Sulawesi Selatan Akeh Malajah Saking TP PKK Provinsi Bali
- 24 November 2020
- 21:11 WITA
- News
DENPASAR,Balitopnews.com – Makudang-kudang program sane kalaksanayang antuk TP PKK Provinsi Bali sane kapacukin antuk Putri Suastini Koster akeh ngadautin kayun angga PKK ring makudang wewidangan, silih tunggilnyane Provinsi Sulawesi Selatan (Sulsel). Mapaiketan ring punika, Ketua TP PKK Sulawesi Selatan Liestiaty Fachrudin raris nyarengang samian pengurusnyane nglaksanayang studi ring Bali.
Rombongan TP PKK Sulsel kasanggra antuk Putri Koster kasarengin antuk Kepala Dinas Pemberdayaan Masyarakat, Desa, Kependudukan, dan Pencatatan Sipil Provinsi Bali Putu Anom Agustina miwah para pengurus TP PKK Bali, nemonin rahina Anggara 24 November 2020 ring Gedung Kertha Sabha, Denpasar.
Putri Koster nlatarang yening kawentenan pandemi Covid-19 banget karasayang pawesananipun ring Bali. Napi malih, kawentenan pandemi taler ngicen pawesana majeng organisasi sane kapamucukin antuk Dane. "Riantukan kawatesin antuk protokol kesehatan, salami pandemi puniki, nenten akeh parikrama sane prasida kalaksanayang ring lapangan," baosnyane.
Yadiastun asapunika,nenten raris ngawinang TP PKK Bali nenten nglaksanayang program. Selami pandemi,TP PKK Bali seringan nyobiahang makudang-kudang kawijakan saking Pemprov Bali sajroning nambakin kawentenan Covid-19. "TP PKK Bali nyarengin nyobiahang indik makudang-kudang kawijakan pemerintah mangda prasida kauningin antuk samian krama," pawewehnyane.
Ibu Gubernur Bali puniki maosang, pandemi sane banget ngosahang puniki majanten ngawinang samian angga meweh antuk mangarepin. “Sangkaning punika, Bapak Gubernur Bali digelis ngambil pamargi melarapan antuk nyarengang desa adat sajroning nees panglimbak Covid-19 ring wewidangan Bali,” baosnyane.
Manutnyane, ngelingang krama sajroning ngamargiang protokol kesehatan 3M (Nganggen Masker, Ngwajiki Tangan saha Nyaga Jarak) nenten pinaka parindikan sane dangan. Sangkaning durung ketah nganggen masker, akeh krama sane nenten kayun nganggen masker ri kala malelungan. Yadiastun asapunika, TP PKK Provinsi Bali nenten surud-surud nyobiahang saha ngicen tuntunan ring krama indik mabuatnyane nganggen masker salami pandemi.
Tiosan nyobiahang indik kawijakan pemerintah, salami pandemi TP PKK Bali taler sering tedun ngicen wantuan marupa sembako wiadin masker majeng krama sane keni pawesana sangkaning Covid-19. Mapaiketan ring punika, TP PKK Provinsi taler ngicen pakesiar majeng TP PKK kabupaten/kota sajroning ngamargiang ‘penggak’ sane nyediayang pabuat pokok majeng krama, saha kawentenane gratis.
Dane nguningayang rasa bangga, saantukan silih tunggil programnyane sane mapesengan HATINYA PKK (Halaman Asri Teratur Indah dan Nyaman) sane sering kalaksanayang ngawit ring awarsa sane sampun lintang, kajantenang banget ngwantu krama salami pandemi. Dane taler bangga riantukan Bali madue angga-angga istri sane taler jemet ngwantu ekonomi kulawarga ring tengahing pandemi.
“Angga istri iriki nenten wenten sane meneng kemanten, antuk kawagedan sane kaduwenang sekadi maratengan, nyait wiadin sane tiosan, mautsaha raris ngawewehin pamikolih kulawarga sajroning nagingin pabuatnyane sarahina,” baosnyane.
Tiosan punika, anak istri sane waged sajroning ngwacen puisi puniki taler nlatarang indik pengalamannyane sane naenin keni virus corona. Ri kala kanikaang keni Covid-19 antuk status OTG (Orang Tanpa Gejala), Dane manggihin panampen kaon saking krama tiosan majeng sane keni virus Copis-19.
"Akeh sane keni Covid-19 kapanggihin raris meneng kemanten saha nyingidang angga,” baosnyane.
Nyantenang parindikan punika, ngawinang kedeh raris mautsaha ngicen tuntunan ring krama melarapan antuk makarya video sane kakaryanin ring genah karantina.
“Keni virus punika majanten nenten pinaka parilaksana kaon wiadin kejahatan, nenten sandang singidang. Nanging sane sampun keni virus puniki mangda taler eling nyaga kesehatan kulawargannyane wiadin krama tiosan melarapan antuk isolasi. Saantukan virus puniki prasida ngwetuang baya,” baosnyane.
Ketua TP PKK Sulsel Liestiaty Fachrudin nguningayang rasa bangganyane majeng Putri Koster sane sering kapanggihin ri kala rauh ring pamargin parikrama PKK ring Jakarta. Manutnyane, Bali wantah dahat luih saha akeh parindikan sane prasida kaplajahin ring Bali. “Titiang makasami majanten mapikayun mangda prasida sayan akeh malajah iriki, silih tunggilnyane mapaiketan ring pembinaan UMKM,” baosnyane.
Tiosan sajroning ngawewehin pangweruhan, pangrauh TP PKK Sulsel ka Bali taler pinaka cihna sokongan majeng pangupaya nangiang malih pariwisata Bali sane keni pawesana kaon sangkaning pandemi Covid-19. Salami rauh ke Bali, Liestiaty madue pangrencana ngrauhin makudang-kudang genah wisata wiadin sentra kerajinan. Rombongan sane rauh ring Pulo Dewata nemonin rahina Anggara (24/11), jagi mawali malih ka Sulsel ring rahina Wraspati (26/11) sane jagi rauh.
Parikrama sane nemuang Ketua TP PKK Bali sareng Sulsel taler kadagingin antuk saling ngicen cenderamata, marerasan miwah ngwacen puisi olih Kepala Dinas Pemberdayaan Masyarakat, Desa, Kependudukan, dan Pencatatan Sipil Provinsi Bali Putu Anom Agustina. Makudang-kudang pengurus TP PKK Sulsel taler magilihan munggah ka panggung ngwacen puisi sane karipta antu pengurus TP PKK Bali. Ring panguntat parikrama, Putri Koster maktayang puisi sane mamurda ‘Sumpah Kumbakarna’ sane karipta antu Denok Kristianti.(Gix_)
Komentar