unteng "Alun Bali Bangkit" sane kabaktayang antuk Sanggar Rare Sejati sane kolaborasi sareng makudang-kudang seniman Bali.(Gix_)
Komentar