Banget Nguratiang Kalestarian Palemahan, Bali Ngamedalang SPBKLU, PLTS Fotovoltaik miwah Transportasi Daring KBL
- 26 November 2020
- 16:11 WITA
- News
DENPASAR, Balitopnews.com - Gubernur Bali Wayan Koster ngamedalang SPBKLU (Stasiun Penukaran Baterai Kendaraan Listrik Umum) PLN, PLTS (Pembangkit Listrik Tenaga Surya) Fotovoltaik miwah Kendaraan Listrik Grab, ring Rumah Jabatan Gubernur Bali, Jayasabha Denpasar, Wraspati 26 November 2020.
Gubernur Bali Wayan Koster maosang visi sajroning nyaga kasucian wiadin karahayuan jagat Bali pinaka visi sane kawangun madasar antuk budaya lokal Bali. Manut Gubernur Koster, napi sane kaunggahang ring blue print pewangunan Bali, kaanutang sareng piteket-piteket panglingsir Bali, mangda kahuripan puniki imbang, saling asih saha ngutamayang kalestarian palemahan.
“Mapaiketan ring kawentenan palemahan sane resik, majanten kawentenan polusi sane nyemerin jagat mangda kaluputang,” baosnyane.
Sangkaning punika, Gubernur Koster ngamedalang makudang-kudang kawijakan sajroning nyayubin palemahan rumasuk antuk nganggen energi bersih wiadin terbarukan.
“Punika taler mapaiketan ring energi, mangda nganggen energi sane nenten nyemerin palemahan, inggian ring pembangkit ipun rauhing ring energinyane, sekadi ring kawentenan sepeda motor mangda nganggen energi sane nenten nyemerin palemahan,” baosnyane.
Dane ngawewehin ring warsa 2021 anggannyane jagi ngamedalang SOP sane anyar mapaiketan ring pewangunan hotel, restoran, rumah, pasar swalayan wiadin sarana umum, sane kapatutang mangda nganggen listrik sane kawentenane ramah lingkungan.
Gubernur maosang, antuk kawentenan Pergub Bali Nomor 45 Warsa 2019 nganinin indik Bali Energi Bersih miwah Pergub Nomor 48 nganinin indik Penggunaan Kendaraan Bermotor Listrik Berbasis Baterai, sampun makeh angga sane ngajuang rencana usaha sane jagi kalimbakang ring Bali.
“Wenten Gesits, wenten Wijaya Karya, taler wenten rerepi sane ngranjing saking anak perusahaan Pertamina sajroning kawentenan energi baru terbarukan. Taler wenten 11 peneliti saking ITB sane jagi nyelehin kawentenan energi baru terbarukan ring Bali,” baosnyane.
Gubernur nyanggra becik kawentenan SPBKLU (Stasiun Penukaran Baterai Kendaraan Listrik Umum) PLN, PLTS (Pembangkit Listrik Tenaga Surya) Fotovoltaik miwah Kendaraan Listrik Grab, saha nyokong pelaku usaha mangda taler nyarengin pangupaya sajroning nyaga kasucian wiadin karahayuan jagat Bali. Dane nureksain yening melarapan antuk utsaha punika sane dahat luih majanten Ida Bhatara jagi asung ngicen wara nugraha.
“Napi sane kalaksanayang puniki wantah pinaka cihna sajroning nyaga kalestarian palemahan, mangda Bali yakti-yakti bersih wiadin sehat. Tiang nureksain yening udara puniki bersih, majanten paru-paru jagi sehat, mawinan sida panjang yusa,” baos doktor jebolan ITB puniki.
GM PLN Distribusi Bali Adi Priyanto maosang, PLN sane mangkin kantun nyobiahang indik pola hidup electrifying lifestyle, cutetnyane samian parikrama kaaptiang mangda nganggen piranti wiadin kendaraan listrik sane majanten akeh kaluihan ipun. Mapaiketan ring punika majanten taler kabuatang sarana panyokongnyane negepin konsep electrifying lifestyle puniki, silih tunggilnyane stasiun baterai swap sane akehnyane wenten pitung genah sane sampun kawangun saha wenten ring makudang genah ring Bali.
“Melarapan antuk puniki majanten akeh jagi tureksa ring kawentenan Provinsi Bali saha prasida dados conto majeng provinsi tiosan ring Indonesia, yening sampun panemaya galah iraga ngawitin pola hidup sane anyar, sane resik saha sehat, mawinan sayan ngadautin wisatawan rauh ka Provinsi Bali,” baosnyane.
Priyanto ngaturang suksma majeng Gubernur Bali sane sampun urati saha nyokong indik kawentenan kendaraan listrik ring Provinsi Bali, napi malih Bali pinaka provinsi kapertama sane madue Pergub khusus ngunggahang indik kendaraan bermotor listrik berbasis baterai.
Direktur Pengelola Grab Indonesia, Neneng Goenadi maosang, antuk peluncuran 30 kendaraan listrik ring Bali, ngawinang Grab dados perusahaan kapertama sane ngoperasiang 5.000 kendaran listrik langkung ring Indonesia.
“Majanten wenten wiwilannyane, parindikan puniki pinaka cihna panyokong Grab majeng Peraturan Gubernur Bali Nomor 45 miwah 48 Warsa 2019 nganinin indik energi bersih wiadin kendaraan bermotor listrik berbasis baterai sajroning nyujur Pulo Bali sane bersih melarapan antuk lalu lintas wiadin angkutan jalan sane nenten nyemerin kalestarian pelamahan,” baosnyane.
Manutnyane, Grab jagi setata nyokong Gubernur Bali wiadin Pemerintah Provinsi Bali sajroning ngulati ekonomi digital sane sayan becik.(Gix_)
Komentar