Putri Koster : Ngarepin Covid-19, Elingang “Pesan Ibu 3M”
- 17 November 2020
- 22:11 WITA
- News
JEMBRANA, Balitopnews.com - Ketua TP PKK Provinsi Bali Putri Suastini Koster kasarengin antuk Ketua TP PKK Kabupaten Jembrana Ari Sugianti Artha dados narawakya sajroning pamargin pabligbagan sane ngunggahang unteng "Tanggap Covid-19, Ingat Pesan Ibu 3M", ring Radio Dirgantara, nemonin Anggara 17 November 2020.
Tiosan ngelingang indik 'Pesan Ibu 3M' (setata nganggen masker, setata eling ngwajikin tangan antuk nganggen sabun saha toya sane membah, makamiwah nyaga jarak), Putri Suastini Koster taler ngelingang indik 3B sane patut kamargiang ring kahuripan puniki, minakadi 'Berdoa' sadurung ngamargiang swagina, kalanturang antuk 'Berupaya' sajroning ngamargiang pikaryan saantukan ibu majanten wibuh antuk inovasi miwah sampunang kantos lali ring 'Bersyukur' mangda iraga prasida ngaruruh semerti ring satunggil baya sane kaarepin.
Kahanan sekadi mangkin ngawinang samian angga maulehan mangda prasida nagingin pabuat sarahina, sekadi antuk makarya inovasi sane anyar. Silih tunggilnyane wantah melarapan antuk ngawigunayang natar pekarangan manados HATINYA PKK minakadi “halaman/ taman asri, tenteram, indah dan nyaman” sane majanten dahat mawiguna saha prasida anggen nagingin pabuat sarahina , sekadi jangan, pedes, tuwung, tomat wiadin tetanduran sane tiosan.
Melarapan antuk punika majanten iraga prasida nagingin pabuat serahina pamekas ring pabuat majeng ajeng-ajengan.
"Sayan becik tuntunan wiadin didikan saking ibu majanten jagi prasida ngwetuang karakter anak alit sane sayan becik, 3 warsa kapertama kaicen tuntunan miwah katitenin becik, majanten 300 warsa selanturnyane generasi jagi prasida tumbuh becik," baos Putri Koster.
Madasar antuk kapitresnan, majanten ibu jagi prasida ngwetuang ide sane anyar sajroning nagingin pabuat sarahina.
"Sajroning nyayubin krama saking kawentenan pandemi, majanten samian angga kabuatang mangda ngamargiang satunggil pakesiar saking sang ngawa rat saha kawantu antuk panyobyahan saking TP PKK sajebag Bali," Dane ngawewehin.
Manutnyane, sira ugi kabuatang mangda degdeg kayunnyane sajroning ngarepin parindikan puniki pinaka pamargin kahuripan.
"Ibu mangda sampunang osah wiadin inguh napi malih kantos tan sanggup ngarepin pikobet sane nibenin, riantukan yening kayunnyane sampun degdeg jagi prasida ngwetuang ide sane anyar saha prasida numbuhang bakat sane kaduwenang, sekadi ri kala pandemi Covid-19 sane mawesana kaon majeng widang ekonomi puniki, kakantenang akeh bakat ibu-ibu sane prasida tumbuh saha kalimbakang, mawinan prasida nagingin pabuatnyane sarahina" Putri Koster nuekang.
Ibu wiadin anak istri pinaka genah masadu pamekas nganinin indik pikobet sane kaarepin rabinnyane. Sampuang pisan kantos wenten KDRT ri kala ekonomi kulawarga dahat kaon. Istri punika, tiosan pinaka ibu taler wantah pinaka dewi nyalantara sane wibuh antuk kapitresnan.
Ring masa Covid-19 ngiring iraga sareng sami ngamargiang pakesiar saking pemerintah, tiosan antuk ngamargiang 3M, samian krama mangda ngadohin genah-genah sane ramia. Yening wenten piodalan wiadin upacara yadnya tiosan, sampunang kantos ngandegang piodalan, nanging icen galah sane sayan suwe majeng para pamedek sane jagi tangkil, yening ketahnyane nyejer 3 rahina, prasida kauwah manados 5 rahina, mawinan pamedek nenten kantos kosekan ri kala pedek saha pamedek prasida ngepah galahnyane rauh ka pura.
"Antuk ngamargiang protokol kesehatan 3M, antuk setata tangar saha sayuwakti ngamargiang becik pakesiar indik prokes, panglahlah Covid-19 prasida kakirangin, saha yening sampun keni kopid, mangda sampunang tegang, mangda imunnyane prasida sayan becik," baos Putri Koster.(Gix_)
Komentar