Ngardi Padma Bhuwana, Gubernur Koster Midabdabin Pewangunan Kawasan Pusat Kebudayaan Bali
- 16 November 2020
- 18:11 WITA
- News
KLUNGKUNG - Kasumekenan Gubernur Bali, Wayan Koster kasarengin Wakil Gubernur, Tjokorda Artha Ardhana Sukawati sajroning nangiang kawentenan kabudayan Bali pinaka Pusat Peradaban ring jagate utawi Padma Bhuwana nganutin sareng visi Nangun Sat Kerthi Loka Bali melarapan Pola Pembangunan Semesta Berencana nyujur Bali Era Baru sayan kapidabdabin becik antuk pangapti mangda prasida ngardi Pusat Kebudayaan Bali ring Kabupaten Klungkung.
Parindikan punika kakantenang ri kala Gubernur Wayan Koster ngamargiang Konsultasi Publik Rencana Pembangunan Kawasan Pusat Kebudayaan Bali ring Kabupaten Klungkung, nemonin Soma (16/11) ring Balai Budaya Ida I Dewa Agung Istri Kanya.
Ring panlatarannyane, Wayan Koster maosang yening wewidangan Pusat Kebudayaan Bali sane magenah ring Eks Galian C Gunaksa puniki sadurungnyane wantah kawentenane kaon pisan, nenten wenten sane ngurus, saantukan sesampune Gunung Agung Meletus daweg warsa 1963, ngawinang genah pertanian irika katutup antuk kaawentenan lahar Gunung Agung, langkungan ring 300 Ha.
Selanturnyane ngawit warsa 1963-2002 wewidangane punika (Pesisir Tangkas, Gunaksa, wiadin wewidangan nampek irika) mauwah dados genah Galian C. Sangkaning wenten penambangan pasir irika, kalikita ngawit warsa 2002 wewidangan ring Pesisir Tangkas, Gunaksa, wiadin genah nampek irika sayan kaon, genahe sayan kaon, dados wit kawentenan pinyungkan rauhing ring kriminalitas, mawinan ijin penambangan Galian C katutup antuk Pemkab Klungkung. Ring selanturnyane, warsa 2002-2017 wewidangan Pesisir Tangkas, Gunaksa, utawi sane nampek irika manados genah kosong, tan kauratiang, saha wenten makudang-kudang usulan mapaiketan ring pengelolaan genahe irika, nanging nenten wenten sane prasida kamargiang.
Napi malih ring warsa 2017 letusan Gunung Agung taler makta lahar sane rumasuk ageng, ngawinang galian irika sayan nenten kauratiang. "Sangkaning punika, kabuatang pangupaya sajroning nyayubin, nitenin sapisanan nglimbakang wewidangan irika mangda prasida mawiguna majeng krama Bali pamekas krama Klungkung," baos Koster sane kasanggra antuk tepuk tangan saking krama Desa Tangkas, Desa Jumpai, Desa Gunaksa, Desa Sampalan Klod, Desa Gelgel wiadin moncoling krama ring Klungkung, saha maosang yening wewidangan Pesisir Tangkas, Gunaksa, sampun kapikukuhang ring Perda 3/2020 pinaka Kawasan Strategis Provinsi pamekas Kawasan Pusat Kebudayaan Bali.
Wayan Koster sane taler pinaka Ketua DPD PDI Perjuangan Provinsi Bali puniki nlatarang, sajroning ngardi Pusat Kebudayaan Bali, titiang malarapan antuk Dinas Pekerjaan Umum, Penataan Ruang, Perumahan dan Kawasan Permukiman Provinsi Bali sampun ngamikukuhang genah sajroning pewangunan Kawasan Pusat Kebudayaan Bali sane jimbarnyane kantos 334, 62 Ha sane ngingkupin Pemukiman Desa Tangkas Eksisting wenten 11,19 Ha, Penlok Paletan I jimbarnyane 110,31 Ha, Penlok Paletan II sane jimbarnyane 213, 12 Ha.
"Ring konsep perencanaan, wenten 3 konsep minakadi Konsep Utama Pembangunan Kawasan Pusat Kebudayaan Bali antuk pangrencananipun makarya genah sane prasida kaanggen inventarisasi warisan Kebudayaan sane katami saking para panglingsir ngraris kaintegrasiang sareng pabuat pengetahuan miwah teknologi galahe mangkin wiadin pabuat sane jagi rauh, mawinan kautaman kabudayan sane katami prasida rajeg kantos kapungkur wekas," baos Dane sane pinaka lulusan ITB sane taler sampun ngamedalang Perda Nomor 4 Warsa 2020 indik Penguatan miwah Pemajuan Kebudayaan Bali.
Salanturnyane ring konsep pembangunan wenten Edukasi, Konservasi, Rekreasi, miwah Pembangunan ramah lingkungan berkelanjutan rauhin Pembangunan Terintegrasi berbasis IT. Tiosan punika taler wenten Konsep Infrastruktur Terintegrasi dan Ramah Lingkungan, antuk kawentenan Perhubungan Darat (Jalan, Kereta LRT, & ART, red), Perhubungan Laut (Pelabuhan Gunaksa, Marina, red), miwah Pengembangan Infrastruktur sane becik saha nenten nyemerin palemahan.
Manut Wayan Koster ring satunggil pewangunan ring Provinsi Bali setata nganutin sareng ajah-ajah Trisakti Bung Karno minakadi Berdaulat ring widang Politik, Berdikari ring widang Ekonomi, miwah Berkepribadian ring widang Kebudayaan, nuekang yening sajroning masterplan pewangunan Kawasan Pusat Kebudayaan Bali nganggen konsep Tri Mandala & Sat Kerthi, sane ngingkupin Wana Kerthi malarapan antuk pewangunan Taman Hutan Raya wiadin Taman Rekreasi. Danu Kerthi, antuk pewangunan Dani wiadin Estuary Dam. Majeng Atma Kerthi wenten pewangunan Catus Patha, Jagat Kerthi wenten pewangunan Panggung Terbuka. Majeng Jana Kerthi puniki majanten pinaka Pusat Kebudayaan Bali sane kategepin antuk sarana panyokong sane tiosan maka miwah Segara Kerthi malarapan antuk kawentenan segara wiadin marina.
"Cutetnyane titiang mapikayun sapunapi prasida nangiang kabudayan Bali, riantukan ring sejarah Bali wantah ring Klungkung puniki Bali manggihin masa keemasan kabudayan Bali, pamekas daweg Kerajaan Gelgel sane kaenterang antuk Raja Dalem Waturengong," baos pecak Anggota DPR-RI 3 Periode puniki.
Sajroning Konsultasi Publik Rencana Pembangunan Kawasan Pusat Kebudayaan Bali ring Kabupaten Klungkung punika, taler karauhin antuk Kepala Kejaksaan Tinggi Bali, Bupati Klungkung, Nyoman Suwirta, Ketua DPRD Klungkung, Anak Agung Gde Anom, Kepala Perangkat Daerah ring Pemprov Bali, Para Kelompok Ahli Pembangunan Provinsi Bali, Kepala Kanwil BPN Provinsi Bali, Tim Persiapan Pengadaan Tanah Pembangunan Kawasan Pusat Kebudayaan Bali ring Kabupaten Klungkung, Camat Klungkung miwah Camat Dawan, rauhing ring Para Perbekel ring Desa Tangkas, Desa Jumpai, Desa Gunaksa, Desa Sampalan Klod, wiadin Perbekel ring Desa Gelgel. (Gix_)
Komentar