Gubernur Bali Ngamikukuhang Kepala Perwakilan BPKP Provinsi Bali Miwah Kepala Kantor Regional X BKN
- 12 November 2020
- 20:11 WITA
- News
DENPASAR, Balitopnews.com -Gubernur Bali Wayan Koster ngamikukuhang saha ngambil sumpah Kepala Perwakilan Badan Pengawasan Keuangan dan Pembangunan (BPKP) Provinsi Bali Muhammad Masykur miwah ngamikukuhang Kepala Kantor Regional X Badan Kepegawaian Negara (BKN) Paulus Dwi Laksono ring Gedung Wiswasabha Utama, Kantor Gubernur Bali Denpasar, rahina Wraspati, 12 November 2020.
Gubernur Koster ngajiang becik indik prakanti sane sahat becik sareng BPKP Provinsi Bali sajroning ngicen pengawasan intern majeng akuntabilitas keuangan daerah, ngicen asistensi penyusunan laporan keuangan pemerintah daerah miwah laporan akuntabilitas kinerja instansi pemerintah.
Gubernur Bali ngawewehin, yadiastun Pemprov Bali sampun ping pitu ngamolihang opini Wajar Tanpa Pengecualian (WTP), parindikan puniki nenten raris ngawinang anggannyane rumasa bangga, nanging dane jagi setata mautsaha nincapang pikaryannyane, saha sayan tureksa sajroning nyusun wiadin ngrincikang anggaran.
Mawinan anggaran sane wenten, prasida kakaryanin becik, efektif, efisien makamiwah prasida ngicen output wiadin outcome sane sayuwakti mawiguna sajroning nincapang kasukertan krama.
Ring selanturipun, Gubernur Koster ngaptiang mangda BPKP prasida sayan progresif sajroning nentuang tolak ukur predikat WTP, tiosan antuk pengelolaan keuangan sane becik, akuntabel miwah transparan nanging taler amunapi kawigunannyane saha output saking anggaran sane kawigunayang olih krama.
Majeng Kepala BKN sane wau kapikukuhang, Gubernur Koster ngaptiang mangda BKN setata nglaksanayang reformasi miwah nureksain makudang-kudang kawijakan mapaiketan ring penyusunan miwah penetapan kawijakan teknis ring widang manajemen kepegawaian.
Pamargin upacara pamikukuhan taler karauhin antuk Deputi Kepala BPKP Bidang Akuntan Negara Sally Salamah , Wakil Kepala BKN Supranawa Yusuf, Bupati Klungkung Nyoman Suwirta , Kepala OPD ring kekuuban Pemprov Bali miwah uleman sane tiosan.(Gix_)
Komentar