Mungkah Pameran Lukisan, Putri Koster Ngaptiang Reriptan Seni Dados Terapi majeng Pasien
- 12 November 2020
- 21:11 WITA
- News
BANGLI, Balitopnews.com - Ketua TP PKK Provinsi Bali Putri Koster ngaptiang, ring selanturipun mangda tembok ring rumah sakit ring Bali prasida kadagingin antuk reriptan seni. Dane nureksain yening parindikan punika prasida ngawinang pasien sayan gelis kenak, inggian sane sungkan fisik wiadin psikis.
Parindikan puniki kauningayang ri kala mungkah pamargin Pameran Lukisan Seniman Muda Bali sane ngunggahang unteng ‘Seni di tengah Pandemi’ sane taler karuntutin antuk pakeling Hari Kesehatan Nasional, ring RSJ Provinsi Bali, Bangli, Wraspati 12 November 2020.
"Lukisan punika majanten jagi prasida ngicen rasa degdeg ring kayun para pasien mawinan sungkannyane digelis prasida kenak,”baosnyane.
Manutnyane, antuk pakantenan sane luih sangkaning reriptan seni punika, para pasien kaaptiang sayan degdeg kayunnnyane sapisanan prasida mecikang imun, mawinan prasida digelis kenak. Antuk punika, ring selanturnyane rumah sakit kaaptiang nagingin makudang-kudang reriptan seni sapisanan pinaka terapi majeng pasien wiadin tenaga medis sane wenten.
"Ring selanturnyane banget pangaptin tiang mangda nenten ring RSJ Provinsi Bali kewanten sane ngamargiang parindikan punika, nanging samian rumah sakit sane wenten ring Bali,” Sekadi punika pawewehnyane sajroning pamargin acara sane sane kapikamkam antuk Ubud Diary sareng RSJ Prov Bali.
Ibu Gubernur ngaptiang mangda para seniman Bali prasida nyarengin nagingin rumah sakit antuk makudang-kudang reriptan seni sane kaduenang, wiadin nglaksanayang kolaborasi sareng pasien sane wenten irika, pet prade wenten sane kayun. “Melaparan antuk pangupaya puniki, pangaptine wantah mangda para seniman ring pulo dewata taler prasida ngwantu pasien sane sungkan ring rumah sakit,” baosnyane.
Napi malih, pandemi Covid-19 puniki ngelingang iraga mangda sayan eling ring angga sarira, mawali eling ring pabuat iraga manados manusa. “Covid-19 ngelingang iraga mangda Nangun Sat Kerthi, mawali eling ring angga sarira, mewali eling ring pabuat iraga manadi manusa. Tiosan ring fisik sekadi sandang, pangan, papan, kesehatan rohani taler pinaka pabuat dasar manados manusa. Parikrama seni wantah silih tunggil tamba majeng pinyungkan rohani,” baosnyane.
Ring galahe punika, Dane ngajiang becik indik kawentenan seniman sane nyarengin pamargin pameran. Dane ngaturang suksmaning manah majeng para seniman, mawinan ring lorong rumah saking akeh madaging reriptan-reriptan seni. Pangaptine mangda pasien sane wenten prasida digelis kenak.
“Titiang nenten sumanangsaya yening samian puniki kamargiang madasar kalascarya. Saantukan seniman sane yakti-yakti seniman sampun majanten sugih pangrasa nenten sugih arta brana,” baosnyane.
Direktur RSJ Provinsi Bali, dr I Dewa Gede Basudewa SpKJ maosang pameran puniki nenten sajroning misuguhang reriptan seni kewanten, nanging taler pinaka terapi kesehatan jiwa.
"Seni ngicen rasa degdeg saha santi, parindikan punika banget kabuatang antuk para pasien irika,” baosnyane.
Dane maosang yening pameran puniki pinaka kolaborasi para seniman muda Bali sareng para pasien RS RSJ prov Bali, inggian sane nglaksanayang rehabilitasi wiadin sane sampun mawali ring tengahing krama.
"Titiang nyantenang yening akeh pasien irika sane madue kawagedan ring widang seni saha reriptan karyannyane taler kagehang irika. Parindikan punika taler pinaka sarana terapis majeng pasien,” Dane ngawewehin.
Tiosan punika, pameran puniki taler madue tetujon numbuhang kapercayan angga saking pasien miwah ngicalang panampen kaon majeng para pasien irika.
“Rumah saking wantah mapikayun nyihnayang yening pasien jiwa taler prasida makarya reriptan seni saha prasida kenak sekadi jati mula. Sangkaning punika dane ngaturang suksmaning manah majeng para seniman sane ngwantu ngwangun kapercayan angga para pasien irika. Ayah-ayahan para seniman majanten dahat utama pisan,” baosnyane.
Ring galahe punika, Putri Koster taler nodyanin pameran lukisan saha numbas makudang-kudang lukisan reriptan para seniman wiadin pasien RSJ Prov Bali. Dane taler polih mabebaosan saha ngaatang kayun pasien sane karehabilitasi sinambi makarya lukisan.(Gix_)
Komentar