Pemprov Bali Ngamolihang Klasifikasi Informatif Keterbukaan Informasi Publik Warsa 2020
- 25 November 2020
- 20:11 WITA
- News
DENPASAR, Balitopnews.com -Pemerintah Provinsi Bali ngamolihang anugerah Keterbukaan Informasi Publik Warsa 2020 klasifikasi Informatif. Pangwacenan saha Penganugrahan Keterbukaan Informasi Publik majeng kualifikasi Badan Publik Informatif karauhin olih Sekretaris Daerah Provinsi Bali Dewa Made Indra antuk virtual saking Ruang Video Conference, Dinas Komunikasi, Informatika dan Statistik Provinsi Bali, Buda 25 November 2020.
Sekda Dewa Indra ngaturang suksma pisan antuk utsaha ageng saking Dinas Komunikasi, Informatika dan Statistik Provinsi Bali miwah samian OPD ring Pemprov Bali mawinan prasida ngamolihang klasifikasi informatif Keterbukaan Informasi Publik (KIP) Warsa 2020.
Kapolihangnyane klasifikasi informatif KIP olih Pemprov Bali kawentenane maundagan. Daweg warsa 2018 , Pemprov Bali ngamolihang predikat cukup informatif, raris ring warsa 2019 nincap antuk ngamolihang klasifikasi menuju informatif.
"Ring warsa 2020 puniki prasida raris ngamolihang predikat klasifikasi pinih becik pamekas informatif. Puniki nenten lempas saking utsaha ageng miwah prakanti sane becik pantaraning OPD. Ring salanturnyane kabuatang mangda prasida ngamolihang predikat sane pateh, saha mangda kaparipurnayang malih mawinan prasida ngamolihang nilai sane sayan becik, “ pawewehnyane.
Sekda Dewa Indra sane kasarengin antuk Kepala Dinas Komunikasi, Informatika dan Statistik Provinsi Bali Gede Pramana taler nguningayang yening kalih kriteria ring KIP minakadi inovasi miwah kolaborasi. Inovasi punika ngingkupin inovasi pelayanan informasi, inovasi pelayanan informasi ring tengahing pandemi Covid-19 miwah inovasi strategi inovasi publik.
Kriteria kaping kalih wantah kolaborasi sane ngingkupin kolaborasi Pemprov Bali sareng badan publik sane tiosan inggian ring penyediaan, pelayanan rauhing ring penyebaran informasi publik.
“Kalih kriteria punika prasida kadagingin mawinan prasida raris ngamolihang predikat informatif. Layanan informasi publik nenten prasida kaandegang yadiastun ring tengahing pandemi, nanging kabuatang mangda sayan inovatif. Ring salanturnyane majanten jagi tincapang malih, mawinan sayan inovatif sajroning ngicen layanan keterbukaan informasi majeng krama, “ baosnyane.
Wakil President Republik Indonesia KH Ma’ruf Amin sajroning sambrama wacanannyane maosang, wenten makudang-kudang parindikan mabuat mapaiketan ring keterbukaan informasi publik. Keterbukaan informasi publik wantah pinaka pangupaya sajroning nagingin hak saking krama sajroning ngamolihang informasi publik pinaka pahan saking hak asasi manusia.
Keterbukaan informasi publik taler pinaka pangupaya sajroning ngulati pemerintahan sane bersih saha luput saking korupsi, pelayanan publik sane transparan, efektif miwah efisien. Keterbukaan informasi publik taler pinaka pahan saking kasumekenan pemerintah sajroning nyarengang krama ri kala ngambil pamutus mapaiketan ring kebijakan publik.
Melarapan antuk kawentenan keterbukaan informasi publik majanten krama kaaptiang mangda nyarengin pidabdab ri kala makarya kawijakan publik, mawit ring pangrencana, pamargin kawijakan rauhing ring panureksan kawijakan. Antuk punika, Wapres nyarengang samian angga mangda uning indik mabuatnyane panyarengan krama sajroning makarya kawijakan publik.
“Pemerintah majanten jagi setata ngutamayang keterbukaan wiadin transparansi publik sajroning ngenterang pemerintahan, “ baosnyane.
Anugerah Keterbukaan Informasi Publik kaicen majeng Badan Publik sane prasida nagingin prasarat kualifikasi informatif. Penganugerahan puniki kaicen olih KI pusat satunggil warsa majeng Badan Publik sane nglaksanayang saha ngamargiang UU Nomor 14 Warsa 2008 nganinin indik KIP sane kadulurin antuk monitoring miwah evaluasi saking Komisi Informasi Pusat.
Ring seseleh keterbukaan Badan Publik (BP), saking 348 BP sane kaselehin salami warsa 2020, kakantenang 72,99 persen (254 BP) kantun kirang pisan sajroning ngamargiang keterbukaan informasi publik, antuk pawilanganipun 17,53 persen (61 BP) ngranjing ring kategori Cukup Informatif, 13,51 persen (47 BP) Kurang Informatif miwah 41,95 persen (146 BP) tidak Informatif.
Panureksan sane kalaksanayang KI pusat majeng BP ring warsa tahun 2020 wantah nyarengang kutus diri panureksa sane mawit saking akademisi, peneliti, pegiat keterbukaan informasi miwah media massa. Ring warsa 2020 puniki, majeng kategori BP Informatif wantah 17,43 persen (60 BP) miwah Menuju Informatif 9,77 persen (34 BP) sane katureksain sampun nglaksanayang UU Nomor 14 Warsa 2008 nganinin indik keterbukaan Informasi Publik. Pemprov Bali ngranjing ring klasifikasi informatif badan publik pemerintah provinsi antuk ageng nilai ipun 92,20.(Gix_)
Komentar