Nambakin Covid-19, Putri Koster Setata Ngelingang ‘Ingat Pesan Ibu 3M’
- 03 Desember 2020
- 21:12 WITA
- News
DENPASAR, Balitopnews.com - Ketua TP PKK Provinsi Bali, Putri Koster nenten surud-surud nyobiahang ring krama indik pangupaya nees panglahlah Covid-19 melarapan antuk nglaksanayang 3M (Memakai Masker, Mencuci Tangan miwah Menjaga Jarak). Kampanye puniki kalaksanayang malarapan antuk media sosial, TV miwah radio.
Ring rahina Wraspati, 3 Desember 2020 anak istri sane ketah kabaosang Bunda Putri nyobyahang ring krama indik gerakan ‘Ingat Pesan Ibu 3M’ melarapan antuk dialog interaktif ring Radio Genta Denpasar.
Dane maosang, kampanye sajroning nyarengang krama mangda setata eling ngamargiang protokol kesehatan (prokes) 3M patut setata kalaksanayang saantukan pandemi Covid-19 majanten durung ical. “Sadurung wenten vaksin, pangupaya sane pinih mabuat wantah antuk nglaksanayang 3M,” baosnyane.
Dane maosang yening, ‘ingat pesan ibu’ wantah pinaka tagline sane patut pisan saantukan baos ibu sane majanten kaanutin pisan.
Pantaraning tigang prokes sane patut kalaksanayang, ring galahe mangkin Putri Koster nuekang pisan indik ‘jaga jarak’. Dane maosang, jaga jarak nenten janten mapaiketan ring akehnyane krama sane mapupul ring dija ugi.
“Sane mabuat wantah sampunang mapupul. Yadiastun sareng kidik, nanging yening mapupul saha nampek pisan magenahan, majanten dangan jagi nglahlahin sane tiosan yening prade wenten sane keni covid-19. Punika taler yening sane mapupul akeh, nanging samian prasida jaga jarak, majanten prasida nees panglahlah virus puniki,”.
Dane ngaptiang, pesan ibu 3M puniki sayuwakti kamargiang antuk krama mawinan prasida nambakin panglahlah virus mawinan pandemi Covid-19 prasida digelis puput.
Tiosan punika Putri Koster taler nlatarang indik panyarengan angga PKK ring tengahing pandemi. Dane maosang, pandemi Covid-19 majanten ngicen pawesana kaon majeng samian krama, rumasuk organisasi sekadi TP PKK. Sangkaning kawatesin antuk prokes, akeh program PKK sane nenten prasida kalaksanayang. Yadiastun asapunika, dane ngaptiang ring kader PKK mangda kantun nglaksanayang parikrama sane mapaiketan ring pemberdayaan keluarga.
“Patut kaelingin, pemberdayaan keluarga nenten setata mapaiketan ring pangupa jiwa sane marupa jinah. Pangupaya antuk intik utawi hemat ri kala pandemi taler pinaka pahan saking pemberdayaan,” baosnyane.
Dane raris ngicen conto program HATINYA PKK (Halaman Arsi Teratur Indah dan Nyaman) sane dahat becik kalaksanayang salami pandemi. Salami pandemi, krama madue galah sane akeh ring jero soang-soang mawinan prasida nitenin pakarangan saha prasida kaolah mangda madue nilai ekonomi.
“Conto, sekadi katandurin pedes wiadin jangan. Antuk punika, prasida ngirangin prabea ri kala nubas basa-basa wiadin ri kala makarya jangan,” baosnyane.
Anak istri sane kaloktah taler pinaka seniman puniki maosang, kantun akeh parikrama sane prasida kalaksanayang antuk kader PKK ring tengahing pandemi.
“Cutetnyane wantah akeh parikrama sane mapaiketan sareng pangupaya ngwangun kulawarga prasida kalaksanayang sekadi ngwangun karakter anak alit, nuntun indik pola hidup sehat wiadin parikrama becik sane tiosan,” baosnyane.(Gix_)
Komentar